كوپتەن كۇتكەن ونەر جارمەڭكەسىنە وتاندىق سۋرەتشىلەرمەن قوسا برازيليا, اقش, ەۋروپا, رەسەي, جاپونيا, ءۇندىستان سىندى الەم ەلدەرىنەن داڭقتى قىلقالام شەبەرلەرى ارنايى شاقىرىلعان. ولاردىڭ قاتارىندا ۇلىبريتانيانىڭ كورولدىك ونەر قاۋىمىنىڭ مۇشەسى الەكساندرا كوننور, جاپونيانىڭ اكۆارەلمەن بەينەلەۋ ونەرىنىڭ حاس شەبەرى اكيرا مۋراتا, برازيلياداعى پانامەريكا ونەر مەكتەبىنىڭ تالىمگەرى جيزەل ۋليسس, ءۇندىستاننىڭ زاماناۋي كوركەمونەر شەبەرى رام ۆيرانيان, اقش ۇلتتىق ونەر گرانتىنىڭ يەگەرى ارتەم ميرولەۆيچ, گوللانديانىڭ رەتروسپەكتيۆالىق كوركەمونەر شەبەرى ديميتريس ۆويازوگلوۋ, سونىمەن قاتار گۇلميرا تەلعوزيەۆا, باقتىگەرەي تەلەۋباي, امانگەلدى كەنەنباەۆ, نۇربازار قوجين, قايىر ورازعاليەۆ, اينابەك وسپانوۆ, تىلەۋجان باتانوۆ سىندى وتاندىق سۋرەتشىلەر دە بار.
قىلقالام شەبەرلەرىن ءبىر ونەر ورداسىنا جيناعان كوركەمونەر فەستيۆالى قارساڭىندا ەلورداعا كەلگەن العاشقى مەيماندار ءوز ويلارىن ءبىلدىردى. ماسەلەن, ءۇندىستاننان ات باسىن بۇرعان اكۆارەلمەن بەينەلەۋ ونەرىنىڭ شەبەرى رام ۆيرانيان: «20 جىل كوپ ۋاقىت ەمەس. الايدا وسى مەرزىم ىشىندە ەلوردانىڭ ەڭسەرگەن جەتىستىكتەرى تاڭداي قاقتىرادى. كوركەمسۋرەت فەستيۆالىنەن تەك جارقىن ساتتەر مەن جاعىمدى اسەر الاتىنىما سەنىمدىمىن» دەسە, برازيليالىق سۋرەتشى جيزەل ۋليسس: «استانادان العان العاشقى اسەرىم كەرەمەت: حالقى قوناقجاي, قالا تازا ءارى زاماناۋي. استانانىڭ 20 جىلدىعى قارساڭىندا كۇننەن-كۇنگە وركەن جايىپ كەلە جاتقان شاھاردى ءوز كوزىممەن كورگەنىمە وتە قۋانىشتىمىن», دەپ لەبىزىن جەتكىزدى.
ەلوردانىڭ 20 جىلدىق تاريxىن, مادەني جەتىستىكتەرى مەن قوناقجاي xالقىن تانىستىرۋعا باعىتتالعان كوركەمسۋرەت مەرەكەسى اياسىندا وتاندىق جانە شەتەلدىك شەبەرلەر جازدىڭ جايماشۋاق كۇندەرىندە جەكە قالاۋلارى بويىنشا استانانىڭ كورىكتى جەرلەرىن كەنەپ بەتىندە كومكەرمەك. اتالعان كوركەمسۋرەت فەستيۆالى ۇلتتىق مۋزەيدە ۇيىمداستىرىلادى. سونداي-اق قىلقالام شەبەرلەرى وقۋشىلار سارايىندا جانە قازاق ۇلتتىق ونەر ۋنيۆەرسيتەتىنىڭ قابىرعاسىندا دەگدار ونەرگە قىزىعاتىن دارىندى تالىمگەرلەر ءۇشىن شەبەرلىك ساباقتارىن وتكىزبەك. فەستيۆال 12 ماۋسىمدا باس-
تالىپ, اي سوڭىنا دەيىن جالعاسىن تابادى. تانىمى تەرەڭ, تالعامى بيىك كورەرمەن ءۇشىن شەتەلدىك شەبەرلەردى شابىتتاندىرعان اسەم شاھاردى وزگە قىرىنان تاماشالاۋدىڭ تاپتىرماس مۇمكىندىگى تۋىپ وتىر.
ارمان وكتيابر,
«ەگەمەن قازاقستان»
