بۇل جولى جاندارىن دەرت, قاباقتارىن مۇڭ شالعان ءامىر عابدۋللين, كارينا بايمولدينا, ۆلاديسلاۆا گولوۆىرينانىڭ ەم-دومىنا جۇمساۋعا شەشىم قابىلداندى. كوپ بالالى وتباسىندا تاربيەلەنەتىن كارينا ميدىڭ كيستوزدى-گليوزدى وزگەرۋىنە جاستايىنان شالدىققان. بۋىن اۋرۋىنىڭ سوزىلمالى ءتۇرى مەڭدەگەن ۆلاديسلاۆا ءومىرىنىڭ كوپ بولىگىن اۋرۋحانادا وتكىزىپ كەلەدى. امىرگە قويىلعان احوندروپلازيا دياگنوزى ءتۇنى بويى جانىن جەگىدەي جەپ شىعادى. وتا جاسالعانىمەن, الدا تاعى ءبىر بەينەت كۇتىپ تۇر. ۋكراينادا جاسالاتىن كەزەكتى وپەراتسياعا بارماق.
بالماسكاراد تۇرىندە ۇيىمداستىرىلعان كەشتە وبلىس اكىمىنىڭ ورىنباسارى ماديار قوجاحمەت ەلباسىنىڭ قولداۋىمەن «بىرلىك – قايىرىمدىلىق ارقىلى» شاراسى جۇيەلى وتكىزىلىپ, جاقسى ءداستۇر وڭىردە كەڭ قانات جايعانىن اتاپ ءوتىپ, از قامتىلعان وتباسىلاردىڭ كەمباعال بالالارىنا جان-جاقتى قارجىلىق قولداۋ كورسەتۋدى دىتتەيتىن جوباعا بەلسەنە اتسالىسۋعا شاقىردى.
قايىرىمدىلىق بالىنا ورتاقتاسقان كاسىپكەرلەر, قالتالى ازاماتتار كىشكەنتاي بالدىرعانداردىڭ ونەرىن قىزىعا تاماشالادى. كونتسەرتتىك باعدارلامادان كەيىن اۋكتسيون ۇيىمداستىرىلىپ, 4 ميلليون 642 مىڭ تەڭگەنىڭ بۇيىمدارى مەن زاتتارى ساتىلدى.
اكتسيا سوڭىندا بالعا قاتىسۋشىلار فلەشموب بيلەپ, جينالعاندارعا كوتەرىڭكى كوڭىل كۇي سىيلادى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
