بريفينگ بارىسىندا استانا اكىمى اسەت يسەكەشەۆ ديپلوماتيالىق كورپۋس وكىلدەرىن قالا كۇنىنە دايىندىقتىڭ ءۇش توپتاماسىمەن تانىستىردى. ونىڭ ايتۋىنشا, ءبىرىنشى توپتاماعا مادەنيەت جانە سپورت مينيسترلىگىمەن بىرلەسە جاسالعان دايىندىق كىرسە, ەكىنشى توپتاماعا قازاقستاننىڭ وزگە وڭىرلەرىمەن بىرگە دايىندالعان شارالار, ال ءۇشىنشى توپتاماعا شەتەلدىك سەرىكتەستەرمەن بىرلەسە وتكىزىلەتىن ءىس-شارالار كىرەدى. بۇل باستامالار استانانى ىسكەرلىك جانە مادەني تۋريزم ورتالىعى رەتىندە تانىتۋعا ءوز سەپتىگىن تيگىزبەك.
«جالپى, جىل بويى وتكىزىلەتىن مادەني شارالارعا 1 ميلليوننان استام ادام قاتىسادى دەپ كۇتىلۋدە. سوندىقتان ينجەنەرلىك-الەۋمەتتىك ينفراقۇرىلىمداردى دايىنداۋ, قاۋىپسىزدىك پەن جايلىلىقتى قامتاماسىز ەتۋ بويىنشا بارلىق دايىندىق جۇمىستارى جۇرگىزىلىپ جاتىر», دەدى ول.
سونداي-اق تۇرعىن ءۇي اۋلالارىن, ساياباقتار مەن گۇلزارلاردى, قوعامدىق الاڭداردى اباتتاندىرۋ بويىنشا دا اۋقىمدى جۇمىستار جۇرگىزىلۋدە. ماسەلەن, ەلوردا كۇنىندە 100-دەن استام, ال جالپى وسى جىلى 400-گە جۋىق جاڭعىرتىلعان اۋلانى تاپسىرۋ جوسپارلانىپ وتىر. ولاردىڭ باسىم بولىگى «رۋحاني جاڭعىرۋ» باعدارلاماسى اياسىندا جەكە ينۆەستورلاردىڭ قاراجاتىنا اباتتاندىرىلادى دەپ كۇتىلۋدە. ال ەلوردا كۇنىنە وراي 7 جاڭا ساياباق پەن گۇلزار اشىلىپ, 40 مىڭنان استام اعاش وتىرعىزىلادى.
ۆەنەرا تۇگەلباي,
«ەگەمەن قازاقستان»
