سازگەردىڭ سىرلى الەمى

ايگۇل دوسماعامبەتوۆا ت ۇلىمشاعى جەلبىرەگەن كۇننەن ونەرگە قۇمار بولىپ ءوستى. مەكتەپ قابىر­عاسىندا وقىپ جۇرگەندە مۋزىكالىق ستۋديادا فورتەپيانو كلاسى بويىنشا ءبىلىم الدى. باعدارلامادان تىس مۋزىكالىق ءۇيىر­مەلەرگە قاتىسا ءجۇرىپ, قولى قالت ەتكەن ساتتەردە پيانينو كابينەتىنە قاراي تۇرا جۇگىرەتىن. وڭاشادا مۋزىكا الەمىنىڭ نەبىر تۇڭعيىق سىرلارىنا بەرىلىپ, وي ساياحاتىن كەشكەندى ۇناتاتىن. سونداي ساتتەردە بويىن الدەبىر سەزىم شارپىپ, تىنىم بەرمەيتىن. سويتسە, شابىت ۇشقىن­دارى ەكەن عوي. مەكتەپ بىتىرگەن سوڭ كوپ ويلانعان جوق. بىردەن پ.ي.چايكوۆسكي اتىنداعى مۋزىكا­لىق كوللەدجگە تارتتى. سوسىن قۇرمان­عازى اتىنداعى الماتى مەملەكەتتىك كون­سەر­ۆاتورياسىنىڭ حور ديريجەرى كلاسىن ءبىتىردى. بازارعالي جامانباەۆ, اناتولي مولودوۆ, ۆيتالي ورلەنين, تامارا اليباكيەۆا, قورلان مۋسينا سەكىلدى بىلىكتى پروفەسسورلار مەن كاسىبي مامانداردان ءتالىم الىپ, دومبىرانىڭ قوس شەگى ىسپەتتەس تەوريالىق ءبىلىم مەن تاجىريبەگە قاتار شىڭدالىپ شىقتى. سودان بەرى ءومىرى جاس بالعىنداردان اجى­راعان ەمەس. العا قويعان ارمان-ماقسات ادامعا بىردەن جەتكىزە قويۋ­شى ما ەدى. الىستان مۇنارلانعان الدامشى ساعىم قۇساپ, ونىڭ بۇرالاڭ جولدارى كوپ بولاتىنىن ايگۇل العاش­قىدا البىرت­تىقپەن بايقاماپتى. الما­­تىداعى جىلى تۇراعىن وتباسىمەن كوكشە­تاۋ قالاسىنا ايىرباستاپ, تاۋەكەلگە بەل بۋى سوندىقتان ەدى. تەرىسكەيدەگى جەر جانناتىنا كەلىپ ەدى, ەكىنشى تىنىسى اشى­لىپ سالا بەرگەندەي بولدى. حالقى­مىزدىڭ باعا جەتپەس اسىل مۇرالارىن ناسيحاتتاۋ, سالت-داستۇرلە­رى­مىزدى جان-جاقتى دارىپتەۋ شارالارىنا بەلسەنە كىرىسىپ كەتتى. جەتكىنشەكتەرگە ارناپ اندەر جازىپ, وڭدەپ, بىرنەشە ديسك جينا­عىن شىعارىپ ۇلگەردى. قىزىعى مەن شىجىعى قاتار جۇرەتىن تىنىمسىز ەڭبەكتىڭ قادىر-قاسيەتىن ۇعىن­عانعا نە جەتسىن! «زۆونوچەك» بالالار باقشاسىنداعى جاس قايىڭداي جەلكىلدەپ ءوسىپ كەلە جاتقان ءبىر توپ بۇلدىرشىندەردىڭ باسىن قوسىپ, دومبىرا توبىن ۇيىمداس­تىرعان بولاتىن. سول كەزدەگى كوڭىلدەگى قوبالجۋدى ايتىپ جەتكىزۋ قيىن. نەبىر سەكەمشىل ويلار كوڭىل تۇكپىرىنە قامالىپ, جانىن جەگىدەي جەگەن كۇندەر قۇرساۋلاپ الدى. قالالىق بايقاۋدا ونىڭ جەتەكشىلىگىندەگى دومبىراشىلار ءبىرىنشى ورىندى جەڭىپ العاندا سەنەر-سەنبەسىن بىلمەي قاتتى تولقىعانى راس. ىلە-شالا ول باپ­تاعان گۋمانيتارلىق-تەحنيكالىق ليتسەيدىڭ ۇل-قىزدارىنان قۇرالعان دومبىراشىلار ءانسامبلى «قازاعىمنىڭ ءۇنى سەنسىڭ, دوم­بىرا!» اتتى كونكۋرستا لاۋرەات اتانعاندا بويىندا وزىنە دەگەن ۇلكەن سەنىم ورنىقتى. ماڭداي تەردىڭ وتەۋى دەگەن وسى! قۋانىش قۇشاعىنان ايىعا الماي ءجۇر­گەندە استانا قالاسىنداعى №1 مۋزىكالىق بالالار مەكتەبىنەن العىس حات الدى. وندا ونىڭ باسقارۋىنداعى «ولەڭ» مۋزىكا-باسپا ستۋدياسىنا جىلى لەبىز ارنالعان ەكەن. جەتكىنشەكتەردى ونەرگە باۋلىپ, اۆتورلىق اندەر جازعانى, وڭدەپ, جيناق شىعارعانى ءۇشىن شىعارماشىلىق ساتتىلىك تىلەپتى. «جاقسى ءسوز – جارىم ىرىس», دەگەن. تانىپ-بىلمەيتىن ۇجىمنىڭ وزىنە جولداعان ىستىق ىقىلاسى قانات ءبىتىردى. ايگۇلگە جەكە ستۋديا اشۋ وڭاي بولعان جوق.تالاي قيىندىقتارعا كەزىكتى. العاش­قى كەزدەرى دىبىستى جازىپ, وڭدەيتىن تەحنيكالىق قۇرال-جابدىقتار وڭايلىقپەن تاپتىرا قويمادى. بىراق قايسار مىنەزى, العا قويعان ماقساتكەرلىگى ارقاسىندا كەسە-كولدەنەڭ تۇرعان كەدەرگىلەردى جەڭىپ شىقتى. بۇگىندە ستۋديانىڭ ءان ديسكىلەرىنە سۇرانىس وتە كوپ. بالاباقشالاردان, مەكتەپتەردەن تاپسىرىس ۇزبەي ءتۇسىپ جاتادى. ول قازىر انمەن قوسا دومبىرا كلاسىنا دا ساباق بەرەدى. وسى ءۇشىن فيلارمونيادان جانە قازاق مۋزىكالىق كومەديا تەاترىنان جۇمىستان شىعىپ, بالاباقشا مەن مەكتەپكە ورنالاستى. ونىڭ بالا كەزگى ارمانى وسىلاي ورىندالدى. جاس بۇلدىرشىندەردى قازاقتىڭ قاسيەتتى دومبىراسىنىڭ تىلسىم سىرىنا باۋلۋ ءۇشىن ءوزى دە تارتۋدى ءبىر كىسىدەي مەڭگەرىپ الدى. ايگۇل قايىرجانقىزى ءوزىنىڭ پەداگو­گيكا­لىق قىزمەتىندە اركەز شەتەلدىك وزىق تاجىريبەلەرگە دە سۇيەنىپ وتىرادى. ماسە­لەن, ماريا مونتەسسوريدىڭ الدىمەن جازۋ, سوسىن وقۋ دەگەن ۇلگىسىنە دەن قويسا, ۆالدورفتىڭ شىعارماشىلىق ەركىندىگى قاتتى قىزىقتى­رادى. ال, سەلەستەنا فرە­نەنىڭ بالالارعا ۇلكەندەرشە قاراۋ, ءوزارا قارىم-قاتىناستاعى سىيلاسىمدىلىق ۇس­تا­نىمى ءتانتى ەتەدى. وسىنداي ۇلگى الار­لىق تاعىلىمداردى وي ەلە­گىنەن وتكىزە كەلىپ, ءوزىنىڭ جەكە ءتاجىري­بەسىندە شىعارما­شىلىق, ويلاۋ داعدىسىن قالىپتاستىرۋعا كۇش سالادى. سازگەرلىك ونىڭ بويىنا باق بولىپ قونعان. سوڭعى كەزدەرى ديسكىلەردى مەملەكەتتىك تىلدە شىعارۋدى ۇردىسكە اينالدىرا باستادى. ول قۇراستىرعان ديسكىلەر مەن اندەردىڭ بالاباقشا ەرتەڭگىلىكتەرىندە, ءتۇر­لى كونتسەرتتەردە شىرقالماعان كەزى جوق. تەاترلاندىرىلعان ەرتەگىلەر جازىل­عان ديسكىلەرمەن تۇتاس دىبىستىق سپەكتاكلدەر شىعارۋ دا ءوز جەمىسىن بەرىپ كەلەدى. ماسەلەن, تاياۋدا «تىڭدايمىز, سۋرەت سالامىز, ويلاۋ­دى دامىتامىز» سەرياسى اياسىندا ونىڭ قازاق ەرتەگىسىنىڭ جەلىسىمەن جاساعان «بوتا­قان» ديسكىسى بۇلدىرشىندەر قولىنا ءتيدى. قازىر ستۋديا قىزمەتكەرلەرى ايگۇلدىڭ جەتەكشىلىگىمەن جاڭاجىلدىق ديسك ءازىر­لەۋگە كىرىسىپ كەتكەن. ول يننوۆاتسيالىق تەحنولوگيا نەگىزىندە جاسالىپ, «الەمدىك كلاس­سيكانىڭ بەينەكوللەكتسياسى» دەگەن سەريالمەن تارا­لاتىن بولادى. وندا قازاق, ورىس جانە شەتەل مۋزىكالارىنىڭ انتو­لوگياسى توپتاستى­رىلىپ, جەرگىلىكتى كوم­پوزيتور­لاردىڭ اندەرى مەن ورىنداۋشى­لارىنا باسىمدىق بەرىلەدى. ايگۇل دوسماعامبەتوۆا 3D فورماتتاعى جاڭا مۋلتفيلمدەر ءتۇسىرۋ قاجەت دەپ سانايدى. ول ءوزىنىڭ اۋديەرتەگىلەرگە ءان جازۋ ءتا­جىريبەسىنە سۇيەنە وتى­رىپ مۋلتفيلم جاساۋشىلارمەن تىعىز ارىپتەس­تىك بايلانىس ورناتقان. وسىلايشا, سازگەردىڭ سىرلى الەمى ونەردىڭ نەبىر تۇرلەرىمەن توعىسىپ, بۇگىنگى ۋاقىت تى­نىسىن بەينەلەپ جاتقانى انىق اڭعارىلادى. ءومىر ەسقالي, كوكشەتاۋ.