«استانا» دراماسىندا ارقا توسىنەن عاجايىپ قالا سالعان ەلباسىنىڭ قاھارماندىعى, توقىراۋ جىلدارىندا توسىرقاپ قالماي, ەلىن تىعىرىقتان امان-ەسەن الىپ شىققان تىنىمسىز ەڭبەگى مەن ەرلىگى, قايراتكەرلىك قاسيەتتەرى ناقتى تاريحي وقيعالار نەگىزىندە شيراتىلا وتىرىپ, ۇيعىر تەاترىنىڭ ساحناسىندا العاش رەت كەلىستى كوركەم بەينە رەتىندە ۇسىنىلدى. سپەكتاكل استانانىڭ 20 جىلدىق مەرەكەسىنە ورايلاستىرىلا قويىلىپ وتىر. بۇل سپەكتاكل ۇيعىر تەاترىنىڭ, سول تەاتردا ەڭبەك ەتەتىن ۇيعىر ونەر ۇجىمىنىڭ استاناعا عانا ەمەس, تۇتاس قازاق ەلىنە ريزاشىلىعىنىڭ, ىزەت كوڭىلىنىڭ دالەلى ىسپەتتەس.
جازىق دالاداعى شاعىن قالانى شىرايلى شاھارعا اينالدىرىپ, استانا جاساۋ يدەياسى پرەزيدەنتتىڭ پەرزەنتتىك جۇرەگىنەن ابدەن ءيى قانىپ شىندىققا اينالعانىن دراماتۋرگ پەن رەجيسسەر شەبەرلىگىمەن جاسالعان ۇتىمدى شتريح, سەنىمدى دەتال, تولىمدى ديالوگتار دالەلدەي تۇسەدى. العاشقى الاساپىران كەزدەگى اۋىرتپالىقتار تۋرالى كوبىرەك ويلاپ, كەۋدەسىندە تۇنعان اڭسارلى ارمانىنا ۇنەمى الاڭداپ جۇرسە دە, «جەتى رەت ولشەپ, ءبىر رەت كەسەتىن» مىنەزىمەن كەيىنگە ىسىراتىن تەرەڭ تولعانىسىن اۆتور اسەرلى سۋرەتتەيدى. قويىلىم باستان-اياق استانا قالاسىنىڭ وركەندەۋىن ەلباسى اتىمەن بايلانىستىرا قارايدى. اينالاسىنداعى قارسىلىقتارعا قاراماستان قازاق ەلىنىڭ كەلەشەگى ءۇشىن تاريحي تاعدىرلى شەشىم قابىلداۋى ناعىز قاھارماننىڭ ءىسى ەكەنىن كوركەم شەجىرەمەن كورسەتەدى. تۇعىرىنا قالت-قۇلت ەتىپ قوناقتاپ جاتقان تاۋەلسىزدىكتىڭ بۇلتارتپاس ايعاعى, «دالەلى – مىناۋ» دەگىزەتىن ناقتى مىسالى, كەيىنگى جىلدارداعى ايبار-ايبىنى الاتاۋدان ارقاعا بەت تۇزەگەن ۇلى كوشتىڭ كەرۋەنىندە جاتقانىن كورەرمەن دە بار ج ۇلىن-جۇيكەسىمەن سەزىپ وتىرادى.
ۇيعىر ادەبيەتىنىڭ كورنەكتى وكىلى ا.ءاشيريدىڭ جاڭا پەساسى جيىرما جىل بۇرىنعى استانانىڭ تۇرعىزىلۋ تاريحىنا شەگىنىس-شولۋ جاساي وتىرىپ, تەاتر مەن ونىڭ كورەرمەندەرىنە ەلباسىنىڭ كوركەم تاسىلمەن بايىتىلعان جاڭا شىنايى وبرازىن سىيلادى. سپەكتاكلدىڭ پرەمەراسىنا كەلىپ قاتىسقان مادەنيەت جانە سپورت ءمينيسترى ارىستانبەك مۇحامەدي ۇلى رەسپۋبليكا تەاتر ساحنالارى دايىنداپ جاتقان تارتۋ-تۋىندىلاردىڭ ىشىندە «استانا» قويىلىمىنىڭ ايىرىقشا بولعانىن اتاپ ءوتتى. «بۇگىنگى سپەكتاكل ءۇشىن مۇرات احماديەۆ پەن احمەتجان اشيريگە راحمەتىمدى ايتامىن. راس, تاماشالاعان سپەكتاكلدىڭ سالماعىنىڭ زور ەكەنىن ەرەكشە اتاپ وتكەنىمىز ورىندى. سەبەبى تاۋەلسىزدىكتىڭ ەلەڭ-الاڭىنداعى اۋىر كەزەڭنىڭ شىندىعىن كورسەتۋ وڭاي ەمەس. م.احماديەۆتىڭ كاسىبي شەبەرلىگىنىڭ ارقاسىندا ۇيعىر تەاترى بۇل يدەيانى جۇزەگە اسىرا الدى. الدا استانانىڭ 20 جىلدىعى اياسىندا ۇيعىر مەملەكەتتىك اكادەميالىق دراما تەاترىنىڭ حالىقارالىق گاسترولىن ۇيىمداستىرۋ ءىسى جوسپاردا تۇرعانىن, تەاتردىڭ تاياۋ ۋاقىتتا كۇردەلى جوندەۋدەن وتكىزىلەتىنىن ايتىپ, سىزدەردى قۋانتقىم كەلەدى», دەدى مينيستر ا.مۇحامەدي ۇلى.
ايگۇل احانبايقىزى,
«ەگەمەن قازاقستان»
الماتى
