ءمينيستردىڭ ايتۋىنشا, 2018 جىلدىڭ باسىنان بەرى ءولىم قاۋپى جوعارى باكتەريالىق مەنينگوكوكك ينفەكتسياسى كۇدىگىمەن 593 ادام قارالعان جانە 213 ادام ەمدەۋگە جاتقىزىلعان. ولاردىڭ اراسىندا 58 ناۋقاستان مەنينگوكوكك ينفەكتسياسى راستالدى. ناۋقاستار اراسىندا 14 جاسقا دەيىنگى بالالار سانى - 21. بۇگىنگە دەيىن ون ادام ەمدەپ شىعارىلدى جانە 55 ناۋقاس ەم الىپ جاتىر.
«اتالعان سىرقاتتان 13 ادام قايتىس بولدى: الماتى وبلىسىندا - 4, قىزىلوردا وبلىسىندا - 1, وقو - 2, الماتى قالاسى - 6 ادام. وكىنىشكە قاراي, قايتىس بولعاندار اراسىندا التى بالا بار», دەدى مينيستر.
سونداي-اق, ول مەنينگيتپەن كۇرەس بويىنشا ارنايى شتاب قۇرىلعانىن حابارلاپ, پرەمەر-مينيستردەن شتاب جۇمىسىنا كومەك بەرۋدى سۇرادى.
«قۇرمەتتى باقىتجان ءابدىر ۇلى, وبلىس اكىمدەرىنە, دەنساۋلىق ساقتاۋ باسقارمالارىنىڭ وڭىرلىك شتابتارىنىڭ ءتيىستى جۇمىسىن جانە بەكىتىلگەن رەسپۋبليكالىق شتابتىڭ جوسپارىن, تاپسىرمالارىن مۇلتىكسىز ورىنداۋدى قامتاماسىز ەتۋدى سۇرايمىن. سونىمەن بىرگە, قر جەدەل مەديتسينالىق كومەك كورسەتۋ تۋرالى قاعيدالارىن بەكىتۋ تۋرالى №450 بۇيرىققا سايكەس, كەزەك كۇتتىرمەيتىن جاعدايلار كەزىندە مەديتسينالىق كومەك جاقىن جەردەگى مەديتسينالىق ۇيىمدا كورسەتىلۋى ءتيىس. وبلىستاردىڭ ەمدەۋگە جاتقىزۋ ءتارتىبى تۋرالى بارلىق بۇيرىقتاردى دەنساۋلىق ساقتاۋ مينيسترلىگىنىڭ بۇيرىقتارىنا سايكەس كەلتىرىلۋى ءتيىس», دەدى مينيستر.
