سول وتىز ۇيدەن تاڭەرتەڭ, كەشكە وتىز ءتۇتىن بۋداقتاعاندا اۋىل ءۇستىن كادىمگىدەي بوزعىلت تۇمان باسىپ, جاپىرايعان جاتاعان ۇيلەردى كوگىلدىر پەردەگە وراپ, كوزدەن تاسالايدى».
قازاقستان رەسپۋبليكاسى مەملەكەتتىك سىيلىعىنىڭ لاۋرەاتى, كورنەكتى جازۋشى, دراماتۋرگ دۋلات يسابەكوۆتىڭ «تىنىشتىق كۇزەتشىسى» اتتى اڭگىمەسى مىنە, وسىنداي تاماشا سۋرەتپەن باستالادى. الگى اۋىلعا كەنەتتەن تاپ بولعان جولاۋشىداي ەرەكشە ءبىر اسەرگە بولەنەسىز.
راس, كەيىن وسى اڭگىمەنىڭ جەلىسى بويىنشا جازىلعان «كىشكەنتاي اۋىل» پەساسىنىڭ قويىلىمىن م.اۋەزوۆ اتىنداعى اكەمتەاتردىڭ ساحناسىنان تالاي رەت تاماشالادىق.
سوندا «قىر باسىنان قاراعاندا... الدەكىمنىڭ نە ارباسىنان, نە دورباسىنان ءتۇسىپ, شاشىلىپ قالعان اسىقتاي بىتىراپ جاتقان» اۋىلدىڭ تىنىشتىعىن كۇزەتىپ, تۇنىمەن كىرپىك ىلمەي, جاپادان-جالعىز ايعايلاپ, اسپانعا مىلتىق اتىپ جۇرەتىن كەڭكەلەس دەمەسىندى ءوز كوزىمىزبەن كورگەندەي بولدىق.
التى جاسار بالا كەزىندە اكە-شەشەسىن اق باندىلار كوز الدىندا اتىپ تاستاعاندا ەسى اۋىسىپ, ءومىر بويى كەڭكەلەس اتانىپ كەتكەن بەيشارا جاننىڭ اۋىر تاعدىرى الاساپىران تىرشىلىكتىڭ اششى شىندىعى رەتىندە وقىرمان جۇرەگىندە ءبىرجولا قالىپ قويدى.
بىردە كۇتپەگەن جەردەن دۋلات اعادان وسى اڭگىمەنىڭ تۋ تاريحىن سۇراپ قالعانىم بار-دى. سويتسەم, ونىڭ راسىندا دا, بىزگە بەيمالىم ميستيكالىق سىرى, ەستىپ-بىلگەن جاننىڭ ەسىندە ۇزاق ساقتالاتىنداي تىلسىم وقيعاسى بار ەكەن.
– ول اڭگىمە اۋەلى «قازاق ادەبيەتى» گازەتىندە جاريالاندى عوي, – دەدى جازۋشى ويلانىپ قالىپ. – وعان كوپ ادام پىكىر ايتتى. و كەزدە مەن اۋرۋحانادا جاتىر ەدىم. سيۋجەتىن تۇسىمدە كوردىم. وعان دەيىن دە سيۋجەتتى تۇستەر كورەتىنمىن دە, تۇندە تۇرىپ جازىپ قوياتىنمىن. بىراق ەرتەسىندە وقىعانىمدا ولار كەرەككە جارامايتىن بوپ شىعاتىن. بۇل جولى ولاي بولمادى. تاڭەرتەڭ وقىعانىمدا الگى سيۋجەت مەنى بىردەن جازۋعا وتىرعىزدى. جاڭاعى ءتۇسىم ءالى كۇنگە دەيىن كوز الدىمدا... مەن اۋرۋحانا پالاتاسىنىڭ قاق ورتاسىنداعى ۇستەل ۇستىندە جالعىز جاتىر ەكەنمىن-اۋ دەيمىن (سونىڭ الدىندا عانا دارىگەرلەر كوڭىل كۇيىمدى كۇرت تۇسىرەتىندەي اۋىر دياگنوز قويىپ, اسا ءبىر جايسىز جاعدايدى حابارلاپ ەدى). تۇسىمدە ۇستەلدى الدەكىم اينالىپ ءجۇر. «قورىقپا, مەن سەنى بارلىق بالەدەن قورعايمىن. قامىقپا!» دەيدى. «سەن كىمسىڭ؟» دەيمىن. «مەن سەنىڭ تىنىشتىعىڭدى كۇزەتۋشىمىن» دەيدى. ويانىپ كەتىپ, وسى ءتۇسىمدى جازىپ قويعانمىن. ودان ارعىسى بەلگىلى...
وسىدان سوڭ, قىمباتتى وقىرمان, مەنىڭ سانامدا: «تالانتتى جانداردى تابيعاتتىڭ ءوزى دە قورعايدى ەكەن-اۋ», دەگەن ءبىر وي مىقتاپ ورنىعىپ قالدى. ال تابيعات دەگەنىمىز – اللانىڭ مىڭ ەسىمىنىڭ ءبىرى ەمەس پە!
بىراق كەيدە... جۇلدىزداي جارقىراعان جاس دارىنداردىڭ دا بۇل پانيدەن زىمىراپ وتە شىعاتىنىن كورگەندە: «جاقسى كىسى اللاعا دا كەرەك», دەپ جۇباتامىز عوي ءوزىمىزدى.
قالاي بولعاندا دا, تارازى باسى تەڭ سياقتى...
نۇرعالي وراز,
«ەگەمەن قازاقستان»
