قولعا الىنعان باعدارلاما ەل يگىلىگىنە قىزمەت ەتىپ, اسىرەسە جاس وتباسىلاردىڭ پاتەرلى بولۋىنا مۇمكىندىك ۇسىنۋدا. مىڭداعان تۇرعىننىڭ باستى ماسەلەسىن شەشۋگە ىقپال ەتىپ وتىرعان اۋقىمدى جوبا 2015-2019 جىلدار ارالىعىندا جۇزەگە اسىرىلۋى جوسپارلانعان ينفراقۇرىلىمدى دامىتۋعا ارنالعان.
ەلىمىز ەگەمەندىك العالى بەرگى ۋاقىتتىڭ ىشىندە قول جەتكەن جەتىستىكتەرىمىز بەن تولايىم تابىستارىمىز بارشىلىق. ءاربىر ازاماتتىڭ تاۋەلسىز ەلىمىزدىڭ ەڭسە تىكتەپ, باسەكەگە قابىلەتتى بولۋى جولىندا ەڭبەك ەتۋى ءۇشىن ونىڭ الەۋمەتتىك جاعدايىنىڭ وڭ شەشىمىن تاپقانى دۇرىس-اق. بۇگىنگى تاڭدا مەملەكەتتىڭ قولداۋى ناتيجەسىندە باسپانالى بولىپ, قونىس تويىن تويلاپ جاتقان وتباسىلار سانى ارتىپ كەلەدى. سوڭعى جىلدارى ەلىمىز بويىنشا جىل سايىن 40 مىڭ پاتەر سالىنعان بولسا, ەندىگى جەردە «نۇرلى جەر» باعدارلاماسى اياسىندا جىل سايىن 100 مىڭ پاتەر پايدالانۋعا بەرىلەدى دەپ جوسپارلانعان. بۇل رەتتە تاعى دا ميلليونداعان ازاماتتىڭ پاتەرلى بولۋىنا جاعداي جاسالادى.
«نۇرلى جەر» باعدارلاماسىنىڭ وڭىرلەر ءۇشىن دە تيىمدىلىگى جوعارى. بۇگىنگى تاڭدا اتالعان باعدارلاما اياسىندا وبليگاتسيالىق قۇندى قاعازدار شىعارۋ ارقىلى تاراز قالاسىنداعى 43,8 مىڭ شارشى مەترلىك اۋماقتا 80 پاتەرلى
10 تۇرعىن ءۇيدىڭ قۇرىلىس جۇمىستارى جۇرگىزىلىپ كەلەدى. جامبىل وبلىستىق قۇرىلىس, جولاۋ-
شىلار كولىگى جانە اۆتوموبيل جولدارى باسقارماسىنىڭ مالىمەتىنشە, بۇل ماقساتقا وتكەن جىلى 1,8 ميلليارد تەڭگە ءبولىنىپ, قاراجات تولىعىمەن يگەرىلگەن. سونىمەن قاتار بىلتىرعى جىلدان وتپەلى جانە بيىلعى تۇرعىن ءۇي قۇرىلىسى جۇمىستارىنا بارلىعى 3,23 ميلليارد تەڭگە بولىنگەن. نەگىزىنەن قۇرىلىس جۇمىستارىنىڭ دەنى قالاداعى ى.سۇلەيمەنوۆ كوشەسىنىڭ سوڭىنداعى جەر تەلىمدەرىندە جۇرگىزىلۋدە. اتالعان باسقارمانىڭ باسشىسى ادىلەت احاتاەۆتىڭ ايتۋىنشا, حالىقتىڭ از قامتىلعان توپتارى ءۇشىن ساتىپ الۋ قۇقىعىنسىز «اراي» القابى مەن «بايتەرەك» شاعىن اۋدانىنان بوي كوتەرەتىن تۇرعىن ءۇي كەشەنى بەرىلەدى. اتالعان 3 نىساننىڭ قۇرىلىسىنا رەسپۋبليكالىق بيۋدجەتتەن 1 531,302 ميلليون تەڭگە بولىنگەن. بۇل نىساندار بيىل پايدالانۋعا بەرىلمەك.
«وسى رەتتە «نۇرلى جەر» باعدارلاماسى اياسىندا ت.رىسقۇلوۆ اۋدانى, قۇلان اۋىلىنداعى – «اراي», تاراز قالاسىنداعى – «بارىسحان», ى.سۇلەيمەنوۆ كوشەسىنىڭ سوڭىنداعى تۇرعىن القاپتارى مەن «بايتەرەك» شاعىن اۋدانىنىڭ بىرقاتار جەر تەلىمدەرىنىڭ ينجەنەرلىك-كوممۋنيكاتسيالىق ينفراقۇرىلىمدارىن دامىتۋعا رەسپۋبليكالىق بيۋدجەت ەسەبىنەن تيىسىنشە قارجى بولىنگەنىن اتاپ وتكەن ءجون», دەيدى باسقارما باسشىسى.
بۇگىنگى تاڭدا 2005-2006 جىلدارى كەزەككە تىركەلگەن تارازدىق تۇرعىندار اراسىنان 565 ادام قاناتقاقتى جوباعا قاتىسۋعا شەشىم قابىلداپتى. ولار وتىنىشتەرىن تاراز قالالىق اكىمدىگىنە جولداعان. ال اعىمداعى جىلدىڭ ەكىنشى توقسانىندا «نۇرلى جەر» تۇرعىن ءۇي باعدارلاماسىنىڭ شارتىنا سايكەس 205 قاتىسۋشى جاڭا باسپاناعا قول جەتكىزىپ, قونىس تويىن تويلايتىن بولادى.
ەلىمىزدە تۇراتىن ءاربىر ازاماتتىڭ باسپانالى بولۋىنا ارنالعان «نۇرلى جەر» باعدارلاماسىنىڭ جامبىلدىق جۇرتشىلىققا بەرەرى كوپ. وتكەن جىلى استانا كۇنى قارساڭىندا 800 وتباسىنىڭ پاتەرلى بولعانى ەل ەسىندە. بۇل كورسەتكىش اعىمداعى جىلى دا جالعاسىن تاۋىپ, تۇرعىندار قۋانىشىن ەسەلەي بەرەرىنە كۇمان جوق.
حاميت ەسامان,
«ەگەمەن قازاقستان»
جامبىل وبلىسى
