«مەن مباپپەنىڭ ترانسفەر نارقىن ايتقانىمدى قالايسىزدار ما؟ ەگەر سىزدەر ماعان ميلليارد ەۋرو ۇسىنساڭىزدار دا مەن ونى ساتپايمىن», دەپ مالىمدەگەن ول Sky Sports باسىلىمىنا. مباپپە پسج كلۋبىنا وتكەن جىلدىڭ جاز ايىندا «موناكو» ساپىنان اۋىسىپ كەلگەن ەدى.
ايتا كەتەيىك, پاريج كومانداسى جاس فۋتبولشىنى ءبىر جىل جالعا, كەيىننەن 180 ملن ەۋروعا ساتىپ الۋ كەلىسىمشارتىمەن العان ەدى. ول ءبىر ماۋسىم ىشىندە پسج ساپىندا 21 گول سوعىپ ۇلگەردى.
شۆەتسيا اتاعىن قورعاپ قالدى
حوككەيدەن دانيادا وتكەن الەم چەمپيوناتىنىڭ فينالىندا شۆەتسيا قۇراماسى شۆەيتسارياعا قارسى ويناپ, بۋلليت سەرياسىندا جەڭىسكە جەتى.
ەكى قۇراما اراسىنداعى فينالدىق تەكەتىرەستىڭ نەگىزگى ۋاقىتى 2:2 ەسەبىمەن تەڭ اياقتالدى. شۆەيتساريا قۇراماسى ساپىنان شايبانى نينو نيدەررايتەرا (17-مينۋت) مەن تيمو مايەرا (24-مينۋت) سوقسا, شۆەتسيالىقتاردان گۋستاۆ نيۋكۆيست (18-مينۋت) جانە ميكا زيبانەدجاد (35-مينۋت) ەكى گولمەن قارىمتا قايتاردى. ال بۋلليت سەرياسىندا شۆەتسيا قۇراماسىنىڭ حوككەيشىلەرى مەرگەندىك تانىتىپ, 2:1 ەسەبىمەن باسىم ءتۇستى. وسىلايشا, شۆەتسيا بىلتىرعى الەم چەمپيونى اتاعىن ساقتاپ قالدى.
ءۇشىنشى ورىندى كانادا قۇراماسىن 1:4 ەسەبىمەن جەڭگەن اقش حوككەيشىلەرى يەلەندى.
نادال ءوز رەكوردىن جاڭارتتى
يسپانيالىق تەننيسشى رافاەل نادال ريمدە (يتاليا) وتكەن «ماستەرس» ءتۋرنيرىنىڭ فينالىندا جەڭىسكە جەتىپ, اتالعان جارىستىڭ سەگىز دۇركىن چەمپيونى اتاندى.
وسىلايشا, نادال «ماستەرس» سەرياسىنداعى 32-ءشى جۇلدەسىنە قول جەتكىزىپ, ءوز رەكوردىن جاڭارتتى. ەندى ول ەكىنشى ورىندا كەلە جاتقان رودجەر فەدەرەردەن ەكى جۇلدەگە وزىپ كەتتى.
سونىمەن قاتار بۇل يسپانيالىق تەننيسشىنىڭ كارەراسىنداعى 78-ءشى جۇلدەسى. 1968 جىلدان بەرى جەكەلەي سايىستاعى جۇلدەلەر سانى بويىنشا ءتورتىنشى ورىنعا كوتەرىلدى. ءنادالدىڭ الدىندا يۆان لەندل (94), رودجەر فەدەرەر (97) جانە دجيممي كوننورس (109) بار.
ايتا كەتەيىك, نادال ريمدەگى جەڭىسى ءۇشىن 1000 رەيتينگتىك ۇپاي الىپ, الەمنىڭ ءبىرىنشى راكەتكاسى اتاندى.
دايىنداعان ءالي بيتورە,
«ەگەمەن قازاقستان»
