كونتسەرتتە قازاق حالقىنىڭ اندەرى, الشەكەي, قۇرمانعازى, قورقىتتىڭ كۇيلەرى جانە الەمدىك, قازاقستاندىق كومپوزيتورلاردىڭ شىعارمالارى ورىندالدى.
سونىمەن قاتار, وركەسترمەن بىرگە وزبەكستان, قىرعىزستان, ازەربايجان جانە تۇركيا مەملەكەتتەرىنىڭ ونەرپازدارى دا ونەر كورسەتتى.
ەستەرىڭىزگە سالا كەتسەك, حالىقارالىق تۇركسوي ۇيىمىنىڭ ۇيىمداستىرۋىمەن شارا 1-10 ماۋسىم ارالىعىندا تۇركيا مەملەكەتىندە وتۋدە. فەستيۆال اياسىندا وركەستر ۇجىمى انكارا, اقساراي جانە بولۋ قالالارىندا ونەر كورسەتەدى.
اتاپ ءوتۋ كەرەك, تۇرماعانبەت حالىق اسپاپتار وركەسترى سىر سۇلەيى, اتاقتى شايىر تۇرماعامبەت ىزتىلەۋ ۇلىنىڭ 125 جىلدىق مەرەيتويى قارساڭىندا 2007 جىلى قىزىلوردا وبلىستىق فيلارمونياسى جانىنان قۇرىلدى.
بۇگىندە وركەستر قۇرامىندا 45 مۋزىكانت بار. ۇجىممەن تاجىريبەلى 2 ديريجەر, وركەستردىڭ جەتەشىسى كەۋلىمجاي بوتاباەۆ جانە كۇلدارى يزبانوۆا جۇمىس جاسايدى. كوركەمدىك جەتەكشىسى – سامات ابىلاەۆ.
وركەستر رەپەرتۋارىندا 300-گە جۋىق قازاق ۇلتتىق اندەرى, كۇيلەرى, قازانعاپ, شال مىرزا, بەكپەمبەت, الشەكەي, جالدىباي, دوسجان تولەگەن, قازاقستان جانە جەرگەلىكتى كومپوزيتورلارىنىڭ شىعارمالارى قامتىلعان.
ۇجىم ورىنداۋىندا كلاسسيكالىق مۋزىكا, سونداي-اق, ورىس, كارىس, ۇيعىر, ازەربايجان جانە تاجىك اۋەندەرى بار.
وركەستر ءوزىنىڭ ەرەكشە ورىنداۋشىلىعى ارقاسىندا ۇلكەن قوشەمەتكە يە بولعان. ەرمەك سەركەباەۆ, بيبىگۇل تولەگەنوۆا, نۇرعالي ءنۇسىپجانوۆ جانە ت.ب. كونتسەرتتەرى وركەستردىڭ سۇيەمەلدەۋىمەن ءوتتى.
