كەزدەسۋدىڭ ماقساتى – شەكارالاس ەلدەر مەن كورشىلەس وڭىرلەر اراسىنداعى ىنتىماقتاستىقتى جانە سەرىكتەستىكتى نىعايتۋ بويىنشا ناقتى ءىس-شارالاردى جوسپارلاۋ.
بۇدان كەيىن قىرعىز اعايىندار تاراز قالاسىنداعى «دوستىق» ۇيىنە كەلىپ, جامبىل وبلىسى تاۋار وندىرۋشىلەرىنىڭ ونەركاسىپ جانە اۋىلشارۋاشىلىق ونىمدەرىنىڭ كورمەسىن تاماشالادى. سونىمەن قاتار اياق-كيىم, توقىما جانە جەڭىل ونەركاسىپ بۇيىمدارىنىڭ جاسالۋ جولدارىمەن تانىستى. ال مۇنداعى قۇرىلىس زاتتارى, ەنەرگوۇنەمدى شامداردىڭ اۋقىمدى اسسورتيمەنتى, بىلعارى, ءسۇت جانە شۇجىق ونىمدەرى كەلۋشىلەردىڭ نازارىن وزىنە اۋداردى.
جالپى, جامبىل جانە تالاس وبلىستارىنا كوپتەگەن يگىلىكتىڭ, سونىمەن قاتار كەيبىر ماسەلەنىڭ دە ورتاق ەكەنى جاسىرىن ەمەس. جانە دە ەكى ەل اراسىنداعى دوستىق قارىم-قاتىناس كۇن ساناپ ارتىپ كەلەدى. بۇل جايىندا قوس وبلىس باسشىلارى باس قوسقان جيىندا ايتىلدى. جامبىل وبلىستىق تۋريزم باسقارماسىنىڭ باسشىسى قارلىعاش ارالبەكوۆا وڭىردەگى تۋريزم سالاسىنىڭ دامۋى مەن كونە اۋليەاتانىڭ كيەلى ورىندارى جونىندە ءسوز قوزعاپ, جامبىل جانە تالاس وبلىستارىنىڭ بۇگىنگى قارىم-قاتىناسى جاڭا جەتىستىكتەرگە جول اشاتىنىن اتاپ ءوتتى.
ءوز سوزىندە تالاس مەملەكەتتىك ۋنيۆەرسيتەتىنىڭ رەكتورى ايبەك ۇپەنوۆ اتالعان جوعارى وقۋ ورنىندا 15 ماماندىق بويىنشا ءبىلىم الىپ جۇرگەن 3 مىڭ ستۋدەنتتىڭ جۇزدەن استامى جامبىلدىق جاستار ەكەنىنە توقتالدى.
نەگىزىنەن جامبىل وبلىسىنىڭ اۋىل شارۋاشىلىعىنا قاجەتتى سۋدىڭ 80 پايىزعا جۋىعى قىرعىز ەلىنەن كەلەدى. اتالعان جيىندا تالاس وزەنى تۋرالى مەملەكەتارالىق سۋ ءبولىسۋ بويىنشا بەكىتىلگەن كەستەگە سايكەس, قازاقستان رەسپۋبليكاسى مەن قىرعىز رەسپۋبليكاسىنىڭ اراسىنداعى سۋ رەسۋرستارىن ءادىل ءبولۋ, قازاقستانداعى اۋىلشارۋاشىلىق ونەركاسىپتەرى ءۇشىن كوج جانە رايس كانالدارى بويىنشا سۋارۋ ۋاقىتىندا ءۇزىلىسسىز سۋ بەرۋمەن قامتاماسىز ەتۋ سياقتى ماسەلەلەر تالقىلاندى. بۇل رەتتە تالاس وبلىستىق مەملەكەتتىك سۋ شارۋاشىلىعى مەكەمەسىنىڭ باسشىسى بولات باتىرقۇلوۆ جامبىل جەرىنە قاجەتتى سۋدىڭ ءوز مولشەرىندە ءبولىنىپ جاتقانىن ايتتى.
كەزدەسۋ بارىسىندا جامبىل وبلىسىنىڭ اكىمى اسقار مىرزاحمەتوۆ پەن قىرعىز رەسپۋبليكاسى ۇكىمەتىنىڭ تالاس وبلىسىنداعى وكىلەتتى وكىلى مارات مۇراتاليەۆ ءوزارا ىنتىماقتاستىق تۋرالى مەموراندۋمعا قول قويدى. مۇندا اۋىل شارۋاشىلىعى مەن سۋ ءبولىسۋ تۋرالى مەملەكەتارالىق ماسەلەلەر جۇيەلەنگەن. سونداي-اق قۇجاتتا جامبىل وبلىسىنان سيىر ەتىن يمپورتتاۋعا كۆوتا ءبولۋ, جامبىل وبلىسىنا تالاس وبلىسىنان جەمىس-كوكونىستەردىڭ ەرتە پىسەتىن ونىمدەرىن جىلىجايعا جەتكىزۋگە كومەكتەسۋ, تالاس وبلىسىنا بيداي, ۇن جانە ەت ونىمدەرىن تاسىمالداۋ بويىنشا ءىس-شارالاردى ۇيىمداستىرۋ, جامبىل وڭىرىنە ەرتە كوكتەمدىك شارۋاشىلىق ونىمدەرىنىڭ تۇرلەرىن جەتكىزۋ باعىتىنداعى جۇمىستار دا قامتىلعان. سونىمەن قاتار بولاشاقتا قوس وبلىس اراسىنداعى ءتۋريزمدى دامىتۋ ماسەلەسىندە ەكى ءوڭىردىڭ تۋريزم باسقارمالارىنىڭ باسشىلارى اراسىندا دا كەلىسىمدەر جاسالدى.
ساپاردىڭ ىسكەرلىك بولىگى اياقتالعان سوڭ «بالاساعۇن» ورتالىق كونتسەرت زالىندا «بىرلىگىمىز جاراسقان!» اتتى جامبىل وبلىسى مەن تالاس وبلىسى كوركەمونەرپازدارىنىڭ قاتىسۋىمەن فەستيۆال ءوتتى. مۇندا قازاق پەن قىرعىزدىڭ ايگىلى ونەر قايراتكەرلەرىنىڭ شىعارمالارى ورىندالىپ, كوپشىلىكتىڭ كوڭىلىنەن شىقتى. ال بۇدان كەيىن قىرعىز اعايىندار اۋليەاتا ءوڭىرىنىڭ تاريحي-مادەني ەسكەرتكىشتەرىمەن تانىستى.
حاميت ەسامان,
«ەگەمەن قازاقستان»
جامبىل وبلىسى
