ەل بيلىگىنىڭ ايتۋىنشا, اسكەري ۇشاقتار حاماس ۇيىمى ورنالاسقان 35-تەن استام نىسانانى اتقىلاعان كورىنەدى. سونىمەن قاتار يزرايل تاراپى پالەستينالىقتار شابۋىل جاسادى دەگەن ءۋاج ايتۋدا.
Al Jazeera ارناسىنىڭ حابارلاۋىنشا, اتالعان شابۋىلدى حاماس ۇيىمى قاتاڭ سىنعا العان. ۇيىم «اسكەري ايماقتاردى راكەتامەن اتقىلاۋ كەشىرىلمەيتىن قىلمىس» دەپ رەسمي مالىمدەمە جاسادى. سونداي-اق گازاداعى بىرقاتار بريگادالار اسكەري ءىس-قيمىلدى پالەستينا حالقىنا كۇش كورسەتۋ ارەكەتىنە تەڭەپ, بەيبىت تۇرعىندارعا جاسالىپ جاتقان يزرايل تاراپىنىڭ قىسىمىنا الەم نازارىن اۋدارۋ قاجەت دەپ ەسەپتەيتىنىن جەتكىزگەن.
Al Jazeera ارناسىنا سۇحبات بەرگەن حاماس ۇيىمىنىڭ وكىلى يسمايل رادۆان داۋ-جانجالعا يزرايل بيلىگىن كىنالادى. «جاعدايدىڭ ۋشىعۋى سيونيستىك باسىپ الۋ بولعاندىقتان قاۋىپتى جانە وقيعانىڭ وسىلاي وربۋىنە دە سول كىنالى» دەيدى ول.
دەگەنمەن يزرايل تاراپىنىڭ ءوز ايتارى بار. سىرتقى ىستەر ءمينيسترىنىڭ حاتشىسى ەممانۋەل ناحشون تۋيتتەردەگى پاراقشاسىنا «قاراپايىم حالىققا جاسالعان قىسىمعا ەشقانداي مەملەكەت كونبەيدى دە, قابىلدامايدى دا. ءبىز دە سويتەمىز» دەپ جازعان.
جالپى, 30 ناۋرىزدان بەرى قارۋسىز 121 پالەستينالىق يزرايل قارۋلى كۇشتەرى تاراپىنان قازا تاپتى. ولار ءوز ۇيلەرى مەن جەرىنە قايتارۋدى سۇراپ شەرۋگە شىققان بولاتىن.
Al Jazeera ارناسىنىڭ مالىمەتىنە ساي, ازىرگە اۋە شابۋىلىنان كەيىن قازا تاپقاندار تۋرالى مالىمەت جوق. ايتسە دە, يزرايل اسكەرى ءۇش ساربازى جاراقات العانىن حابارلاعان.
كەلىسسوزدەر قايتا جالعاستى
اقش مەملەكەتتىك حاتشىسى مايك پومپەو 12 ماۋسىمدا ءوتۋى ءتيىس اق ءۇي باسشىسى دونالد ترامپ پەن سولتۇستىك كورەيا پرەزيدەنتى كيم چەن ىن اراسىنداعى ءسامميتتىڭ تاعدىرى قىل ۇستىندە تۇرعانىن مالىمدەدى.
م.پومپەو نيۋ-يوركتا ەكى رەت كحدر-دان كەلگەن وكىلدەرمەن كەزدەستى. ونىڭ ايتۋىنشا, كەلىسسوزدەر ءساتتى جۇرگەن, الايدا ءالى دە كەيبىر ماسەلەلەر تولىققاندى شەشىلمەگەن كورىنەدى. ايتسە دە, مەملەكەتتىك حاتشى قازىرگى كەزەڭ ەكى مەملەكەت ءۇشىن ماڭىزدى ءسات ەكەنىن جەتكىزگەن.
ەستەرىڭىزدە بولسا, اقش پرەزيدەنتى دونالد ترامپ پەن كحدر باسشىسى كيم چەن ىن 12 ماۋسىمدا سينگاپۋردە ەكىجاقتى سامميت وتكىزۋى ءتيىس بولاتىن. بىراق د.ترامپ تاياۋدا جيىنعا قاتىسپايتىنىن مالىمدەگەن. سينگاپۋردەگى سامميتتەن ۇلكەن ءۇمىت كۇتىپ وتىرعان حالىقارالىق قوعامداستىق اق ءۇي باسشىسىنىڭ بۇل شەشىمىن نارازىلىقپەن قابىلدادى. اقىرى اقش-كحدر كەلىسسوزدەرى قايتا جالعاساتىن بولدى.
CNN اگەنتتىگىنىڭ حابارلاۋىنشا, سولتۇستىك كورەيا مەن رەسەي ەكى ەل اراسىنداعى ديپلوماتيالىق بايلانىستىڭ ورناۋىنا 70 جىل تولۋىنا وراي ەكىجاقتى جيىن وتكىزبەك. سەيسەنبى كۇنى پحەنياندا وتكەن رەسەي سىرتقى ىستەر ءمينيسترى سەرگەي لاۆروۆ پەن كيم چەن ىن اراسىنداعى كەزدەسۋدە وسىنداي شەشىم قابىلدانعان.
قىتاي شىۇ-نىڭ سامميتىنە ساقاداي ساي
ماۋسىمنىڭ 9-10 كۇندەرى تسينداو قالاسىندا شانحاي ىنتىماقتاستىق ۇيىمىنىڭ 17-ءشى ءسامميتى وتەدى. جيىندى ۇيىمداستىراتىن قىتاي سوڭعى ازىرلىكتەرىن پىسىقتاپ, شاراعا تاس-ءتۇيىن دايىن وتىر.
Xinhua اگەنتتىگىنىڭ حابارلاۋىنشا, ءسامميتتى ۇيىمداستىرۋعا 2000-نان استام ەرىكتى جۇمىلدىرىلعان كورىنەدى. قىتايدىڭ سىرتقى ىستەر ءمينيسترى ۆان ي جيىنعا ەل پرەزيدەنتى سي تسزينپين توراعالىق ەتەتىنىن مالىمدەدى.
ۆان ي سامميت جۇمىسى كەزىندە شىۇ-نىڭ قازىرگى جاعدايى جانە كەلەشەكتەگى دامۋى تالقىلانىپ, ايماققا قاتىستى حالىقارالىق جانە وڭىرلىك ماڭىزدى ماسەلەلەر ءسوز بولاتىنىن جەتكىزدى. سونداي-اق سامميت بارىسىندا تسينداو دەكلاراتسياسى بەكىتىلىپ, قاۋىپسىزدىك پەن ەكونوميكالىق ىنتىماقتاستىققا قاتىستى بىرقاتار قۇجاتتارعا قول قويىلادى دەپ كۇتىلىپ وتىر.
بۇدان بولەك, Xinhua اگەنتتىگى قازاقستان پرەزيدەنتى نۇرسۇلتان نازارباەۆتىڭ قىتايعا مەملەكەتتىك ساپارمەن كەلەتىنىن دە ايتقان. وندا بىرقاتار ماسەلەلەر تالقىلانىپ, ەكىجاقتى كەزدەسۋلەر وتكىزىلەدى.
اگەنتتىكتىڭ مالىمەتىنە ساي, شانحاي ىنتىماقتاستىق ۇيىمى قۇرىلعالى مۇشە مەملەكەتتەر اراسىنداعى ەكونوميكالىق ارىپتەستىكتىڭ جەمىستى بولىپ, ساۋدا اينالىمى, ينۆەستيتسيا, كوپتەگەن ورتاق جوبالار ءتيىمدى جۇزەگە اسىرىلىپ كەلەدى. ماسەلەن, شىۇ مەن قىتاي اراسىنداعى ساۋدا اينالىمى بيىل 20,7 پايىزعا ءوسىپ, 217,6 ميلليارد دوللارعا جەتكەن.
جالپى, بۇل – شىۇ كەڭەيتىلگەننەن كەيىنگى العاشقى سامميت. بىلتىر 2017 جىلى استانادا وتكەن جيىندا ۇيىم قۇرامىنا ءۇندىستان مەن پاكىستان تولىقتاي مۇشەلىككە قابىلدانعان بولاتىن.
شولۋدى دايىنداعان
اباي اسانكەلدى ۇلى,
«ەگەمەن قازاقستان»
