سونداي-اق اتاۋلى جىل ءىت-بالالار الەمى, سالاماتتى بولاشاق جانە جەتىم بالالاردى قولداۋ جونىندەگى ءۇش تۇعىردان تۇرادى. وسى ورايدا روبوتتەحنيكا ورتالىقتارىن جابدىقتاۋ ءىسى قولعا الىنىپ, 150 سپورت جانە ويىن الاڭدارى جابدىقتالۋ ۇستىندە. قازىرگى كەزدە ايماقتا «اسەم» جىل بويى وقۋ-ساۋىقتىرۋ لاگەرىنىڭ, سال اۋرۋىنا جانە اۋتيزم دەرتىنە شالدىققان بالالارعا ارنالعان ورتالىقتاردىڭ قۇرىلىسى قارقىندى جۇرگىزىلۋدە. جوعارىدا اتاپ وتكەندەي, جىل باسىندا وبلىس اكىمى ب.ساپارباەۆ «باقىتتى بالا» جوباسىنا سايكەس جۇرگىزىلەتىن سان الۋان ءىس-شارالاردىڭ باسىم بولىگى 1 ماۋسىم – حالىقارالىق بالالاردى قورعاۋ كۇنىنە دەيىن سالتانات قۇراتىنىن جەتكىزگەن-ءدى. سولاي بولدى دا. ءسوز بەن ءىستىڭ بىرلىگىنە بۇدان ارتىق مىسالدى تاۋىپ ايتۋدىڭ ءوزى قيىن. ايتالىق اتالعان جوبا بالالاردىڭ الدىندا تۇرعان بارلىق وزەكتى ماسەلەلەردى شەشۋدى كوزدەسە, وسى ءىستىڭ ۇدەسىنەن شىعۋ ءۇشىن بەس ايدا بەس جىلعا تاتىرلىقتاي ءىس تىندىرىلدى دەسەك, ارتىق كەتە قويماسپىز. اسىرەسە كەلەشەك ۇرپاق وكىلدەرىنىڭ جان-جاقتى ءارى ۇيلەسىمدى تۇردە دامۋىنا نەگىز قالانعانى ۇلكەن مەرەي. جىل باسىنان بەرگى وتكىزىلگەن 600-دەن استام ءىس-شارا وسى ارناعا باعىتتالدى.
«باقىتتى بالا» جوباسىنىڭ باستى تارماعىنىڭ ءبىرى بالالاردىڭ جازعى دەمالىسىن ۇتىمدى تۇردە ۇيىمداستىرۋعا ارنالعان. بۇل جونىندە وبلىستا ءتيىمدى شارالار قابىلدانعان. وسى ورايدا ءبىرىنشى كەزەكتە مۇگەدەك بالالاردىڭ الاڭسىز ەم الۋى مەن دەم الۋىنا باسىمدىق بەرىلگەن. «كۇنشۋاق» بالالاردى ساۋىقتىرۋ لاگەرىنىڭ نەگىزىندە ونىڭ كەيبىر مىسالدارى گازەتىمىزدىڭ وتكەن نومىرلەرىنىڭ بىرىندە جازىلدى دا. اتالعان ءتىزىمدى تۇرمىسى تومەن, از قامتىلعان وتباسىنان شىققان بالالار تولىقتىرا تۇسەدى. بۇدان كەيىنگى كەزەكتە رەسپۋبليكالىق جانە حالىقارالىق بايقاۋلار مەن وليمپيادالاردىڭ جەڭىمپازدارى مەن جۇلدەگەرلەرى تۇر.
كەشەگى 1 ماۋسىم كۇنى وبلىس ورتالىعىندا وتكىزىلگەن بالالاردىڭ «سالەم ساعان, استانا!» اتتى مەرەكەلىك شەرۋى كەزىندە مىڭعا جۋىق بالاعا دەمالۋعا جانە ەكسكۋرسياعا شىعۋعا جولداما تابىستالدى. سوعان سايكەس ولار تاتارستان مەن وزبەكستاننىڭ كيەلى دە كوركەم جەرلەرىمەن تانىسا الادى. سونىڭ ىشىندە وبلىستاعى جەتكىنشەكتەردىڭ بەلگىلى ءبىر بولىگى رەسەيدىڭ ورىنبور وبلىسىنداعى جىل بويى جۇمىس جاسايتىن لاگەردە دەمالاتىن بولسا, 500-گە جۋىق بالا شىعىس قازاقستان وبلىسىنداعى دەمالىس لاگەرلەرىنە اتتانباق. وسى ورايدا بالالاردى قورعاۋ كۇنى وتكىزىلگەن شەرۋ رەسپۋبليكالىق ماڭىزعا يە بولعانىن ءارى وعان ەلۋ مىڭعا جۋىق جەتكىنشەك قاتىسقانىن ايتقان ءجون. بالالار شەرۋىنىڭ اسا اۋقىمدىلىعىن وسىدان-اق بايقاۋعا بولاتىنداي.
سونىمەن بىرگە وبلىس ورتالىعىندا «باقىتتى بالا» جوباسى اياسىندا بالالار مەن جاسوسپىرىمدەردىڭ فەستيۆال-بايقاۋى دا مارەگە جەتتى. مۇنداعى باستى ماقسات بالالاردىڭ ونەرى مەن شىعارماشىلىعىن دامىتۋ جانە دارىندى بالالاردى ىرىكتەۋ دەسەك, وسى ماقسات تولىعىمەن ورىندالعانى ايقىن. مۇنداعى ىرىكتەۋ كەزەڭدەرىنە 3500 بالا قاتىسىپ, ونەرلەرىن ورتاعا سالدى. ۇزدىكتەر وسىلايشا ۇكىلەنىپ, ولاردىڭ بارىنە ءتيىستى ماراپاتتار مەن سىي-سياپاتتار تاپسىرىلدى.
سونداي-اق اقتوبە قالاسىندا بۇگىنگى قازاق ءان ونەرىنىڭ جارقىن وكىلى ديماش قۇدايبەرگەنوۆتىڭ قاتىسۋىمەن «باقىتتى بالا» حالىقارالىق بايقاۋى وتكىزىلدى. اتالعان ۆوكالدى فەستيۆال كونكۋرسى تالانتتى بالالاردىڭ تۇساۋىنكەسۋمەن بىرگە مەملەكەتتەر اراسىنداعى مادەني بايلانىستاردى نىعايتۋعا دا سەپتىگىن تيگىزگەنى حاق.
– بۇل بايقاۋعا بالالاردىڭ ونەرىن باعالاۋعا كەلگەن ەدىك. ولاردىڭ اراسىندا ءجۇرىپ, ءوزىمنىڭ بالا كەزىم ەسىمە ءتۇستى. انام مەنى ءتۇرلى بايقاۋلارعا جەتەلەپ ءجۇردى. ەكەۋمىز پويىزدا ءومىر سۇردىك دەسەك تە بولادى. مۇنداي اۋقىمى جوعارى بايقاۋلار اسا قاجەت. سەبەبى قازىر تالانتتى بالالار وتە كوپ. ولاردىڭ باعىن بايلاماي جارىققا شىعارۋ كەرەك, – دەيدى قازىلار القاسىنىڭ مۇشەسى, «الەمنىڭ ۇزدىك وتىز داۋىسى» تىزىمىنە ەنگەن ءانشى ۆلاديسلاۆ سىتنيك.
اقتوبەدەگى بايقاۋعا اقش, فرانتسيا, گەرمانيا. جاڭا زەلانديا, پولشا, فينلانديا, قىتاي, جاپونيا, مالايزيا, رەسەي, ۋكراينا مەملەكەتتەرى سەكىلدى الەمنىڭ تۇپكىر-تۇپكىرىنەن كەلگەن ديماشتىڭ فاناتتارى ديماش قازاق ءتۋريزىمىنىڭ ەلشىسى, ول ەل مەن ەلدى, مادەنيەت پەن مادەنيەتتى جالعاستىرىپ جۇرگەن جاس ادام. ءسىرا مۇنداي ادامدار مىڭ جىلدا ءبىر تۋاتىن شىعار دەپ مالىمدەدى.
63 جاستاعى راي ۋورد اتتى كەيۋانا ديماشپەن كەزدەسۋ ءۇشىن سوناۋ جاڭا زەلانديادان ارنايى كەلىپتى. بايقاۋعا الەم ەلدەرىنەن 400-دەن استام ۇسىنىس تۇسكەن ەكەن. ونىڭ تەك جيىرماسى عانا تاڭدالىپ الىنعان. سولاردىڭ ءبىرى – ۋكراينانىڭ كيەۆ قالاسىنان كەلگەن ليۋبوۆ گرەتەنكو. 11 جاستاعى ءانشى بۇعان دەيىن دە ءتۇرلى بايقاۋلارعا قاتىسىپ, جۇلدەلى ورىنداردى يەمدەنىپتى.
– حالىقارالىق دەڭگەيدەگى بايقاۋعا ءبىرىنشى رەت قاتىسىپ وتىرمىن. ىرىكتەۋدەن وتكەنىمدى ەستىپ قاتتى قۋاندىم. دانەليا تۋلەشوۆا مەن ديماشتىڭ ورىنداۋىنداعى اندەردى ءسۇيىپ تىڭدادىم. ەكەۋىمەن دە كەزدەسكەنىمە وتە قۋانىشتىمىن, – دەيدى ول.
...مىنە, وسىلايشا اقتوبەدە جىل باسىندا قانات قاققان «باقىتتى بالا» جوباسى شەشۋشى كەزەڭگە اياق باسىپ كەلەدى.
تەمىر قۇسايىن,
«ەگەمەن قازاقستان»
اقتوبە
