ادىلەت مينيسترلىگىنىڭ ءباسپاسوز قىزمەتى تاراتقان اقپاراتتا ايتىلعانداي, بەلگيا سوتى ەلىمىزدىڭ ۇلتتىق قورىنىڭ قازاقستان تاراپى الداۋمەن الىندى دەپ مالىمدەگەن, قازىرگى تاڭدا بۇعاتتاۋلى كۇيدەگى 530 ميلليون دوللارعا تەڭ اكتيۆىن اعىلشىن سوتى شەكتەۋدەن بوساتا الادى دەگەن قاۋلى شىعاردى. ەندىگى ۋاقىتتا قازاقستان تاراپى اكتيۆتىڭ وسى بولىگىن شەكتەۋدەن شىعارىپ الۋ ءۇشىن ۇلىبريتانيادا جۇمىس ىستەۋگە ءتيىس.
«بەلگيا سوتى ءستاتيدىڭ ستراتەگياسىن شايقالتىپ, ۋاقىتشا بۇعاتتاۋ ولاردىڭ تالاپتارىنداعى سومامەن جانە شىعىندار سوماسىمەن, ناقتى ايتقاندا 530 ميلليون اقش دوللارىمەن شەكتەلۋى كەرەك دەگەن قاۋلى شىعاردى. وسى قاۋلى بويىنشا قازاقستاننىڭ ۇلتتىق بانكىنە تيەسىلى, كولەمى 21,5 ميلليارد اقش دوللارىن قۇرايتىن اكتيۆتەر بۇعاتتان بوساتىلدى. سونىمەن قاتار بەلگيا سوتى بۇعاتتاۋعا نەگىزدىڭ بار نەمەسە جوق ەكەنىن انىقتاۋ ماسەلەسىن اعىلشىن سوتى شەشۋگە ءتيىس دەگەن قاۋلى شىعاردى», دەلىنگەن ادىلەت مينيسترلىگى تاراتقان حابارلامادا.
بەلگياداعى شەشىم انگليا جوعارعى سوتىنداعى ءستاتيدىڭ العاشقى جەڭىلىسىنەن سوڭ ءبىر اپتا ۋاقىت وتكەننەن كەيىن شىققانىن اتاپ ءوتۋ كەرەك. بۇعان دەيىن تۇماندى البيوندا مولدوۆالىق ازاماتتار وزدەرىنىڭ الاياقتىق ارەكەتتەرىنە قاتىستى ايعاقتار قاراستىرىلاتىن سوت پروتسەستەرىن توقتاتا الماعان بولاتىن.
«بۇل 2010 جىلى قازاقستانعا قارسى تالاپ-ارىزدار ءتۇسىرۋدى باستاعان ەكى مولدوۆان ازاماتى اناتول مەن گابريەل ءستاتيدىڭ ءساتسىز تالپىنىستارىنىڭ كەزەكتىسى. ستاتي شۆەتسياداعى تورەلىك سوت ارقىلى قازاقستاننان 4 ميلليارد اقش دوللارىن تالاپ ەتتى, الايدا ولارعا 500 ميلليون اقش دوللارىن بەرۋ تۋرالى ۇيعارىم جاسادى. بۇل قارجىنىڭ 199 ميلليون اقش دوللارى گاز وڭدەۋ زاۋىتىنىڭ قۇرىلىسىنا جۇمسالۋى مۇمكىن دەلىندى. كەيىننەن اقش-تا بولەك سوت پروتسەدۋرالارى بويىنشا الىنعان قۇجاتتار ارقىلى قازاقستان ءستاتيدىڭ تالاپتارى اۋقىمدى الاياقتىققا نەگىزدەلگەنى تۋرالى ايعاقتارعا قول جەتكىزدى.
انگليانىڭ جوعارعى سوتى ۇسىنىلعان ايعاقتاردى قاراستىرا كەلىپ, شۆەتسيا تورەلىك سوتىنىڭ كۇشى جويىلماعانىنا جانە الاياقتىق فاكتىسىن نازارعا الماعانىنا قاراماستان, وتكەن جىلدىڭ ماۋسىم ايىندا تورەلىك شەشىم الاياقتىق جولمەن الىنعانىنا باستاپقى دالەلدەر بار دەگەن قورىتىندى شىعاردى. وسى قورىتىندىعا ساي, بيىلعى جىلدىڭ قازان ايىندا الاياقتىق ارەكەت بويىنشا تىڭداۋ وتكىزۋ بەلگىلەندى», دەلىنگەن ادىلەت مينيسترلىگى تاراتقان اقپاراتتا.
كەشە ادىلەت ءمينيسترى مارات بەكەتاەۆ ۇلتتىق قور قاراجاتىنىڭ باسىم بولىگىنىڭ بۇعاتتان بوساتىلۋىنا قاتىستى پىكىر ءبىلدىردى. ونىڭ ايتۋىنشا, ءستاتيدىڭ ستراتەگياسىنا سىزات ءتۇستى دەپ ساناۋعا نەگىز بار.
– ستاتيلەردىڭ بۇعاتتالعان قاراجاتتىڭ كولەمىن ۇلعايتۋعا جانە ءۇشىنشى تۇلعالاردى وسى ىسكە تارتۋعا باعىتتالعان سرتاتەگياسىنا سىزات ءتۇستى. بۇل ستراتەگيا اۋەل باستان ەلىمىزگە قىسىم كورسەتۋگە باعىتتالعان بولاتىن. وزدەرى جاساعان سحەما وزدەرىنىڭ كوز الدىندا كۇيرەي باستادى. ستاتيلەر ەندى قانداي ارەكەت جاساسا دا, شىندىقتى جاسىرا المايدى,– دەدى م.بەكەتاەۆ.
وتكەن جىلدىڭ سوڭىندا New York Mellon بانكى مولدوۆالىق بيزنەسمەن اناتول ءستاتيدىڭ قازاقستان ۇكىمەتىنە قارسى ارىزى بويىنشا ەلىمىزدىڭ ۇلتتىق قورىنىڭ قارجىسىن بۇعاتتاعانى بەلگىلى بولعان ەدى. ءوز كەزەگىندە قازاقستان تاراپى بۇل شەشىمگە نارازىلىق ءبىلدىرىپ, انگليا جوعارعى سوتىنا تالاپ-ارىز ءتۇسىردى. بيىلعى جىلدىڭ قاڭتار ايىندا نيدەرلاند سوتى ۇلتتىق بانكتىڭ «ۇلتتىق قوردىڭ New York Mellon بانكىنە ساقتاۋعا سالىنعان اكتيۆىن بۇعاتتان بوساتۋ تۋرالى» ارىزىن قاناعاتتاندىرعان بولاتىن.
ارنۇر اسقار,
«ەگەمەن قازاقستان»
