سالتاناتتى ءراسىم اقتوبە قالاسىندا ءانشىنىڭ «ديماشتىڭ وتانى» اتتى تۋرىنا قاتىسۋشى 10 مەملەكەتتەن كەلگەن تابىنۋشىلىق توپتاردىڭ جەتەكشىلەرىمەن كەزدەسۋ كەزىندە ءوتتى.
ء «بىر جارىم اي بۇرىن فۋتبوليست مەسسي الەم ءتۋريزمىنىڭ ەلشىسى اتاندى. ءبىز دە ديماشقا قازاقستاندىق تۋريزم ەلشىسىنىڭ سەرتيفيكاتىن ۇسىنىپ وتىرمىز. ول ءوز ەلىنىڭ پاتريوتى», - دەپ, اتاپ ءوتتى «Kazakh Tourism» ۇك» اق باسقارما توراعاسى راشيد كۇزەمباەۆ.
ديماش قۇدايبەرگەن تۋريزم ەلشىسى رەتىندە قازاقستاندى حالىقارالىق دەڭگەيدە ىلگەرىلەتۋدى جانە الەمنىڭ تۇپكىر-تۇپكىرىنەن ءوز تىڭدارماندارىن ەلىمىزدى كورۋگە شاقىرۋدى بەلسەندى تۇردە جالعاستىرادى دەپ كۇتىلۋدە.
ديماش ناعىز پاتريوت بولا تۇرا, ءوز كونتسەرتتەرىندە جانە باق كوزدەرىندە ارقاشان فاناتتارىن قازاقستانعا شاقىرىپ جۇرەدى. تۋردىڭ يدەياسى دا وسىدان شىققان. ال مارشرۋت قۇرامىنا ديماش شەتەلدە ۇنەمى ايتىپ جۇرەتىن تۋعان قالاسى اقتوبە, ەلوردامىز استانا جانە ەڭ ۇلكەن قالامىز الماتى كىردى.
جالپى تۋر ءانشىنىڭ بالالىعى مەن شىعارماشىلىعىمەن بايلانىستى جەرلەرگە بارۋدى, مىسالعا اقتوبەدەگى مەكتەبىن كورۋدى, سونداي-اق ءارتيستىڭ جاقىندارى مەن تۋىستارىمەن ءتۇرلى كەزدەسۋلەردى, ديماشتىڭ ۇستازى, ءارى قازاقستان رەسپۋبليكاسىنىڭ ەڭبەك سىڭىرگەن قايراتكەرى مارات ايتيموۆتىڭ ماستەر-كلاسسى جانە تاعى باسقانى قامتيدى.
بۇكىل الەمنەن كەلگەن ديماشتىڭ تابىنۋشىلارىنا ارناپ وسىنداي تۋرلاردى وتاندىق تۋروپەراتورلار تۇراقتى تۇردە وتكىزەتىن بولادى. ال وسى تۋرلاردان تۇسكەن قارجىنىڭ ءبىر بولىگى كەلەشكەتە ديماش برەندىن الەمدىك دەڭگەيدە ودان ءارى نىعايتۋعا جانە ورلەتۋگە باعىتتالادى.
