بالالار مەرەكەسىنىڭ قارساڭىندا العاش جارىق كورىپ وتىرعان كىتاپشا بۇلدىرشىندەردىڭ وي-ءورىسىن قالىپتاستىرۋعا, كىتاپ وقۋعا دەگەن ىنتاسىن وياتۋعا ىقپال ەتەتىنى ءسوزسىز. «بۇگىندە ەلىمىزدە «رۋحاني جاڭعىرۋ» باعدارلاماسى اياسىندا ءتۇرلى يگى باستامالار قولعا الىنۋدا. وسىنداي ساتتە بالاپاندارىمىزدىڭ بولاشاعى مەن ۇلتتىق قۇندىلىقتارىمىز نازاردان تىس قالماۋى ءتيىس. زىمىراعان ۋاقىتپەن جارىسا ءوسىپ كەلە جاتقان بالالاردىڭ بۇگىندە ۇيالى تەلەفونعا تاۋەلدى بولىپ بارا جاتقانى بارىمىزگە ايان. وسى تۇرعىدان العاندا ويىن كىتاپشاسى بۇلدىرشىندەرىمىزدى ءبىر ءسات بولسا دا تانىمدىق الەمگە ەلىتىپ اكەتەتىنى ءسوزسىز», - دەيدى ءوز ويىمەن بولىسكەن كىتاپ اۆتورى جانار قۋاندىققىزى.
كىتاپشا ۇلتتىق ناقىشتا بەزەندىرىلىپ, دانالىق ناقىل سوزدەرمەن ارلەنگەن. بالالاردىڭ بۇل كىتاپشادان جۇمباقتار مەن جاڭىلتپاشتار وقۋىنا دا مول مۇمكىندىك بار.
پروفەسسور ح.وسپانوۆ, «اكە اماناتى» كىتابىنىڭ اۆتورى ي.كەمەلبەكوۆ جانە «ورحون» باسپا ءۇيىنىڭ ديرەكتورى ج.ايدوس بۇلدىرشىندەر الەمىنە جول تارتقان كىتاپتىڭ تۇساۋكەسەرىنە قاتىسىپ, ءسات-ساپار تىلەسە, تەولوگ-ءدىنتانۋشى ن.جارىمبەكوۆ, تانىمال جۋرناليست س.ابەدينوۆا, جازۋشى-جۋرناليست ق.ابىلقايىر, ونەر سالاسىنىڭ وكىلدەرى ق.شاكىرجانوۆ, ج.بايتەكوۆ, ن. جاقسىگەن, ت.ب. «باقىتتى جانۇيا» كىتابىنىڭ كوپتەگەن وتباسىلار ءۇشىن تانىمدىق مازمۇنمەن ەرەكلشەلەنگەن باسىلىم بولاتىندىعىنا ۇلكەن سەنىم ارتىپ, تىلەكتەرىن ءبىلدىردى.
ەلۆيرا سەرىكقىزى,
«ەگەمەن قازاقستان»
الماتى
