بۇل فورۋم 2011 جىلدان بەرى وتكىزىلىپ كەلەدى. ونىڭ ماقساتى – تەحنولوگيالىق جانە الەۋمەتتىك وزگەرىستەر تۇرعىسىنان ءبىلىم بەرۋ سەكتورىن تالقىلاۋ.
فورۋم جۇمىسىنا ۇلتتىق جانە الەمدىك ساراپشىلار, عىلىمي قىزمەتكەرلەر, مەملەكەتتىك ورگانداردىڭ, جۇمىس بەرۋشىلەردىڭ, ءبىلىم سالاسىنداعى قوعامدىق بىرلەستىكتەردىڭ وكىلدەرى, سونداي-اق الەمنىڭ 15 ەلىنەن (اقش, رەسەي, قىتاي, ۇلىبريتانيا, كورەيا رەسپۋبليكاسى, اۆستراليا جانە ت.ب.) 150-دەن استام دەلەگات قاتىستى.
گۇلشارا ابدىقالىقوۆا قۇتتىقتاۋ سوزىندە بيىلعى فورۋمنىڭ قازاقستاننىڭ سيمۆولى – استانانىڭ 20 جىلدىق مەرەيتويى قارساڭىندا وتكىزىلىپ وتىرعانىن ايتتى.
مەملەكەتتىك حاتشى گ.ابدىقالىقوۆا ەلباسىنىڭ ءبىلىم بەرۋ جۇيەسىنىڭ جان-جاقتى دامۋىنا ايرىقشا كوڭىل بولەتىنىن اتاپ ءوتىپ, نۇرسۇلتان نازارباەۆتىڭ: «مەن ءاردايىم سىزدەردىڭ ءبىلىم الۋلارىڭىز بەن دامۋلارىڭىز ءۇشىن قاجەتتى بارلىق جاعدايدى جاساۋعا تىرىسىپ كەلەمىن. الەمدىك دەڭگەيدەگى ۋنيۆەرسيتەت, زياتكەرلىك مەكتەپتەرىن اشتىم, «بولاشاق» باعدارلاماسىن بەكىتتىم» دەگەن سوزىنە توقتالدى.
نازارباەۆ ۋنيۆەرسيتەتى – ەلىمىزدىڭ ماڭىزدى ۇلتتىق جوباسى. وسى وقۋ ورنى اشىلعاننان بەرى (2010 ج.) ونىڭ قابىرعاسىنان 2 مىڭعا جۋىق مامان تۇلەپ ۇشتى. ۋنيۆەرسيتەت بيوحيميالىق جانە يادرولىق ينجەنەريا, روبوتوتەحنيكا, مەحاترونيكا جانە باسقا دا سيرەك باعىتتار بويىنشا كادرلار دايارلايدى. مۇندا الەمنىڭ تۇپكىر-تۇپكىرىنەن كەلگەن ۇزدىك وقىتۋشىلار جۇمىس ىستەيدى جانە ەڭ زاماناۋي ماتەريالدىق-تەحنيكالىق قۇرالدارمەن, زەرتحانالارمەن جابدىقتالعان.
بۇگىندە نازارباەۆ ۋنيۆەرسيتەتى جاھاندىق دەڭگەيدەگى عىلىمي-ءبىلىم بەرۋ ورتالىعىنا اينالىپ, قىتاي, جاپونيا, كورەيا رەسپۋبليكاسى, سينگاپۋر جانە ازياداعى باسقا دا ەلدەردىڭ 14 جەتەكشى ۋنيۆەرسيتەتتەرىنىڭ قاتارىنا قوسىلدى.
– جوعارى وقۋ ورىندارى كەلەشەكتە ەڭبەك نارىعىنداعى باسەكەگە توتەپ بەرۋ ءۇشىن, ءبىلىمنىڭ ۇزدىك باعدارلامالارى بويىنشا وقىتىلعان جاڭا فورماتتاعى مامانداردى دايارلاۋعا ءتيىس, – دەدى مەملەكەتتىك حاتشى.
فورۋم سوڭىندا گۇلشارا ابدىقالىقوۆا جيىنعا قاتىسۋشىلاردىڭ سىندارلى سۇحبات قۇرىپ, تابىستى جۇمىس ىستەۋىنە تىلەكتەستىگىن ءبىلدىردى.
