نەگىزى چەمپيوناتتى تاماشا باستاعان «ينتەر» بەلورتاعا كەلگەندە تۇرالاپ قالدى. كەرەك ەمەس جەردە ۇپاي جوعالتىپ, اۋتسايدەرلەرمەن تەڭ ويناپ, ابدەن بەرەكەسى قاشتى. بىراق باس باپكەر لۋچانو سپالەتتي جاعدايدى قالپىنا كەلتىردى. 37-تۋردا «ينتەر» ءوز الاڭىندا «ساسسۋولوعا» جەڭىلىپ, جاعدايدى ۋشىقتىرىپ الدى. ءتىپتى كوپتەگەن فاناتتار كەلەر جىلى ەۋروپا ليگاسىندا وينايتىن بولدىق دەپ كوڭىلدەرى ءتۇسىپ تە كەتتى. بىراق...
بىراق نەگىزگى باسەكەلەس «لاتسيو» كۇتپەگەن جەردەن وپىق جەدى. «ا» سەرياسىنداعى ورنىنان ايىرىلىپ قالعان اۋتسايدەر «كراتونەمەن» 2:2 تەڭ ءتۇسىپ, 2 ۇپايعا ءزارۋ بولىپ قالدى. ميلاندىق كلۋبتىڭ ءۇمىت وتى قايتا جاندى. كۇنتىزبەنىڭ دە كەستەسى الدىن الا بولجانىپ جاسالعانداي, سوڭعى تۋردا «ينتەر» مەن «لاتسيو» كەزدەسەتىن بولدى. ريم كومانداسى ءوز الاڭىندا جەڭىلىپ قالماي, تەڭ تۇسكەننىڭ وزىندە ۇزدىك تورتتىكتەن تۇسپەيتىن. ءتىپتى, ويىننىڭ 9-مينۋتىندا گول سوعىپ, ەسەپتە العا شىقتى. جيىرما مينۋتتان سوڭ دامبروزيو تارازى باسىن تەڭەستىرىپ تاستادى. دەگەنمەن, اندەرسوننىڭ گولىنان سوڭ الاڭ يەلەرى قايتادان جەڭىپ جاتتى. ارگەنتينا قۇراماسىنان ورىن الا الماي جۇرگەن ماۋرو يكاردي پەنالتيدەن گول سوعىپ, ەسەپتى قايتا تەڭەستىردى. 79-مينۋتتا سەناد لۋليچ قىزىل قاعاز الىپ, «لاتسيونى» جار شەتىنە تاقادى. جىعىلعانعا جۇدىرىق بولعانداي 81-مينۋتتا ماتياس ۆەسينو بۇرىشتامادان گول سوعىپ, «ينتەرگە» جەڭىس سىيلادى. وسى گولدىڭ ارقاسىندا قوس كوماندانىڭ ۇپايى تەڭەسىپ, جەكە ويىندار كورسەتكىشى بويىنشا «ينتەر» 4-ورىنعا شىقتى. سەبەبى «ينتەردىڭ» الاڭىندا وتكەن العاشقى اينالىمنىڭ ويىنى 0:0 اياقتالىپ ەدى.
وسىنداي دراماعا تولى ماتچ «ينتەر» فاناتتارىنىڭ ەڭسەسىن كوتەرىپ تاستادى. اراعا التى جىل سالىپ «ينتەر» چەمپيوندار ليگاسىنا قايتا ورالدى. سونىمەن قاتار يتاليانىڭ تاعى ءبىر داڭقتى كلۋبى «پارما» «ا» سەرياسىنا ءوتتى. ولار وسىدان
3 جىل بۇرىن بانكروت بولىپ, «د» سەرياسىنا ءتۇسىپ قالعان بولاتىن. داعدارىستان جول تاپقان «پارما» قىتايلىق ينۆەستوردىڭ ارقاسىندا قايتا كوتەرىلدى. كلۋبتىڭ ۆيتسە-پرەزيدەنتى ەرنان كرەسپو كەلەسى جىلعا جويقىن جوسپارلار قۇرىپ وتىر.
«پارما» دەمەكشى, وسى كلۋبتىڭ ساپىندا اتى شىققان دجانلۋيدجي بۋففون سوڭعى تۋردا «يۋۆەنتۋسپەن» قوش ايتىسىپ, ستاديونعا جينالعان قالىڭ كورەرمەننىڭ جۇرەگىن ەلجىرەتتى. «ۆەرونامەن» وتكەن ماتچتىڭ 63-مينۋتىندا بۋففون الاڭداعى ورنىن ارىپتەسىنە بوساتىپ بەرىپ, ەندى «يۋۆەنتۋس» قاقپاسىنىڭ كىلتى مەندە ەمەس دەگەندى ءبىلدىردى. تۋريندىك جانكۇيەرلەر اتى اڭىزعا اينالعان قاقپاشىنى تىك تۇرىپ شىعارىپ سالدى. يتاليالىق جۋرناليستەردىڭ جازۋىنا قاراساق, كوز جاسىنا ەرىك بەرىپ, بۋففونمەن بىرگە جىلاعان جانكۇيەردە ەسەپ بولماپتى.
ايتپاقشى ءدال وسىنداي وقيعاعا شامالاس جاعداي يسپانيا لا-ليگاسىندا دا ورىن الدى. «بارسەلونا» – «رەال سوسەداد» اراسىنداعى ويىننىڭ 82-مينۋتىندا اندرەاس ينەستا الاڭداعى ورنىن پاكو الكاسەرگە بوساتىپ بەردى. اتاقتى جارتىلاي قورعاۋشى «بارسەلونا» ساپىنداعى سوڭعى ويىنىن وتكىزدى. «نوۋ كامپ» تريبۋنالارى دا اندرەاستى قيماستىقپەن شىعارىپ سالدى. ايتا كەتەيىك, ينەستانىڭ سوڭعى ماتچىنا اراب تۇبەگىندە جۇرگەن جان-جولداسى حاۆي دە كەلىپ تاماشالادى. الەم فۋتبولىنىڭ تاريحىندا حاۆي مەن ينەستا تاندەمى التىن ارىپتەرمەن جازىلارى ءسوزسىز. پيرەنەي تۇبەگىنىڭ «مەن» دەگەن ءباسپاسوزى بۇل ەكەۋىنىڭ «بارسەلونامەن» قوش ايتىسقانىن يسپان فۋتبولىنىڭ ءبىر ءداۋىرى اياقتالعانىمەن تەڭدەستىرىپتى.
جاقىندا عانا ەۋروپا ليگاسىن جەڭگەن فەرناندو توررەس تە فۋتبولمەن قوشتاسىپ, «اتلەتيكو» جانكۇيەرلەرىنە العىسىن ءبىلدىردى. العىر شابۋىلشىنىڭ قوشتاسۋى دا ءبىرشاما جانكۇيەردىڭ كوڭىلىن بوساتىپ كەتتى.
ەرمۇحامەد ماۋلەن,
«ەگەمەن قازاقستان»
