ء"بىز پاتەرلەردى باسپاناسى جوق جاستار العانىن قالايمىز. بۇل باعدارلامانى پاتەرسىز جۇرگەندەرگە ارنالىپ وتىر. سوندىقتان دا وسى باعىتتاعى جۇمىستار كىمگە جانە نە ءۇشىن جاسالىپ جاتقانىن بارشا قوعامعا ءتۇسىندىرۋ قاجەت. ءتيىستى ەسەپتەۋلەر جاسالدى, وتباسىنىڭ ەكى مۇشەسى جۇمىس ىستەگەن كەزدە ەشقانداي پروبلەما جوق. يپوتەكالىق نەسيە 7 پايىزدان اسپايدى", - دەدى ەلباسى.
مەملەكەت باسشىسى وسىعان دەيىن تۇرعىن ءۇي باعدارلامالارى بويىنشا باستاپقى جارنانى باسپانا قۇنىنان 50 پايىز كولەمىندە تالاپ ەتكەنىن, ال قازىر تەك 20 پايىز ەكەنىن اتاپ ءوتتى. سونىمەن قاتار بۇرىندارى نەسيەنى بەرۋ مەرزىمى ەڭ كوپ دەگەندە 10 جىل قۇراسا, بۇگىندە 25 جىلعا سوزىلىپ وتىر.
"بارلىق پارتيا مۇشەلەرى, اكىمدەر باعدارلاما اياسىندا ءتيىستى شارالاردى باقىلاۋعا الىپ, قاجەتتى جۇمىستاردى لايىقتى دەڭگەيدە ىسكە اسىرۋى ءتيىس. ياعني باسپانا كىمگە قاجەت بولسا, سول الۋى ءتيىس. سايكەسىنشە, ادامدار وسى ۇدەرىسكە قوسىلىپ, جۇمىستارىن باستاۋى كەرەك", - دەپ اتاپ ءوتتى نۇرسۇلتان نازارباەۆ. ەلباسى تۇرعىن ءۇي باعدارلاماسىن ىسكە اسىرۋ قۇرىلىس سالاسىنداعى قارقىندى ارتتىراتىنىن, وسى سالادا بيزنەس دامۋ مۇمكىندىگىنە يە بولاتىنىن جەتكىزدى. "امەريكانى فورد مىرزا باستاعان اۆتوموبيل ونەركاسىبى كوتەرسە, ءبىزدى تۇرعىن ءۇي قۇرىلىسى مەن اۋىل شارۋاشىلىعى كوتەرەتىنىن مەن ۇنەمى ايتىپ كەلەمىن", - دەپ ەسكەرتتى مەملەكەت باسشىسى.
