ء«بىز قاجەتتى ەپيدەميولوگيالىق جانە مەديتسينالىق كومەكتى ۇيىمداستىرۋ جۇمىستارىن بارشا وڭىرلەر بويىنشا قامتىدىق. وتكەن اپتادا مەنىڭ بۇيرىعىممەن ارنايى رەسپۋبليكالىق شتاب قۇرىلدى, سونىمەن قاتار ءار وبلىستىڭ نەگىزىندە وڭىرلىك شتابتار دا جاساقتالدى. ءبىز كۇن سايىن بارلىق اقپاراتتى ۇيلەستىرەمىز», - دەدى ءبىرتانوۆ ورتالىق كوممۋنيكاتسيالار قىزمەتىندە.
ونىڭ سوزىنە قاراعاندا, ەلىمىزدەگى نورماتيۆتىك قۇقىقتىق بازاعا سايكەس, ۆاكتسينالاۋ تۋرالى شەشىمدى ينفەكتسيالار بويىنشا ۇلتتىق ۇيلەستىرۋ كونسۋلتاتيۆتىك كوميتەتى قابىلدايدى.
«وتكەن اپتادا وسى كوميتەتتىڭ وتىرىسى ءوتتى. ونىڭ قۇرامىنا بارلىق ينفەكتسيونيستەر مەن ەپيدەميولوگتار كىرەدى. ولار ۆاكتسينالاۋ تۋرالى شارالار قازىر ەرتە دەگەن شەشىم قابىلدادى. سايكەسىنشە, ەكپەلەردىڭ ۇلتتىق كۇنتىزبەسىنە مەنينگيت بويىنشا ۆاكتسينالاۋدى ەنگىزۋدىڭ قاجەتتىگى جوق. بۇل ءوز كەزەگىندە ءتيىمسىز بولادى», - دەدى ۆەدومستۆو باسشىسى.
وسى ورايدا ول اۋرۋعا شالدىققانداردىڭ سانى بۇگىندە ورتاشا قاداعالاۋ دەڭگەيىندە ەكەنىن اتاپ ءوتتى. ە. ءبىرتانوۆتىڭ ايتۋىنشا, مەنينگوكك باكتەريالارىنىڭ تۇرلەرى ءۇشىن كوپتەگەن ۆاكتسينالار بار. جالپى, ولاردىڭ ەكەۋى پايدالانىلىپ كەلەدى, قازىرگى كەزدە ونىڭ ىشىندە بىرەۋى قازاقستاندا تىركەلگەن. ءمينيستردىڭ اتاپ وتۋىنشە, ۆاكتسينالاردى تىركەۋ فارماتسەۆتيكالىق كومپانيالاردىڭ ءوتىنىمى بويىنشا ىسكە اسادى. قاجەت بولعان جاعدايدا, بۇل پرەپاراتتار بىردەن كىرگىزىلىپ, ۆاكتسينالاۋ باستالادى.
«اۋرۋعا شالدىعۋدىڭ ەكى كەزەڭى بار. 100 مىڭ تۇرعىنعا شاققاندا اپتاسىنا ءۇش وقيعا تىركەلسە, شتابتاردى قۇرۋ باستالادى. بۇگىندە بىزدە بۇل دەڭگەي ەكى ەسەگە تومەن. ياعني ءبىز پروفيلاكتيكالىق, الدىن الۋ شارالارىن ەرتە باستادىق. ۆاكتسينالاۋ ماسەلەسى 100 مىڭ ادامعا شاققاندا اۋرۋدىڭ 10 وقيعاسى تىركەلگەن كەزدە كوتەرىلەدى. سايكەسىنشە, اۋرۋعا شالدىعۋ دەڭگەيى جەتى ەسەگە تومەن. سوندىقتان ۆاكتسينالاۋ شارالارى بويىنشا ماسەلە كوتەرىلگەن جوق», -دەدى ە. ءبىرتانوۆ.
بۇدان بۇرىن حابارلانعانداي, مينيستر 2018 جىلى قازاقستاندا مەنينگيتتەن 12 ادام كوز جۇمعانىن ايتتى.
