ماقتاارال اۋدانىنداعى «الپامىس باتىر» اتىنداعى ورتالىق ستاديونىندا وتكەن شارا ءوڭىردىڭ تاريحىنان سىر شەرتەتىن تەاترلاندىرىلعان قويىلىممەن باستالدى. ايتا كەتەلىك, جاڭا قۇرىلىم بويىنشا جەتىساي اۋدانىنىڭ اۋماعى - 104428 گەكتار, حالقىنىڭ سانى - 172 903, قۇرامىندا 13 اۋىلدىق وكرۋگ پەن 113 ەلدى مەكەن بولماق. ورتالىعى- جەتىساي قالاسى. ال ماقتاارال اۋدانىنىڭ اۋماعى - 80970 گەكتار, حالقىنىڭ سانى – 131 781, 11 اۋىلدىق وكرۋگ پەن 69 ەلدى مەكەن قاراماعىندا بولادى. ورتالىعى – مىرزاكەنت كەنتى. جاڭا اۋداندار تۇرعىندارىنىڭ قۋانىشىن, ەلباسى قول قويعان تاريحي شەشىمنىڭ ماڭىزىن بىلدىرەتىن سالتاناتتى شارادا وڭتۇستىك قازاقستان وبلىسىنىڭ اكىمى جانسەيىت تۇيمەباەۆ حالقى ەڭ تىعىز شوعىرلانعان اۋداندى ماقتاارال جانە جەتىساي دەپ ءبولىپ بەرگەن پرەزيدەنتكە ەل ەرەكشە ريزالىعىن ءبىلدىرىپ جاتقانىن اتاپ ءوتتى.
وسىنداي سالتاناتتى شارا جاڭادان قۇرىلعان كەلەس اۋدانىنىڭ ورتالىعى اباي اۋىلىنداعى ورتالىق ستاديوندا دا ءوتتى. جاڭا قۇرىلىم بويىنشا سارىاعاش اۋدانىنىڭ اۋماعى اۋماعى - 417074 گەكتار, حالقىنىنىڭ سانى – 191 096, قۇرامىندا 14 اۋىلدىق وكرۋگ پەن 71 ەلدى مەكەن بولماق. ورتالىعى - سارىاعاش قالاسى. ال كەلەس اۋدانىنىڭ اۋماعى - 345 127 گەكتار, حالقىنىڭ سانى – 135 819, 12 اۋىلدىق وكرۋگ پەن 83 ەلدى مەكەن قاراماعىندا بولادى. ورتالىعى – اباي اۋىلى.
جاڭا اۋدانداردىڭ تۇرعىندارىن قۇتتىقتاعان وبلىس اكىمى ءوڭىر ەكنوميكاسىن ءدامىتۋ ۇشىن تەر توگىپ, ەڭبەك ەتكەن ازاماتتاردى «وبلىسقا سىڭىرگەن ەڭبەگى ءۇشىن» مەدالىمەن, وبلىس اكىمىنىڭ گراموتاسىمەن جانە العىس حاتىمەن ماراپاتتادى. مەرەكەلى شارا كونتسەرتتىك باعدارلاماعا ۇلاستى.
ەركىن دوسىمباي,
وڭتۇستىك قازاقستان وبلىسى
