ويىنعا ەركەبۇلان سەيداحمەت قاتىسپايدى دەگەندى ەستىگەن كوپتەگەن كورەرمەن ءبىراز قىزىقتان قۇر قالىپ قويعانداي كۇي كەشتى. قاپتال ارقىلى سىتىلىپ ءوتىپ, قارسىلاستىڭ قورعانىسىنا لاپ قوياتىن جاس دارىن جاراقاتىنا بايلانىستى الاڭعا شىعا المادى. ول 19 ءساۋىر كۇنى «ۋفا» كومانداسىنىڭ ويىنىندا جاراقات الىپ قالعان ەدى. دەگەنمەن, ونىڭ ورنىنا الاڭعا شىققان ەركەبۇلان تۇڭعىشباەۆ تا ءتاپ-ءتاۋىر ونەر كورسەتتى. ال نەگىزگى شابۋىلشى رەتىندە ءبىرىنشى مينۋتتان الاڭعا الەكسەي ششەتكين شىقتى.
بۇرىندارى تەك ەكىنشى تايمدا الاڭعا شىعاتىن «استانا» شابۋىلشىسى نەگىزگى قۇرامداعى ورىندى امالسىزدان العان سەكىلدى. سەبەبى قازىر سەرگەي حيجنيچەنكو «ورداباسى» ساپىندا ءجوندى ويناي الماي ءجۇر. شىنىن ايتقاندا, كوماندا ىشىندەگى باسەكەلەستىكتە ول لەگيونەرلەرگە ورىن بەرىپ قويدى. ال ستويلوۆ فۋتبولشىنىڭ سىڭىرگەن ەڭبەگى مەن اتاق دارەجەسىنە مۇلدە قارامايدى. ء«دال قازىر كىم مىقتى ويناپ ءجۇر, سونىڭ بارلىعىن قۇراماعا شاقىردىم» دەگەن سوزىنەن ەش تانبادى. ال قالعان فۋتبولشىلاردىڭ بارلىعى ءوز ورنىنا جايعاستى.
ماتچ باستالا سالىسىمەن قازاقستان قۇراماسى ستاندارتتىق جاعدايلارعا كوپ كوڭىل ءبولدى. 15 مينۋتتىڭ ىشىندە 3 بۇرىشتاما كوتەرىپ, ءبىر ايىپ دوبىن ورىندادى. سول ايىپ دوبىنان تاماشا پاس كوتەرگەن باۋىرجان يسلامحان رومان مۇرتازاەۆتىڭ گول سوعۋىنا مۇمكىندىك جاسادى. ەسەپ 1:0.
ارتىنشا ىلە-شالا يسلامحان تاعى ءبىر كومبيناتسيالىق شابۋىل ۇيىمداستىرىپ, ونىڭ دا ناتيجەسى گولعا ۇلاستى. سەرىكجان مۇجىقوۆ شابۋىلعا نۇكتە قويىپ, ەسەپتى ەسەلەي ءتۇستى. ايتا كەتەيىك, بۇل سەرىكجاننىڭ ۇلتتىق قۇراما ساپىنداعى العاشقى گولى ەدى. 16 ويىندا سوققان ءبىرىنشى دوبى. جالپى العاندا مۇجىقوۆ ستويلوۆ باپكەردىڭ سىزباسىنداعى ماڭىزدى فۋتبولشىعا اينالعانىن بايقادىق. ورتادا يسلامحان مەن مۇجىقوۆ جۇبى بۇكىل شابۋىلدى باستادى. ال يسلامبەك قۋات كوبىنەسە قورعانىسقا جاۋاپ بەرىپ, قارسىلاس شابۋىلىنا تويتارىس بەرۋمەن اينالىستى.
ەكىنشى تايمدا دا بىرنەشە فۋتبولشى الماسىپ, بولگار باپكەرى قىزىقتى قادامدارعا باردى. الگى ەركەبۇلان سەيداحمەت وينايتىن وڭ قاپتالدا ونەر كورسەتكەن تۇڭعىشباەۆتى الماستىرىپ, ونىڭ ورنىنا گەورگي جۋكوۆتى كىرگىزدى. بىراق «قايرات» ويىنشىسى تەك ورتادا عانا ويناي الادى. ال وڭ قاپتالعا مۇجىقوۆ كەلدى. بىراق ساعاتقا جۋىق ويىن وتكەن تۇستا باپكەر سەرىكجاندى دا دەمالۋعا جىبەرىپ, ونىڭ ورنىنا باحتيەر زاينۋتدينوۆتى شىعاردى. جاس ويىنشى وڭ قاپتالدا ويناۋعا ءماجبۇر بولدى. ايتپەسە ونىڭ دا نەگىزگى ورنى ورتالىق الاڭ ەدى. زاينۋتدينوۆتىڭ وڭ قاپتالدا ماردىمدى ەشتەڭە بىتىرە الماسىن بايقاعان باپكەر يسلامحاندى الىپ, ورنىنا يان ۆوراگوۆسكيدى كىرگىزدى. سەبەبى ورتادا وينايتىن ويىنشىلار الاڭدا تورتەۋ بولىپ كەتتى. ال ۆوراگوۆسكي وڭ قاپتالدىڭ ويىنشىسى بولماسا دا, شەتكەرى تۇستا ەمىن-ەركىن قيمىلدايتىن قاسيەتى بار. نەگىزىنەن ول دا سول قاپتالدا وينايدى. ەكىنشى تايمدا وڭ قاپتالدا ءتورت فۋتبولشى ونەر كورسەتتى. تۇڭعىشباۆ, مۇجىقوۆ, زاينۋتدينوۆ, ۆوراگوۆسكي. بۇل ارينە ۇلتتىق قۇرامامىزدىڭ اقاۋلى تۇسى دەگەن ءسوز. ەرتەڭدەرى رەسمي ويىن وتكىزگەن شاقتا بۇلايشا ويىنشىلاردى الماستىرىپ وتىرۋ مۇمكىن ەمەس. سوندىقتان دا قازاقستان قۇراماسىنا وڭ قاپتالدا وينايتىن تاعى ءبىر ادام كەرەك دەگەن ءسوز.
ماتچتىڭ سوڭعى مينۋتىندا زاينۋتدينوۆ گول سوعىپ, 3:0 ناتيجەسىن تىركەدى. بۇل ەسەپ «استانا ارەناعا» جينالعان 22 مىڭ جانكۇيەردىڭ كوڭىلىن ودان ءارى شالقىتىپ تاستادى. جامبىل فۋتبولىنىڭ وكىلى ءوزىنىڭ 3 ويىنىندا 2-گولىن سوعىپ وتىر.
باقتيەر زاينۋتدينوۆ,
قازاقستان قۇراماسىنىڭ ويىنشىسى:
– كومانداداعى تاجىريبيەلى ويىنشىلار ماعان كوپ اقىل ايتىپ, ۇنەمى قولداپ وتىرادى. سونىڭ ارقاسىندا سەنىمدى وينادىم. ەسەپتە العا شىعىپ تۇرعان سوڭ, اياقتاعى دوپتى ەش ويلانباس-
تان قاقپاعا تەبە سالدىم. كەزەكتى گولىمدى سوققانىما ريزامىن. ستانيمير ستويلوۆ كەلگەلى بەرى قۇرامانىڭ ويىنى جاندانا ءتۇستى دەگەن پىكىرمەن تولىق كەلىسەمىن.
ستانيمير ستويلوۆ, قازاقستان قۇراماسىنىڭ باس باپكەرى:
– بارشا قازاق جانكۇيەرلەرىن جەڭىسپەن قۇتتىقتايمىن. مەنىڭ فۋتبولشىلارىم جاقسى دەڭگەيدە دوپ تەبە الاتىنىن دالەلدەدى. ەندى 6 قىركۇيەكتە بولاتىن گرۋزياعا قارسى ويىنعا دايىندالامىز. «استانا ارەنادا» ۇلتتار ليگاسىنىڭ ماتچىن جەڭىسپەن باستاۋىمىز كەرەك. ال وعان دەيىن ەشقانداي جولداستىق ماتچ وتپەيتىندىكتەن, فۋتبولشىلاردىڭ ەۋروكۋبوكتە كورسەتەتىن ويىنىنا كوپ نازار سالامىز.
ەرمۇحامەد ماۋلەن,
«ەگەمەن قازاقستان»
