1 ماۋسىمنان باستاپ «استانا» كومانداسىن ۋكراينالىق بىلىكتى مامان رومان گريگورچۋك جاتتىقتىرادى. بۇل تۋرالى ءباسپاسوز جيىنىنا قاتىسقان كوماندا پرەزيدەنتى سايان حاميتجانوۆ مالىمدەپ, باق وكىلدەرى الدىندا رومان گريگورچۋكتى رەسمي تۇردە تانىستىردى. باستاپقى كەلىسىمشارت ەكى جىلعا جوسپارلانعان.
«جىل باسىندا ستانيمير ستويلوۆ قازاقستان ۇلتتىق قۇرامانىڭ باس باپكەرى بولىپ تاعايىندالعاندا ءبىز ونىڭ ورنىنا جاڭا باپكەر ىزدەپ جاتقان ەدىك. گريگورچۋكپەن بىزدە بەلگىلى ءبىر دەڭگەيدە ورتاق كەلىسىم بولدى. مەن ونى «استاناعا» ناۋرىز ايىندا الىپ كەلۋگە تىرىستىم. بىراق ونىڭ ازەربايجاننىڭ «گابالا» كومانداسىمەن مامىردىڭ سوڭىنا دەيىن كەلىسىمشارتى بار ەدى. مىنە, بۇگىن ونىمەن كەلىسىمشارتقا وتىردىق. ءبىز قازىرگە دەيىن كوماندانى جاتتىقتىرىپ كەلگەن بابايانعا كلۋبتى ۋاقىتشا باسقارا تۇرۋىن وتىنگەن ەدىك. ول ءوز كەلىسىمىن بەرگەن بولاتىن. بابايان كلۋبتا قالىپ, گريگورچۋكتىڭ ءبىرىنشى كومەكشىسى بولادى», دەدى س.حاميتجانوۆ.
سايان حاميتجانوۆ تاڭداۋ نە ءۇشىن ۋكراينالىق مامانعا تۇسكەنىنە دە توقتالىپ ءوتتى. ول رومان گريگورچۋكتى بىرنەشە سەبەپپەن تاڭداعانىن ايتتى. «بىرىنشىدەن, گريگورچۋك ەۋروكۋبوكتاردا ناتيجەگە جەتكەن باپكەر. بۇل ءبىز ءۇشىن وتە ماڭىزدى. ول ءۇش كوماندامەن ءتورت رەت ەۋروكۋبوكتا ويناعان. ەكىنشىدەن, رومان ءتۇرلى كوماندالار مەن ەلدەرگە وڭاي بەيىمدەلەدى جانە ورنالاسۋىنا قاراماستان ناتيجەلەرگە قول جەتكىزە الادى. گريگورچۋك قازاقستان چەمپيوناتىندا جانە ەۋروكۋبوك باسەكەلەرىندە تابىسقا جەتۋ ءۇشىن ءبىزدىڭ ماقساتىمىزدى تولىعىمەن ورىندايدى دەپ سەنەمىن», دەدى س.حاميتجانوۆ. سونىمەن قاتار كلۋب پرەزيدەنتى جازعى ترانسفەر ماۋسىمىندا كوماندا قۇرامىن كۇشەيتەتىندىگىن, كلۋبقا كومەگى ءتيۋى مۇمكىن دەگەن بىرنەشە فۋتبولشىنى قاراستىرىپ جاتقانىن دا تىلگە تيەك ەتتى.
53 جاستاعى رومان گريگورچۋك ءار جىلدارى لاتۆيانىڭ «ۆەنسپيلس», ودەسسانىڭ «چەرنومورەتس» جانە ازەربايجاننىڭ «گابالا» ۇجىمدارىن جاتتىقتىرعان. ول سوڭعى ۇجىمدا ءۇش جارىم جىل قىزمەت ەتىپ, كوماندامەن بىرگە ەكى جىل قاتارىنان ەۋروپا ليگاسىنىڭ توپتىق كەزەڭىندە سىنعا تۇسكەن. سونىمەن قاتار رومان يوسيفوۆيچ 2013/2014 جىلعى ەۋروماۋسىمدا ودەسسانىڭ «چەرنومورەتس» كلۋبىمەن ءتۋرنيردىڭ 1/16 فينالىنا دەيىن شىققان بولاتىن.
ودان بولەك ۋكراينالىق مامان ءۇش مارتە لاتۆيا چەمپيوناتىندا توپ جارىپ, ەكى مارتە بالقان تۇبەگى ەلىنىڭ كۋبوگىندا جەڭىسكە جەتكەن. ازەربايجان چەمپيوناتىندا ەكى رەت كۇمىس, ەكى رەت قولا جۇلدەنى جەڭىپ العان. ال جەكەلەي ماراپاتقا كەلەر بولساق, گريگورچۋك ءۇش مارتە لاتۆيانىڭ ۇزدىك باپكەرى اتانىپ, ۋكراينا جانە ازەربايجاندا ءبىر رەتتەن وسى جەتىستىككە قول جەتكىزگەن.
«استانا» كومانداسىنىڭ جاتتىقتىرۋشىسى اتانعانىما قۋانىشتىمىن. سوڭعى جىلدا قول جەتكىزگەن جەتىستىگىنىڭ ارقاسىندا «استانا» ەۋروپاعا ءبىرشاما تانىلىپ قالدى. بۇل ماعان ۇلكەن جاۋاپكەرشىلىك جۇكتەيدى. كوماندا تەك جەڭىسكە جەتۋدى ۇيرەنگەن. مەنىڭ جۇمىسىم دا كلۋبتى جەڭىسكە جەتەلەۋ», دەدى گريگورچۋك.
ايتا كەتەيىك, «استانا» كومانداسى بيىل ەۋروماۋسىمدى چەمپيوندار ليگاسىنىڭ ءبىرىنشى ىرىكتەۋ كەزەڭىنەن باستايدى. العاشقى ويىن شىلدە ايىنىڭ 10/11 كۇندەرىنە, قارىمتا كەزدەسۋ 17/18 كۇندەرىنە بەلگىلەنگەن. وتكەن ماۋسىمدا ەلوردا ۇجىمى ەۋروپا ليگاسىنىڭ پلەي-وفف كەزەڭىنە دەيىن جەتكەن بولاتىن.
ءالي بيتورە,
«ەگەمەن قازاقستان»
