ماڭىزدى جيىنعا دەنساۋلىق ساقتاۋ ۆيتسە-ءمينيسترى الەكسەي تسوي, پارلامەنت ءماجىلىسىنىڭ دەپۋتاتتارى, «نۇر وتان» پارتياسى مۇشەلەرى, دۇنيەجۇزىلىك بانك ساراپشىلارىنىڭ, ەلىمىزدەگى ۇەۇ مەن رەسەي وكىلدەرى قاتىستى. وتىرىستى اشىپ بەرگەن ۆيتسە-مينيستر قازاقستان سوڭعى 10 جىلدا تەمەكىگە قارسى كۇرەس پروتسەسىندە بەلگىلى جەتىستىكتەرگە قول جەتكىزگەندىگىن اتاپ ءوتتى.
ەلباسى ءوزىنىڭ بيىلعى جولداۋىندا قازىرگى دەنساۋلىق ساقتاۋ ءىسى قىمباتقا تۇسەتىن ستاتسيونارلىق ەمگە ەمەس, نەگىزىنەن اۋرۋدىڭ الدىن الۋعا باعىتتالۋعا تيىستىگىن, سونداي-اق سالاماتتى ءومىر سالتىن ناسيحاتتاي وتىرىپ, قوعامدىق دەنساۋلىقتى باسقارۋ ءىسىن كۇشەيتۋ كەرەكتىگىن, جاستاردىڭ رەپرودۋكتيۆتى دەنساۋلىعىن قورعاۋعا جانە نىعايتۋعا ەرەكشە نازار اۋدارۋ قاجەتتىگىن ايتقان بولاتىن. «ەلباسىنىڭ جولداۋىن ىسكە اسىرۋ ءۇشىن 2018-2021 جىلدارعا ارنالعان قوعامدىق دەنساۋلىقتى باسقارۋ جونىندەگى ءىس-شارالار جوسپارى بەكىتىلگەن», دەدى ۆيتسە-مينيستر.
ددۇ دەرەكتەرى بويىنشا الەمدە شامامەن مەرزىمىنەن بۇرىن ورىن الاتىن ءولىمنىڭ 80 پايىزى اناعۇرلىم كەڭ تاراعان قاۋىپتى ءتورت فاكتورمەن بايلانىستى, ياعني تەمەكى شەگۋ جانە الكوگول قولدانۋ, دۇرىس تاماقتانباۋ, سونداي-اق از فيزيكالىق بەلسەندىلىك. وسىعان وراي دەنساۋلىق ساقتاۋ مينيسترلىگى 2018-2021 جىلدارعا ارنالعان قوعامدىق دەنساۋلىقتى باسقارۋ جونىندەگى ءىس-شارالار جوسپارىن ىسكە اسىرۋ شەڭبەرىندە حالىق دەنساۋلىعىنا قاۋىپ توندىرەتىن مىنەز-ق ۇلىق فاكتورلارىنىڭ اسەرىن تومەندەتۋگە باعىتتالعان شارالاردى ىسكە اسىرۋدى كوزدەيتىندىگىن ايتقان بولاتىن.
وعان قوسا, ۆيتسە-مينيستر قازاقستاندا تەمەكى جارناماسىنا تىيىم سالۋ پراكتيكاسى ەنگىزىلگەنىن, اۋرۋحانالاردىڭ, جۇمىس ورىندارىنىڭ, مەكتەپتەردىڭ, قوعامدىق كولىكتى قوسا العانداعى قوعامدىق وبەكتىلەردىڭ تەمەكى تۇتىنىنەن 100 پايىز ارىلعاندىعىن اتاپ ءوتتى. سونىمەن قاتار ۆيتسە-مينيستر ءوز سوزىندە تەمەكى ونىمىنە سالىناتىن سالىق بولشەكتەپ ساۋدالاۋ قۇنىنىڭ 40 پايىزىن قۇرايتىنىن, تەمەكىنى تاستاۋعا تىلەك بىلدىرگەن ادامدارعا تەگىن قىزمەتتەر كورسەتىلەتىنىن جەتكىزدى.
كەڭەسكە قاتىسۋشىلار تالقىلاۋ بارىسىندا باسقا ەلدەردىڭ تاجىريبەسىن ەسكەرە وتىرىپ, قازاقستان رەسپۋبليكاسىنداعى مۇددەلى مەملەكەتتىك ورگاندار مەن قوعامداستىقتاردىڭ ۇيلەستىرىلگەن ءىس-قيمىلدارى ارقىلى نەگىزگى ينفەكتسيالىق ەمەس اۋرۋلاردى پروفيلاكتيكالاۋ ماقساتىندا دەنساۋلىققا اسەرىن تيگىزەتىن زياندى ونىمدەردى ازايتۋ بويىنشا قوسىمشا شارالاردى ەنگىزۋ مۇمكىندىگىن پايدالانۋ قاجەت دەگەن پىكىرگە كەلدى.
ميراس اسان,
«ەگەمەن قازاقستان»
