– مەملەكەت باسشىسىنىڭ «تسيفرلى قازاقستان» مەملەكەتتىك باعدارلاماسىن جۇزەگە اسىرۋ اياسىندا ماڭعىستاۋدىڭ ساكرالدىق جانە تاريحي-مادەني كورنەكتى جەرلەرىنىڭ تسيفرلى كارتاسىن ازىرلەۋ بويىنشا جۇمىس قولعا الىنعان بولاتىن. ءوڭىردىڭ تۋريستىك الەۋەتىن دامىتۋ, ءارى الىس-جاقىنداعى تۋريستەرگە ولكە ءتۋريزمى تۋرالى ماعلۇماتتىڭ قولجەتىمدىلىگىن ارتتىرۋ ماقساتىنداعى جوبا ءوز جولىنا ءتۇستى. ۇسىنىستى «2GIS-اقتاۋ» كومپانياسى قولداپ, قازىرگى تاڭدا تاريحي-مادەني جانە تابيعي نىسانداردى تسيفرلى كارتاعا ەنگىزۋ بويىنشا كوپتەگەن جۇمىستار جۇرگىزىلدى جانە بۇل بىتكەن جۇمىستار تەك جوبانىڭ ءبىرىنشى كەزەڭىنىڭ عانا ۇلەسىنە تيەدى, – دەيدى ماڭعىستاۋ وبلىستىق تۋريزم باسقارماسىنىڭ باسشىسى وركەن بيساقاەۆ.
باسقارما باسشىسىنىڭ ايتۋىنشا, وڭىرگە تۋريستىك ماقساتتا كەلۋشىلەر سانى جىل سايىن ارتىپ كەلەدى. مىسالى, وتكەن جىلى ىشكى تۋريزم بويىنشا ماڭعىستاۋدىڭ كورىكتى جەرلەرىنە 177 178 تۋريست كەلگەن بولسا, كەلۋ ءتۋريزمى بويىنشا 28 726 ادام ماڭعىستاۋ تابالدىرىعىنان اتتاعان. بۇل ەكى كورسەتكىش تە سالىستىرمالى تۇردە قاراعاندا 2016 جىلعى دەڭگەيدەن جوعارى.
جاڭا جوبا اياسىندا ءوڭىردىڭ 24 كيەلى جەرلەرى مەن تاريحي-مادەني ورىندارى تسيفرلى كارتاعا ەنگىزىلدى.
– بىرلەسكەن جوبا ماڭعىستاۋدى قازاقستاننىڭ تۋريستىك ساپارمەن كەلۋ كارتىشكەسى كيەلى جەرلەر مەن كوز تارتارلىق لاندشافتى-گەوگرافيالىق جەرلەرىنىڭ ءبىرى رەتىندە ناسيحاتتاۋ ماقساتىندا تەگىن نەگىزدە جۇزەگە اسىرىلدى. ماڭعىستاۋ وبلىسى اكىمدىگىنىڭ قولداۋىمەن مارشرۋتتاردى قۇرۋ ءۇشىن كارتوگرافيالىق مالىمەتتەردى جيناقتاۋ بويىنشا ءبىز ەكسپەديتسيا ۇيىمداستىردىق جانە 3000 شاقىرىمنان استام جول ءجۇرىپ وتتىك. جۇرگىزىلگەن جۇمىستىڭ ناتيجەسىندە «2گيس-اقتاۋ» قوسىمشاسىندا نىساندارعا باراتىن مارشرۋتتار قۇرۋ مۇمكىندىگى, سونىمەن بىرگە كوز تارتارلىق كوگىلدىر ايلاق, ياعني جاعاجاي, ساۋرا (ارنا), تامشالى (بۇلاق, شاتقال), جىعىلعان (قۇلاما جار), سۇلتان ەپە جەراستى مەشىتى, قاپامساي (ارنا), شاقپاق اتا (جەراستى مەشىتى), شارلار سايى (شار ءتارىزدى كونكرەتسيالار), وتپان تاۋ (تاريحي-مادەني كەشەن), ايراقتى-شوماناي (تاۋ قالدىقتارى), شەرقالا (تاۋ), تۇزبايىر (تۇزدى كول), سفينكس (جارتاس), سيسەم اتا (قورىم), بەكەت اتا (جەر استى مەشىتى), نايزا (تاۋ, كورىنىس), بوزجىرا (تاۋ, ساي), شوپان اتا (جەراستى مەشىتى), رادون سۋ كوزى (ىستىق سۋ كوزى), پەسچانىي ءمۇيىسى (جاعاجاي), توقماق (تاستى جاعاجاي), كەندىرلى (دەمالىس بازاسى), قارىنجارىق (ويپات, تۇزدى كول) جانە بۋلىويىق (ۇڭگىر) ورىندارىنا قاتىستى وففلاين رەجىمىندەگى مۇمكىندىك پايدا بولدى, – دەدى «2گيس-اقتاۋ» كومپانياسىنىڭ ديرەكتورى ەربول بايجىگىتوۆ.
مەكەمەلەردىڭ تولىق انىقتاماسىن, ناۆيگاتورمەن قالالاردىڭ كارتاسىن بىرىكتىرگەن 2گيس كومپانياسى بازاسىندا قازاقستان, رەسەي جانە وزگە دە ەلدەردىڭ 320 قالاسى تۋرالى اقپارات شوعىرلانعان. تمد ەلدەرىندەگى ەڭ كەڭ تاراعان كارتوگرافيالىق, انىقتامالىق قوسىمشالاردىڭ ءبىرى بولىپ تابىلاتىن كومپانيانىڭ قىزمەتىن الەم بويىنشا 40 ملن ادام قولدانادى, دەمەك, ەندى ماڭعىستاۋ ءتۋريزمى وسى 40 ملن قولدانۋشىنىڭ نازارىندا. ولار الىستا وتىرىپ-اق ولكە تۋرالى تانىپ-ءبىلىپ, ساپارعا شىعۋ جولدارىن انىقتاپ, قاجەتتى سۇراقتارىنا جاۋاپ الا الادى. تاعى ءبىر جاڭالىعى – قوسىمشا عالامتورعا قوسىلماي سمارتفونداردا جۇمىس ىستەيدى, سونداي-اق ونلاين-نۇسقالارى دەربەس كومپيۋتەرلەرگە دە قولجەتىمدى.
ماڭعىستاۋ ءتۋريزمىن ودان ءارى تانىتۋ جانە تۋريستەردى تارتا ءتۇسۋ باعىتىندا جوسپارلانىپ وتىرعان جۇمىستار دا جوق ەمەس ەكەن.
– بۇگىنگى تاڭدا ماڭعىستاۋ وبلىسىنىڭ تۋريزم باسقارماسى تاراپىنان «Mangystau.Info» تۋريستىك-اقپاراتتىق سايت پەن «M-travel» موبيلدىك قوسىمشاسىن ازىرلەۋدىڭ ءبىرىنشى كەزەڭى اياقتالدى. قازىرگى ۋاقىتتا بازانى ءتيىستى اقپاراتپەن تولتىرىلىم جاسالۋدا. ەندى كەز كەلگەن تۋريست, ول قازاقستاندىق نەمەسە شەتەلدىك بولسىن, وبلىسىمىزدىڭ تارتىمدى بارلىق تۋريستىك جەرلەرى تۋرالى, ءتىپتى جەرگىلىكتى قوناقۇيلەردى برونداۋعا دەيىن اقپارات الا الادى. سونىمەن قاتار 2018 جىلعا ارنالعان جوسپارعا سايكەس, وبلىسىمىزدىڭ مادەنيەت باسقارماسىمەن بىرلەسىپ, ءوڭىرىمىزدىڭ بارلىق مۇراجايلارىنا Q-كودتار ورنالاستىرۋ بويىنشا جۇمىستار جۇرگىزىلۋدە. بۇلار – وڭىرگە كەلەتىن تۋريستەرگە ناقتى كومەكشى بولاتىن ءىس-شارالار. بولاشاقتا بۇل باعىتتاعى جۇمىستار جالعاساتىن بولادى, – دەيدى ءو.بيساقاەۆ.
جوسپارلانعان جۇمىستار قاتارىندا ماڭعىستاۋ وبلىستىق تۋريزم باسقارماسى قازاقستان رەسپۋبليكاسىنىڭ مادەنيەت جانە سپورت مينيسترلىگى تۋريزم يندۋسترياسى كوميتەتىمەن وڭىرلەردە ءتۋريزمدى دامىتۋ جولدارىن جاڭارتۋ جۇمىستارى بار. بۇل باعىتتا تاياۋ جانە شالعاي ورنالاسقان تۋريستىك نىساندارعا باراتىن جولداردى جاقسارتۋ مەجەلەنگەن. ماڭعىستاۋدا كيەلى جەرلەرمەن قاتار, مەملەكەت قورعاۋىنداعى 13 مىڭ مادەني ەسكەرتكىش بار. ولاردىڭ بارلىعى اقتاۋ قالاسىنان وتە شالعاي ورنالاسقان, جول-كولىك قاتىناسى دا وڭدى ەمەس. ول ورىنداردى قاجەتتى ينفراقۇرىلىممەن قامتاماسىز ەتۋ جانە تۋريستەرگە قولايلى جاعداي جاساۋ كوپ قاراجاتتى تالاپ ەتەدى جانە قىسقا مەرزىم ىشىندە جۇزەگە اسىرۋ مۇمكىن ەمەس. سوندىقتان دا ءىس باسىنداعىلار تاياۋداعى 5 جىل ىشىندە ناقتى بىرنەشە ايماقتا قاجەتتى ينفراقۇرىلىمدى دامىتۋعا ەرەكشە ءمان بەرمەك.
الدىمەن اقتاۋ قالاسىنىڭ تەڭىز جاعالاۋى ايماعىندا ەلەكتر جارىعىنىڭ جۇيەسىن, سۋمەن جانە گازبەن قامتۋ, كارىز جۇيەسى, جولداردى جوندەۋ مەن سالۋ جوسپارلانۋدا. بۇل – قوناقۇي كەشەندەرى مەن دەمالىس بازالارى قۇرىلىسىن سالۋ ءۇشىن ينۆەستورلار تارتۋعا مۇمكىندىك بەرەدى. 2-3 جۇلدىزدى, ياعني حالىققا قولجەتىمدى كەشەندەر سالۋ قارالىپ, قازىرگى تاڭدا اقتاۋ قالاسى اكىمدىگى جوبالىق-سمەتالىق قۇجاتتامالاردى ازىرلەۋدە.
شوپان اتا, بەكەت اتا كيەلى ورىندارى جۇمىس جۇرگىزۋدەگى ەكىنشى باعىت بولىپ تاڭدالدى. جۇمىس بارىسىندا بەكەت اتاعا دەيىنگى 100 شاقىرىمدىق جول ۋچاسكەسىن اسفالتتاۋ باستالدى. بۇل جولدىڭ 0-51 شاقىرىمدىق ارالىعىن جوندەۋ ءۇشىن رەسپۋبليكالىق بيۋدجەتتەن 1 ملرد تەڭگە ءبولىندى, جالپى جۇمىستىڭ ءبىرىنشى كەزەڭى دەپ اتالعان بۇل كەزەڭ 2019 جىلدىڭ قاراشا ايىندا اياقتالماق.
ءۇشىنشى ايماق – ماڭعىستاۋ جانە تۇپقاراعان اۋداندارىنىڭ اۋماقتارى. بۇل باعىتتاعى ءبىرىنشى كەزەڭدە شەرقالا تاۋى, وتپان تاۋ, كوگەز ەتنواۋىلى, تورىشتىڭ شار ءتارىزدى كونكرەتسيالارى, جىعىلعان, فورت-شەۆچەنكو قالاسىنداعى مۇرىن جىراۋ مۇراجايىنا بارۋ مۇمكىندىكتەرى كەڭەيتىلىپ, نىساندارعا جولدار سالۋ, ەلەكتر جۇيەسىن تارتىپ, سۋمەن قامتاماسىز ەتۋ جوسپارلانعان. ال تامشالى, سامال, ساۋرا, كوگىلدىر ايلاق ەكىنشى كەزەڭ جۇمىسىنا ەنگىزىلگەن. اتالعان جوبالاردى جۇزەگە اسىرۋ ءۇشىن 10 ملرد-تان استام تەڭگە قاجەت ەكەن.
ماڭعىستاۋ ءتۋريزمىن جاڭاشا تۇلەتۋ – زامان تالابى. سوندىقتان سالاداعى جۇمىستاردىڭ جاندانىپ, قارقىن الا تۇسكەنى كوڭىل قۋانتادى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
