ەرلان ساعاديەۆتىڭ ايتۋىنشا, 2018 جىلى ۇبت 15-ءشى رەت وتكىزىلەدى. وسى جىلدار ىشىندە ۇبت-عا 1,5 ملن استام مەكتەپ ءبىتىرۋشى قاتىسقان. بۇل بارلىق مەكتەپ بىتىرۋشىلەردىڭ 80%-ىن قۇرايدى.
ءمينيستردىڭ ايتۋىنشا, 2017 جىلعا دەيىن ۇبت ءۇش فۋنكتسيانى اتقاردى: 11 جىلدىق وقۋدى اياقتاۋ قورىتىندىسى رەتىندەگى ءبىتىرۋ ەمتيحانى, جوعارى وقۋ ورىندارىنا ءتۇسۋ ەمتيحانى جانە تۇلەكتەرگە مەملەكەتتىك گرانتتاردى تاعايىنداۋ مەحانيزمى.
«وزدەرىڭىز بىلەتىندەي, تەستىلەۋدىڭ بۇل فورماتى 2017 جىلى وزگەردى. ەندى قورىتىندى اتتەستاتتاۋ نەمەسە ءبىتىرۋ ەمتيحاندارى مەكتەپتەردە وتكىزىلەدى, ال ۇبت – جوعارى وقۋ ورنىنا ءتۇسۋ جانە مەملەكەتتىك گرانتتاردى تاعايىنداۋ ەمتيحانى بولىپ قالىپ وتىر», — دەدى ە. ساعاديەۆ.
قورىتىندى اتتەستاتتاۋ, باسقا سوزبەن ايتقاندا مەكتەپتەگى ءبىتىرۋ ەمتيحانى 29 مامىر مەن 9 ماۋسىم ارالىعىندا وتكىزىلەدى. ەمتيحان 5 ءپان بويىنشا, ونىڭ ىشىندە 4 مىندەتتى جانە 1 تاڭداۋ پانىنەن وتكىزىلەدى. بارلىق ەمتيحاندار اۋىزشا, جازباشا جانە تەستىلەۋ تۇرلەرىنە بولىنگەن. ءبىتىرۋ ەمتيحاندارىنىڭ ماتەريالدارىن ۇلتتىق تەستىلەۋ ورتالىعى دايىندادى جانە ارنايى بايلانىس جەلىسى ارقىلى بارلىق وبلىستىق ءبىلىم باسقارمالارىنا بيىلعى 25 مامىرعا دەيىن جەتكىزىلەتىن بولادى.
«2018 جىلى ۇبت فورماتى وزگەرمەيدى, ياعني بىلتىرعى جىلعى فورماتقا سايكەس وتكىزىلەدى. ۇبت-نىڭ وتكىزىلۋ مەرزىمى جانە بەرىلەتىن تەست سۇراقتارىنىڭ سانى دا وزگەرمەيدى», — دەدى ءبىلىم جانە عىلىم ءمينيسترى.
ۇبت 20 ماۋسىم مەن 1 شىلدە ارالىعىندا 167 ۇبت وتكىزۋ پۋنكتتەردە وتكىزىلەدى. بارلىق تەست سۇراقتارىنىڭ سانى — 120. ماكسيمالدى بالل — 140. شەكتى بالل — 50 بالل, ۇلتتىق جوعارى وقۋ ورىندارىنا ءتۇسۋ ءۇشىن كەمىندە 65 بالل جيناۋ قاجەت.
بۇگىنگى كۇنى بارلىق ۇبت پاندەرى بويىنشا تەست سۇراقتارىنىڭ بازاسى قۇرىلعان. 2018 جىلى تەست سۇراقتارىنىڭ بازاسى 50%-كە جاڭارتىلدى. تەست سۇراقتارى فۋنكتسيونالدىق ساۋاتتىلىققا, ياعني ءارى قاراي وقۋعا قابىلەتىن, لوگيكالىق ويلاۋ دەڭگەيىن, بازالىق تۇسىنىكتەرىن انىقتاۋعا بەيىمدەلگەن. تاپسىرمالاردىڭ فورمالارى مەن مازمۇنىنىڭ ءارتۇرلى بولۋى تۇلەكتىڭ ناقتى ءبىلىمى مەن قابىلەتىن باعالاۋعا مۇمكىندىك بەرەدى.
وسى جىلعى ۇبت-عا قاتىسۋعا ءوتىنىش بەرگەن مەكتەپ بىتىرۋشىلەردىڭ سانى 102 442 نەمەسە جالپى بىتىرۋشىلەر سانىنىڭ 70%-ءىن قۇرايدى. ونىڭ ىشىندە 77 مىڭ نەمەسە 76%-ءى قازاق تىلىندە, 25 مىڭى نەمەسە 24% — ورىس تىلىندە تاپسىرادى. بىلتىرعى جىلمەن سالىستىرعاندا ۇبت تاپسىرۋعا ءوتىنىش بەرگەن جالپى بىتىرۋشىلەردىڭ سانى 10 مىڭعا ءوسىپ وتىر. ۇبت-عا قاتىساتىن بالالاردىڭ ۇلەسى 70% قۇراپ, قازاق تىلىندە تاپسىراتىن بالالاردىڭ سانى 5%-كە ءوستى. بيىل بىتىرۋشىلەرگە العاش رەت ۇبت-نى اعىلشىن تىلىندە تاپسىرۋ مۇمكىندىگى بەرىلەدى.
مينيسترلىك ۇبت ناتيجەلەرى بويىنشا مەكتەپتەردىڭ رەيتينگىن جۇرگىزبەيدى.
تۇلەكتەردىڭ ۇبت-عا دايىندىعى ءۇشىن سىنامالىق ونلاين تەستىلەرىنىڭ فۋنكتسيونالى جەتىلدىرىلدى. ەندى ودان ۇيدە وتىرىپ-اق وتۋگە بولادى. بۇگىنگى كۇنگە دەيىن 145 مىڭ رەت ونلاين تەست تاپسىرىلعان.
سونىمەن قاتار, مەكتەپتەردىڭ سۇرانىسى بويىنشا وسى جىلدىڭ باسىنان بەرى وڭىرلەردە سىنامالىق تەستىلەۋ قاعاز تۇرىندە 390 مىڭ رەت الىندى. سونداي-اق, مەكتەپتەرگە قوسىمشا 185 مىڭ سىنامالىق تەست كىتاپشالارىن جىبەرۋ كوزدەلگەن. وسىلايشا, وسى جىلى ءار ءبىتىرۋشى ۇبت باستالعانشا ورتا ەسەپپەن 7 رەت سىنامالىق تەستىلەۋدەن وتەدى.
تەست تاپسىرۋشىلارعا ارنالعان جاعدايدى جاقسارتۋ ماقساتىندا بيىل كەلەسى جاڭالىقتار ەنگىزىلۋدە:
ءار تۇلەككە ۇبت سەرتيفيكاتىمەن بىرگە, بەيىندىك پاندەردىڭ كومبيناتسياسى بار اقپاراتتىق پاراقشانى بەرۋ;
قانداي ماماندىقتارعا بارۋعا بولاتىنى تۋرالى ماماندىقتار ءتىزىمى;
ۇبت-عا دالەلدى سەبەپپەن قاتىسا الماعان جاعدايدا ۇبت-نى كەلەسى لەكتە تاپسىرۋ نەمەسە كت تاپسىرۋ مۇمكىندىگىن بەرۋ;
ەرەكشە ءبىلىم الۋ قاجەتتىلىگى بار بالالاردى جەكە كومەكشىمەن, سونداي-اق سۋردواۋدارماشى ماماندارىمەن قامتاماسىز ەتۋ;
قازاقستان بويىنشا تەگىن قوڭىراۋ جاساۋعا بولاتىن بىرىڭعاي call-ورتالىقتى ىسكە قوسۋ.
بيىلدان باستاپ «التىن بەلگىگە» يە بولعان تۇلەكتەر ءبىلىم بەرۋ گرانتتارىن تاعايىنداۋ كەزىندە تەك بالدارى تەڭ بولعان جاعدايدا عانا باسىم قۇقىققا يە بولادى.
وسى جىلدىڭ تامىز جانە كەلەسى جىلدىڭ قاڭتار ايلارىندا جوو-نىڭ اقىلى بولىمىنە ءتۇسۋ مۇمكىندىگى بۇرىنعىسىندا ساقتالادى. وسى نورمانىڭ ارقاسىندا 30 مىڭنان استام جاستارعا جوعارى ءبىلىم الۋ قۇقىعى بەرىلگەن.
ماسەلەنى قاراۋ قورىتىندىسى بويىنشا قر پرەمەر-ءمينيسترى باقىتجان ساعىنتاەۆ بىرىڭعاي ۇلتتىق تەستىلەۋ ارقاشان دا الەۋمەتتىك ماڭىزدى ماسەلە ەكەنىن اتاپ ءوتتى.
وسىعان بايلانىستى ءبىلىم جانە عىلىم مينيسترلىگىنە اكىمدەرمەن بىرلەسىپ, بارلىق ىقتيمال سىن-تەگەۋرىندەردى ەسكەرە وتىرىپ, تالداۋ جۇرگىزۋ جانە ۇبت-نى ءتيىستى دەڭگەيدە وتكىزۋدى قامتاماسىز ەتۋ تاپسىرىلدى.
ىشكى ىستەر, دەنساۋلىق ساقتاۋ مينيسترلىكتەرى مەن ۇلتتىق قاۋىپسىزدىك كوميتەتىنە ۇبت قاتىسۋشىلارىنىڭ قاۋىپسىزدىگىن قامتاماسىز ەتۋ بويىنشا كەشەندى شارالار قابىلداۋ قاجەت. اكىمدەرگە مەكتەپتەردە قورىتىندى ەمتيحانداردى ۇيىمداستىرۋ جانە ۇبت وتكىزۋ ماسەلەلەرىن جەكە باقىلاۋعا الۋ تاپسىرىلدى.
باقىلاۋ جۇمىستارى قر پرەمەر-ءمينيسترىنىڭ ورىنباسارى ەربولات دوساەۆقا جۇكتەلەدى.
