بۇل جەرلەسىمىز ءۇشىن بيىلعى ماۋسىمداعى العاشقى جارىس ەدى. ءبىراز ۋاقىت جارىس جولىنا شىقپاعان ولگا رىپاكوۆانىڭ ءالى بابىنا كەلە قويماعانى وسلودا انىق بايقالدى. ءۇش قارعىپ سەكىرۋ جاتتىعۋىندا 14 مەتر 12 سانتيمەترلىك كورسەتكىشپەن ول التىنشى ورىندا قالىپ قويدى. بۇل باسەكەدە باس جۇلدە كولۋمبيالىق كاترين يبارگۋەنگە بۇيىردى. ريو وليمپياداسىنىڭ جەڭىمپازى 14 مەتر 89 سانتيمەترگە سەكىردى. ەكىنشى جانە ءۇشىنشى ورىنداردى امەريكالىق توري فرانكلين مەن يامايكالىق كيمبەرلي ۋيليامس يەلەندى.
«گاۋھار ليگاسىنىڭ» التىنشى كەزەڭى ەندى 10-ماۋسىمدا شۆەتسيانىڭ باس شاھارى – ستوكگولمدە وتەدى. سول جارىستا دا ولگا رىپاكوۆا باق سىنايدى. ال 30-ماۋسىمدا ايتۋلى دودا پاريجدە جالعاسادى.
عالىم سۇلەيمەن,
«ەگەمەن قازاقستان»
