ويتكەنى سوڭعى كەزدەرى جۇرىستەرى سۋىت, تۇستەرى سۋىق بوتەن ادامدار اۋىلعا قايتا-قايتا كەلگىشتەپ, كەنىش ماڭىن تورۋىلداۋدى جيىلەتىپ كەتكەن. ولار اڭگىمە اراسىندا جشس-مەن جاسالعان كەلىسىمشارتقا وراي قيىرشىق تاستار مەن قۇمنىڭ مول قورى جيناقتالعان كارەردى ونەركاسىپتىك نەگىزدە وڭدەۋ, ول ءۇشىن جارۋ ادىستەرىن قولدانۋ ويلارى بارىن جاسىرماعان.
حاتتا جازىلعانداي, سەرىكتەستىكتىڭ گرانيت وندىرەتىن اۋماقتى شيرەك عاسىرعا جالعا العانىنان تۇرعىندار حابارسىز بولىپ شىققان. سوعان قاراعاندا جۇرتشىلىقپەن اقىلداسۋ, وي-پىكىرلەرىن ءبىلۋ قاجەت بولماعان سىڭايلى. الەۋمەتتىك جاعدايى ءالسىز شاعىن ەلدى مەكەننىڭ شامىنا ءتيىپ, الاتايداي ءبۇلدىرىپ, ءارلى-بەرلى الاشاپقىنعا سالىپ قويعان كۇردەلى ماسەلەنىڭ كۇرمەۋىن شەشۋدىڭ ورنىنا جەرگىلىكتى بيلىك ورىندارىنىڭ شابان ۇيرەككە ۇقساعان قيمىلدارى اشۋ-ىزالارىن تۋدىرىپ, ونىڭ اقىرى جوعارى ورگاندارعا, پروكۋراتۋراعا قايرىلۋعا ءماجبۇر ەتكەن. قوعامدىق تىڭدالىم, اشىق اڭگىمە وتكىزىلمەۋدىڭ, ءىستىڭ ءمان-جايىنا تەرەڭىرەك قانىقتىرماۋدىڭ سالدارى وسىنداي وعاش وقيعاعا سوقتىرعان.
كوپشىلىكتىڭ الاڭدايتىن ءجونى بار. كونەكوز قاريالاردىڭ ايتۋلارىنشا, وتكەن عاسىردىڭ ورتا تۇسىندا وسى توڭىرەككە گەولوگيالىق بارلاۋ جۇمىستارى جۇرگىزىلىپ, ادام اعزاسىنا وتە زيان اۋىر مەتالدار قورى تابىلسا كەرەك. وسى سەبەپتى كارەر رادياتسيالىق قاۋىپتى ورىن سانالماي ما, اشىق ادىسپەن ءوندىرۋدىڭ اقىرى ادامدار ومىرىنە, قورشاعان ورتاعا زيانىن تيگىزىپ جۇرمەي مە دەگەن سانسىز ساۋالدارعا جاۋاپ تاپپاي ساندالىپ جۇرگەندەرىنە كوپ ۋاقىت بولىپتى. جالپى قاتەرلى ىسىك دەرتتەرى بويىنشا وبلىس رەسپۋبليكادا الدىڭعى ورىندا تۇر. ءوڭىر ەكولوگيالىق جاعىنان تازا سانالعانىمەن ادامداردىڭ اۋىر دەرتكە شالدىعۋى, شەتىنەۋى ازايار ەمەس.
اۋرۋدىڭ جاستار اراسىندا بەلەڭ الىپ بارا جاتقانى دا تولعاندىرماي قويمايدى. ونىڭ ءبىر ۇشىعى رادياتسيا مەن ۋلترافيولەتتى ساۋلەلەردەن قۇرالاتىن ۋران بەلدەۋلەرىنىڭ ەسىل, ايىرتاۋ اۋداندارىن كوكتەي وتەتىنىنە كەلىپ تىرەلەدى. وسى سەبەپتى كەسەلدىڭ تارالۋ بەلسەندىلىگى جوعارى اۋماققا جاتقىزىلعان. ادامداردى شوشىندىراتىنى وسى! الايدا ەل ءىشىن ەلەس قۇساپ كەزىپ, جەلدەي ەسىپ جۇرگەن الىپقاشپا ءسوز بە, الدە شىن مانىندە رادياتسيالىق قاۋىپ جوعارى ما دەگەن ساۋالدار سىرعىتپا جاۋاپتاردىڭ استىندا كومىلىپ قالعان ءتارىزدى. باعدارلامانىڭ جۇزەگە اسۋىنا ءۇزىلدى-كەسىلدى قارسى شىققان قاراعايلىقتاردىڭ ايتار ءۋاجى كوپ. ماسەلەن, كارەردى جارۋ, شيكىزاتتى اشىق ادىسپەن الۋ شارالارى اۋا قاباتىن بۇلدىرەدى, اينالانى شاڭداتىپ, ادام اعزاسى ۋلانادى, ءتۇرلى اۋرۋلار كوبەيەدى دەۋى نەگىزسىز ەمەس. جاۋاپتى تۇلعالاردىڭ ءبىر وكرۋگكە قارايتىن بۇلاق اۋىلىنداعى كۇردەلى جاعدايدان ساباق الماعانىنا قىنجىلادى.
وسىدان بىرنەشە جىل بۇرىن بۇلاق ەلدى مەكەنى جانىنان شەتەلدىك «اۋليە گولد مانينگ» جشس قويناۋى التىنعا تولى ورىندى يگەرۋگە قۇلشىنا كىرىسكەنىمەن, كەيىن العا باسقان اياعى كەرى كەتىپ, جاۋىر اتشا شوقىراقتاپ قالعان. 350 جاڭا جۇمىس ورنى قۇرىلادى, الىنعان پايدانىڭ ءبىر بولىگى الەۋمەتتىك سالالارعا جۇمسالادى, ونىمدىلىك ەكى ەسەگە دەيىن ارتادى, ءتۇستى مەتاللۋرگيانى دامىتۋدىڭ, بۇل سالاعا ينۆەستيتسيا قۇيۋدىڭ ءتيىمدى جولدارى قاراستىرىلادى دەگەن قاپ-قاپ ۋادەلەردىڭ ءبىرى دە ورىندالعان جوق.
ويتكەنى ەسكى جوبا ۋاقىت سىنىنا توتەپ بەرە الماعاندىقتان ءوندىرىستى توقتاتۋعا تۋرا كەلگەن. جۇرتشىلىقتىڭ اينالا توزادى, ەكولوگيالىق قۇلدىراۋعا ۇشىرايدى دەگەن جانايقايىن ەلەگەن ەشكىم بولمادى. ۇيىلگەن قوقىستى, ساي-سالانى قۋالاي اققان قالدىق سۋدى رەتتەۋ, جەر قويناۋلارىن قالپىنا كەلتىرۋ جايى ءالى شەشىلمەي كەلەدى. ەڭ وكىندىرەتىنى, جەراستى قازبا بايلىعى وندىرىلگەلى ونكولوگيالىق اۋرۋ ءورشىپ كەتكەن. بىلتىر 4 ادام كوز جۇمعان. ەسەپكە الىنعاندارى ەداۋىر.
بيىل كومپانيانىڭ جاڭارعان قۇرىلتايشىلارى كاسىپورىن سالامىز دەپ الاقاندارىن ىسقىلاپ وتىر. ونى ۋاقىت كورسەتەدى.
اۋداندىق اكىمدىكتەگىلەر جەر قويناۋىنا ەكونوميكالىق, ەكولوگيالىق, قۇقىقتىق ساراپتامالار جۇرگىزىلدى, رادياتسيالىق فون قالىپتى دەڭگەيدە, سانيتارلىق تالاپتارعا ساي دەپ قانشا جۇباتسا دا كورشى اۋىل جاعدايىنان شوشىنىپ, جۇرەكتەرى شايلىعىپ قالعان تۇرعىنداردىڭ وعان سەنىمنەن گورى كۇدىگى باسىم. كەنىش ماڭايىندا اتا-بابامىزدىڭ قورىمى, ءسىبىر جاراسىمەن اۋىرعان مالداردىڭ ولەكسەسى جەرلەنگەن ورىن بارى نەگە ەسكەرىلمەگەن دەگەن شىرىلعا دا قۇلاق تۇرەر جان تابىلماي تۇر.
قۇزىرلى ورگاندار اي-كۇننىڭ امانىندا تىنىش جاتقان اۋىلدى دۇرلىكتىرىپ قويعان جايتتىڭ ءتۇپ-توركىنىنە تەرەڭ بويلاپ, ءادىل ۇكىمىن بەرەدى دەگەن ۇمىتتەمىز. ۇلت ساۋلىعى ەڭ قىمبات قازىنا ەكەنىن تاعى ءبىر مارتە ەسكە سالعاندى ءجون كوردىك.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى,
ەسىل اۋدانى,
قاراعاي اۋىلى
