سوڭعى ەلۋ جىلداعى ۇزدىك بەس روماندى قازىلار القاسىنداعى بەس ادام سارالاعان. ولار: جازۋشى, رەداكتور روبەرت ماككرۋم 1971 جىلعى سىيلىقتىڭ يەگەرى ۆيديادحار نايپاۋلدىڭ «ەركىن ەلدە» رومانىن, اقىن لەمن سيسەي 1987 جىلعى جەڭىمپاز پەنەلوپا ءلايۆليدىڭ «اي بارىسى» رومانىن, رومانيست كاميل شامسي 1992 جىلى بۋكەر سىيلىعىنا لايىق بولعان مايكل ونداتجەنىڭ «اعىلشىن پاتسيەنت» رومانىن, رومانيست, تەلەجۇرگىزۋشى سايمون مايو حيلاري مانتەلدىڭ 2009 جىلى ۇزدىك دەپ تانىلعان «ارلان الاڭى» رومانىن جانە اقىن حوللي ماكنيش بىلتىرعى جەڭىمپاز دجوردج سوندەرستىڭ «باردوداعى لينكولن» رومانىن ۇزدىك دەپ تاپقان.
بۋكەر سىيلىعى قورىنىڭ باسشىسى, بارونەسسا حەلەنا كەننەديدىڭ پىكىرىنشە, بۇل قىسقا ءتىزىم بۋكەر سىيلىعىنىڭ ەڭ ۇزدىك كوركەم شىعارماعا بەرىلەتىنىن ايعاقتايدى. وسى ءتىزىمنىڭ ىشىنەن جەڭىمپاز سىيلىقتىڭ ۆەب-سايتىندا 26 مامىر مەن 25 ماۋسىم ارالىعىندا داۋىس بەرۋ ارقىلى انىقتالادى. جەڭىمپازدى بۋكەر سىيلىعىنىڭ ەلۋ جىلدىعىنا ارنالعان 6-8 شىلدە ارالىعىندا لوندوندا وتەتىن جابىق فەستيۆالدا جاريالايدى. التىن بۋكەردىڭ يەگەرى كىم بولارىن استانا كۇنىندە بىلەتىن بولامىز.
حالىقارالىق بۋكەر سىيلىعى 2005 جىلدان باستاپ بۋكەر سىيلىعىنا قوسىمشا رەتىندە بولەك سىيلىق بولىپ تابىستالىپ كەلەدى.سىيلىق اعىلشىن تىلىنە اۋدارىلىپ, بريتانيادا جارىق كورگەن روماندارعا بەرىلەدى.
2018 جىلعى ماۋسىمنىڭ ۇزدىك جازۋشىسى لوندونداعى ۆيكتوريا مەن البەرت مۋزەيىندە انىقتالدى. پولياك جازۋشىسى, اقىنى ولگا توكارچۋك سىيلىق لاۋرەاتى اتاندى. «بەگۋنى» رومانىن اعىلشىن تىلىنە اۋدارعان – دجەننيفەر كروفت. سىيلىقتىڭ شارتى بويىنشى 67 مىڭ اقش دوللارى بولاتىن سىياقى اۆتور مەن اۋدارماشىنىڭ اراسىندا تەڭدەي بولىنەدى.
ولگا توكارچۋك پولشادا تانىمال, بىرنەشە بەستسەللەردىڭ اۆتورى. حالىقارالىق بۋكەر سىيلىعىن العان تۇڭعىش پولياك جازۋشىسى بولىپ وتىر. ۆارشاۆا ۋنيۆەرسيتەتىندە پسيحولوگ ماماندىعىن العان ولگانىڭ شىعارماشىلعىنا يۋنگتىڭ اسەرى بايقالادى. العاشقى ولەڭدەر جيناعى 1989 جىلى جارىق كورگەن. وسى كۇنى 8 روماننىڭ, 2 اڭگىمەلەر جيناعىنىڭ اۆتورى. جازۋشىلىقپەن قوسا جىل سايىن ءوزى تۇراتىن تومەنگى سيلەزيادا ادەبي بۋتيك فەستيۆالىن ۇيىمداستىرادى.
اۋدارماشى دجەننيفەر كروفت پولياك, ۋكراين, يسپان تىلدەرىنەن ەركىن اۋدارما جاسايدى. كوركەم اۋدارما ماماندىعى بويىنشا ايوۆا شتاتىنىڭ ۋنيۆەرسيتەتىن تامامداعان.
دايىنداعان باعاشار تۇرسىنباي ۇلى,
«ەگەمەن قازاقستان»
