«سىن تۇزەلمەي, ءمىن تۇزەلمەيدى» دەيدى حالقىمىز. كەمشىلىكتى كورسەتىپ, ونىڭ جويىلۋىنا اتسالىسۋ دا ازاماتتىق پارىز. جۋىردا عانا تاراز قالاسىنىڭ اكىمى بولىپ تاعايىندالعان عالىمجان ءابدىرايىموۆ شاھار كوشەلەرىن ارالاپ, بىرقاتار كەمشىلىكتەردى وتكىر سىنادى. ماسەلەن, قالا كوشەلەرىنىڭ ءسانىن كەتىرىپ تۇرعان جابايى جارنامالار جايىن ايتقان اكىم ءتيىستى مەكەمە باسشىلارىنا اتالعان كەمشىلىكتى جويۋ جونىندە تاپسىرمالار بەردى.
قالا كوشەلەرىن ارالاۋ بارىسىندا اكىم اباي داڭعىلىنىڭ بويىندا ورنالاسقان جامبىل جاباەۆ اتىنداعى №5 مەكتەپ-گيمنازيانىڭ ماڭىنداعى جاساندى جول كەدەرگىسىنىڭ جارتىسى جوق ەكەنىن دە سىنادى. سونىمەن قاتار جول بويىنداعى تال-داراقتاردىڭ بىركەلكى اكتەلۋى, سۋ قۇبىرى جۇيەلەرىنىڭ قاقپاعى مەن جول بەلگىلەرىنىڭ ورناتىلۋى دا نازارعا الىندى.
قالانىڭ اباي جانە فۋرمانوۆ كوشەلەرىنىڭ قيىلىسىندا كانال بار. ال وسى كانالدىڭ بويىنا اسىرەسە جاز مەزگىلىندە قوقىس تولىپ قالادى. ءارى-بەرى وتكەن تۇرعىنداردىڭ قالدىقتاردى وسىندا لاقتىرىپ كەتە بەرەتىنى دە جاسىرىن ەمەس. اكىمنىڭ ايتۋىنشا, ەندىگى جەردە اتالعان كانال بويىنا تازارتۋ جۇمىستارىن جۇرگىزۋ ۇنەمى قاداعالاۋدا بولادى.
تاراز قالاسىنداعى ەڭ ءىرى ساۋدا نىساندارىنىڭ بىرىنەن سانالاتىن «اۋىل-بەرەكە» بازارىنا باراتىن جولدىڭ دا بۇل كۇندە توزىعى جەتكەن. سونداي-اق تار جولمەن ءجۇرۋدىڭ ءوزى قيىن. ارينە, بۇل ماسەلە دە قالا حالقىن الاڭداتپاي قويمايدى. ەگەر قالا اكىمىنىڭ ءتيىستى مەكەمەلەرگە بەرگەن تاپسىرماسى جۇزەگە اساتىن بولسا, بازارعا اپاراتىن ەسكى جولدىڭ جاڭالاناتىن كۇنى الىس ەمەس. ەندى ءتيىستى كاسىپكەرلىك قۇرىلىمدار قالا جولدارىنىڭ ماڭىزدى بولىگى سانالاتىن جولدى جوندەۋگە ق ۇلىق تانىتسا بولعانى.
تاعى ءبىر ايتا كەتەتىن ماسەلە, بۇگىنگى تاڭدا تاراز قالاسىندا ىرگەتاسى قالانعان 14-شاعىن اۋداندى ىستىق سۋمەن قامتاماسىز ەتەتىن سۋ-قۇبىر جۇيەلەرى نەگىزىنەن اتالعان «اۋىل-بەرەكە» بازارىنىڭ ماڭىنان وتەدى. بىراق قوماقتى قاراجات كەتكەن الگى قۇبىر جەلىسى دۇرىس ورناتىلماعان. سونىمەن قاتار بازار ماڭىنداعى سۋ قويماسىنا قوقىس تاستاۋشىلار سانى دا ارتۋدا. بازارداعى ساۋدا ورىندارىنان, ونداعى اسحانالاردان كۇن سايىن قىرۋار قوقىس شىعادى. ەندى سۋ قويماسىنا تاستالعان سول قوقىستاردان سوڭ اتالعان قويمانىڭ جايىن ەلەستەتۋدىڭ ءوزى قيىن. سوندىقتان دا بۇل ماسەلەنىڭ ءبىر ايدىڭ ىشىندە شەشىلەتىنىن ايتتى ع.ءابدىرايىموۆ.
«اكىم بول, حالقىڭا جاقىن بول» دەيدى حالىق. كونە شاھاردا كوكەيكەستى ماسەلە ارينە كوپ. ەندى سول ماسەلەنىڭ ءبارى دە رەتىمەن شەشىمىن تاپسا, شاھاردىڭ ساۋلەتى بۇگىنگىدەن دە ارتىپ, تارازدىڭ توتىداي تارانىپ, تۇعىرىنان تايمايتىنى انىق.
حاميت ەسامان,
«ەگەمەن قازاقستان»
جامبىل وبلىسى
