ەلىمىزدە مۇمكىندىگى شەكتەۋلى بالالارعا ءبىلىم بەرۋدى, ينكليۋزيۆتى ءبىلىم ۇستانىمدارىن جۇزەگە اسىرۋمەن قاتار بولاشاق پەداگوگ مامانداردىڭ كاسىبي شىڭدالۋىن قامتاماسىز ەتە وتىرىپ, اتالعان ورتالىقتا ەرەكشە قامقورلىققا مۇقتاج بالالار مەن جەتكىنشەكتەردىڭ ەمدەلىپ, ساۋىعۋىنا قولايلى جاعدايلار جاسالعان.
ورتالىقتىڭ اشىلۋ سالتاناتىنا قاتىسىپ, تۇساۋكەسەر ءراسىمىن جاساعان قر مەملەكەتتىك حاتشىسى گ.ن.ابدىحالىقوۆا ەلىمىزدىڭ بولاشاعى – بالالار ءۇشىن جاسالعان وسىنداي زاماناۋي ورتالىقتىڭ دەمەۋشىلەرىنە العىسىن ءبىلدىرىپ, رەسپۋبليكامىزدا 2016 جىلدان بەرگى ارالىقتا ءبىلىم بەرۋ مەن عىلىمدى دامىتۋ بويىنشا قابىلدانعان باعدارلاما اياسىندا ورتالىقتار اشۋ جولعا قويىلعاندىعىن اتاپ ءوتتى. «بۇگىندە رەسپۋبليكامىز بويىنشا وسى باعىتتاعى 176 كابينەت پەن ورتالىق جۇمىس ىستەيدى. 2019 جىلعا قاراي مۇنداي كابينەتتەردىڭ سانىن 220-عا جەتكىزۋ جوسپارلانىپ وتىر. مىنە, بۇگىنگى اشىلعان ورتالىق وسىنىڭ ءبىر دالەلىندەي. ەڭ ماڭىزدىسى – ورتالىق مەملەكەتتىك-جەكەمەنشىك ارىپتەستىك اياسىندا اشىلىپ وتىر. سوڭجى جىلداردا الماتى قالاسىنىڭ كاسىپكەرلەرى «بالاپان» باعدارلاماسىنا دا بەلسەندى اتسالىسا باستادى. ال «دارا» قايىرىمدىلىق قورى قولداۋ كورسەتكەن ورتالىقتا بالالارعا قولايلى جاعدايلار جاسالعاندىعىنىڭ كۋاسى بولىپ وتىرمىز. بالاپاندارعا دەر كەزىندە ءتيىستى ماماندار قولداۋ كورسەتىپ, ارى قاراي دەنساۋلىقتارىن تۇزەتۋگە مۇمكىندىكتەر قاراستىرىلعان ەكەن. ىستەرىڭىزگە ساتتىلىك تىلەيمىن», - دەدى گۇلشارا ناۋشاقىزى.
ۋنيۆەرسيتەت رەكتورى گ.ت.الدامبەرگەنوۆا جوعارى وقۋ ورنى بازاسىندا اشىلىپ وتىرعان كاسىبي ورتالىق ماماندارى مۇمكىندىگى شەكتەۋلى بالالارعا قولداۋ كورسەتە وتىرىپ, ولاردىڭ دەنساۋلىعىنىڭ جاقسارۋىنا, ارى قاراي ساپالى ءبىلىم الىپ شىعۋى ءۇشىن تەگىن قىزمەت ەتەتىندىگىن ايتىپ, دەمەۋشىلەرگە العىسىن ءبىلدىردى.
الماتى قالاسى ءبىلىم باسقارماسىنىڭ باسشىسى گ.م.حوجابەرگەنوۆانىڭ ايتۋىنشا, وڭتۇستىك استانا بويىنشا ءۇش جارىمعا جۋىق ەرەكشە كۇتىمدى قاجەت ەتەتىن بالالار تىركەلگەن. بۇگىندە 14 شتات ءبولىنىپ, 28 ملن تەڭگە شاماسىندا قاراجات قاراستىرىلعان. ال الماتى قالاسى بويىنشا 115 مەكتەپتىڭ بازاسىندا ينكليۋزيۆتى ءبىلىم بەرۋگە جاعداي جاسالىپ, وسى ماقساتتاعى جۇمىستارعا دا قوسىمشا قاراجات قاراستىرىلىپ وتىر. گ.حوجابەرگەنوۆا ورتالىق اشۋعا ارنايى ورىن ۇسىنىپ وتىرعان ۋنيۆەرسيتەت باسشىلىعى مەن بالالار بولمەلەرىن زامانعا ساي كورىكتەندىرىپ, قاجەتتى قۇرال-جابدىقتار, تەحنيكالارمەن قامتاماسىز ەتكەن دەمەۋشىلەرگە العىس ايتتى.
سالتاناتتى شارا بارىسىندا ءسوز العان «دارا» قايىرىمدىلىق قورىنىڭ قۇرىلتايشىسى گ.دوساەۆانىڭ ايتۋىنشا, بۇل رەسپۋبليكا بويىنشا اشىلىپ وتىرعان 25-ءشى بەيىمدەۋ ورتالىعى. گ.دوساەۆا بالدىرعاندار ءۇشىن زامانعا ساي مۇمكىندىكتەردى جاساپ, دەمەۋشىلىك جاساعان س.كان اۋلەتى مەن جاقىندارىنا ىستىق لەبىزىن ءبىلدىرىپ, ج.كان حانىمعا قور اتىنان ارنايى العىس حات تابىس ەتتى.
تۇساۋكەسەر راسىمىنەن كەيىن مەملەكەتتىك حاتشى گ.ابدىحالىقوۆا بالالار ءۇشىن جابدىقتالعان بولمەلەردى ارالاپ, بەيىمدەۋ بارىسىنداعى جۇمىس جوسپارلارىمەن تانىستى. ورتالىقتا تيفلوپەداگوگ, دەفەكتولوگ, پسيحولوگ, لوگوپەد, دەنە شىنىقتىرۋ ماماندارى قىزمەت كورسەتەدى. مۇنداعى جۇمىستارعا پەداگوگتارمەن قاتار ستۋدەنتتەر دە كاسىبي تاجىريبەدەن وتە وتىرىپ, جاسوسپىرىمدەردىڭ تۇرمىستىق-الەۋمەتتىك داعدىلارىن قالىپتاستىرۋعا, بالاباقشا مەن مەكتەپكە دايىندىعىنا كومەكتەسەتىن بولادى. ورتالىقتاعى بالالارعا ون سەگىز جاسقا تولعانعا دەيىن قولداۋ كورسەتىلەدى.
ۋنيۆەرسيتەت قابىرعاسىندا اشىلعان «قازاق ءالفاۆيتىن لاتىن گرافيكاسىنا كوشىرۋ» ورتالىعىنىڭ دا تۇساۋكەسەر سالتاناتىنا قاتىسقان قر مەملەكەتتىك حاتشىسى گ.ابدىحالىقوۆا بىرنەشە باعىتتا جۇمىس ىستەيتىن ورتالىق جۇمىسىمەن تانىستى. مۇندا ۋنيۆەرسيتەت ماماندارى جاڭا ءالىپبيدى يگەرۋ ساباقتارىن وتكىزەتىن بولادى.
ورتالىقتا وقىتۋشىلار عانا ەمەس, ستۋدەنتتەر, مەكتەپ مۇعالىمدەرى, بالا باقشا تاربيەشىلەرى ءۇشىن دە لاتىن قارپىنە ۇيرەنۋگە مۇمكىندىكتەر قاراستىرىلعان. ورتالىقتىڭ اشىلۋ بارىسىندا لاتىن قارپىن ۇيرەتۋگە بايلانىستى ۋنيۆەرسيتەت عالىمدارى ارنايى دايىنداعان باعدارلاما تانىستىرىلدى. باعدارلاما Android, iOS, Windows پلاتفورماسىنداعى لينگۆيستيكالىق سوزدىك, اۋدارما جاسايتىن ارنايى سايت, دىبىس جانە بەينە قۇرالدارمەن سۇيەمەلدەنگەن ساندىق ەلەكتروندىق وقۋلىقتاردى قامتيدى. وندا بالالارعا ارنالعان ويىن باعدارلامالارى مەن ءموبيلدى قوسىمشالار دا ەنگىزىلگەن.
شارا اياسىندا ۋنيۆەرسيتەتتىڭ پروفەسسور-وقىتۋشىلارى مەن ستۋدەنتتەرىنىڭ شىعارماشىلىعىنا ارنالعان «استانا – ۇلا دالا ەلورداسى» كورمەسى دايىندالعان ەكەن. مۇندا قىرىقتان استام كارتينالار مەن قولونەر بۇيىمدارى قويىلعان. ايتار ويىن, پىكىرىن قىلقالامنىڭ اياسىنا سىيعىزا ورنەكتەگەن شەبەرلەر استانانىڭ كورىكتى كەلبەتى مەن ەلىمىزدىڭ دارحان دالا جازيراسىن ەرەكشە كوركەم جەتكىزە بىلگەن. مەملەكەتتىك حاتشى گ.ابدىحالىقوۆا كورمە ۇيىمداستىرۋشىلارىنا العىسىن ءبىلدىرىپ, تىلەك كىتاپشاسىندا ءوزىنىڭ قولتاڭباسىن قالدىردى.
ەلۆيرا سەرىكقىزى,
«ەگەمەن قازاقستان»
الماتى
