الدارىنداعى مالدارىن تارتىپ الدى. نەگىزگى كۇنكورىسى مال بولعان حالقىمىز اشتىققا ۇرىندى, شاماسى بارلار جان ساۋعالاپ شەكارا اسىپ كەتتى. ءسويتىپ تۇتاستاي ءبىر ۇلتقا قاساقانا زۇلمات جاسالدى.
كەڭەستىك جۇيەنىڭ وسى ءبىر ەڭ اۋىر قىلمىسى ۇزاق جىلدار بويى اسا قۇپيا بولدى, ايتىلمادى دا, جازىلمادى دا. تەك ەلىمىز تاۋەلسىزدىك العاننان كەيىن عانا, پرەزيدەنتىمىز نۇرسۇلتان نازارباەۆتىڭ پارمەنىمەن اشارشىلىق جانە ونىڭ زارداپتارى جان-جاقتى زەرتتەلىپ, بۇل ناۋبەتتىڭ قاسىرەتىن بۇگىنگى وسكەلەڭ ۇرپاقتىڭ تەرەڭ بىلۋىنە مۇمكىنشىلىك جاسالدى.
قازىرگى قولداعى ارحيۆ قورلارىندا ساقتالعان ساناق ماتەريالدارى, مەملەكەت قايراتكەرلەرى مەن قازاقتىڭ زيالى قاۋىم وكىلدەرىنىڭ ي.ستالينگە, ل.ميرزويانعا جازعان سول كەزدەگى حاتتارى جانە وسى تاقىرىپتى تەرەڭ زەرتتەگەن وتاندىق جانە شەتەلدىك تاريحشى عالىمداردىڭ پىكىرلەرىنە قاراعاندا, 1930 جىلى 1 ماۋسىمعا دەيىنگى ەسەپ بويىنشا قازاقستاندا 5 ميلليون 873 مىڭ حالىق, سونىڭ ىشىندە 4,5 ميلليون قازاقتار تۇرعان ەكەن. ال 1932 جىلى «كازسوۆناركومنىڭ» مالىمەتىنە سۇيەنە وتىرىپ, ل. ميرزويانعا جازىلعان رەسمي حاتتا قازاقستاننىڭ اۋىلدىق جەرلەرىندەگى 4 ميلليون 800 مىڭ حالىقتىڭ 2 ميلليون 250 مىڭ عانا قالعانى اتاپ كورسەتىلەدى.
دەمەك, ەكى جىل ىشىندە اتا قونىسىندا تۇرىپ جاتقان قازاق حالقى تەڭ جارتىسىنان ايىرىلعان. مۇنداي اۋىر قاسىرەتتى بىردە-ءبىر حالىق باسىنان وتكەرمەگەن ەكەن. قازىر دەموگراف ماماندار قولدان جاسالعان وسى اشارشىلىق بولماسا, وسى كۇندەرى ءبىزدىڭ حالقىمىز 45 ميلليونعا جەتۋى مۇمكىن ەكەنىن دالەلدەپ, ايتىپ ءجۇر.
جىلدار ءوتىپ, ۇرپاقتار دا الماسىپ جاتىر. تاريحتىڭ بۇگىنگى تالابىنا ساي بولسىن دەسەك, وسى ءبىر اشارشىلىقتىڭ زالالى مەن زاردابىن ءالى دە بولسا ناقتىلاي ءتۇسۋ قاجەت. قازاقستان تاريحىنداعى وسى ءبىر ناۋبەتتى كەزەڭدى ەستە قالدىرۋ ءۇشىن ۇكىمەت الداعى ۋاقىتتا مىنا ماسەلەلەرگە نازار اۋدارسا:
1. ۇكىمەت دەڭگەيىندە وتاندىق جانە حالىقارالىق مول تاجىريبەسى بار ساراپشىلاردى تارتا وتىرىپ تاريحي قۇجاتتار مەن فاكتىلەردىڭ, اشتىقتى كوزبەن كورگەن ادامداردىڭ ەستەلىكتەرىنىڭ نەگىزىندە اشارشىلىقتىڭ قۇربانى بولعان وتانداستارىمىزدىڭ ءبىرتۇتاس مەملەكەتتىك رەەسترىن جاساۋ ءۇشىن عىلىمي-زەرتتەۋ ورتالىعىن قۇرۋ كەرەك;
2. ۇكىمەت دەڭگەيىندە قۋعىن-سۇرگىندەردىڭ قاسىرەتىنە جانە اشارشىلىق قۇرباندارىنا رەسمي قۇقىقتىق, ساياسي باعا بەرىلەتىن ارنايى شەشىم شىعارىلىپ, قولدان ۇيىمداستىرىلعان اشتىقتىڭ قۇربانى بولعان ميلليونداعان جازىقسىز جانداردىڭ رۋحى الدىنداعى ءوزىمىزدىڭ ازاماتتىق پارىزىمىزدى ورىنداۋ;
3. اشارشىلىقتىڭ قايعى-قاسىرەتى مەن سالدارى ءالى دە بولسا كەڭىنەن ايتىلىپ, بارلىق اقپارات قۇرالدارى مەن ارنايى كينوفيلمدەر ارقىلى جاس ۇرپاققا تەرەڭ جەتكىزىلۋى مىندەت.
ء بىز وسى ۇسىنىسىمىزدى ۇكىمەت باسشىسىنا دەپۋتاتتىق ساۋالمەن جولدادىق.
مۇرات باقتيار ۇلى,
سەنات دەپۋتاتى
