ماماندار الدىندا تەاتر اشۋ ءۇشىن الدىمەن اكتەرلەر تابۋ ماسەلەسى تۇردى. وسى وي جەتەگىندە تەاتردى قۇرىلعان كۇننەن بۇگىنگە دەيىن جەمىستى باسقارىپ كەلە جاتقان باسشى, قازاقستاننىڭ ەڭبەك سىڭىرگەن مادەنيەت قىزمەتكەرى, «وداق مادەنيەتىنىڭ ۇزدىك قىزمەتكەرى», «قۇرمەت» وردەنىنىڭ يەگەرى نۇرنياز مۇقانوۆ ت.جۇرگەنوۆ اتىنداعى ونەر اكادەمياسىنا ارنايى بارىپ, جاس تۇلەكتەردى جاڭا تەاترعا جۇمىسقا شاقىردى. وقۋ ورنىن بىتىرگەن بويدا ماڭعىستاۋدى بەتكە العان وندىردەي جاس 50 اكتەر كەلە ىسكە كىرىستى. تاجىريبەلى باسشىعا تالاپتى جاستار – اكتەرلەر مەن جاس رەجيسسەر جولىقتى. رەجيسسەرلىك تىزگىندى قولىنا العان گۇلسينا مەرعاليەۆا اكتەرلەرمەن بىرگە تىنباي جۇمىستانىپ, ع.مۇسىرەپوۆتىڭ «قىز جىبەك» جانە ت.الىپباەۆتىڭ «توميريس» شىعارمالارىمەن ساحنا شىمىلدىعىن اشتى. قازىر تەاترعا جاس مامانداردىڭ قىزمەتكە كەلۋى تۇراقتى سيپات الدى. جاس, جاڭاشىل, جەتىستىكتەرى مول, جوسپار-جوبالارى كۇردەلى تەاترعا جاستاردىڭ قىزىعۋشىلىعى باسىم.
ون بەس جىل تەاتر ۇجىمى ءۇشىن شىنايى ىزدەنىستىڭ, قالىپتاسۋدىڭ كەزەڭى بولدى, ولار كورەرمەن كوڭىلىنەن شىعۋدى باستى ورىنعا قويدى. كورەرمەن جۇرەگىنە جول تابۋ قاجەتتىگى تەاتر باسشىلىعى مەن اكتەرلەرىنىڭ ءاربىر قويىلىمعا, ءاربىر ءسوز بەن ارەكەتكە, ءتىپتى ساحنانىڭ تاقىرىپقا ساي بەزەندىرىلۋى مەن كەيىپكەرلەردىڭ تارتىمدى كوستيۋمدەرىنە دەگەن تالاپتى, وزىندىك سىندى كۇشەيتتى. بۇگىندە الەم جانە قازاق كلاسسيكتەرىنىڭ 72 شىعارماسىن ساحنالاپ, رەسپۋبليكالىق, حالىقارالىق تەاتر بايقاۋلارىندا بىرنەشە مارتە توپ جارىپ, جۇلدە ەنشىلەگەن, رەسپۋبليكاداعى ۇزدىك ءۇش تەاتردىڭ ءبىرى سانالعان تەاتر جەتىستىگىندە وسى شىمىر سىن, تەگەۋرىندى تالاپ جانە جۇرت الدىنداعى جاۋاپكەرشىلىك پەن ساحناعا دەگەن قۇرمەت جاتىر.
جاستار ويى مەن ويناۋىنىڭ جەمىسى – 2004 جىلى ەكلەكتيكا جانرىندا ابايدىڭ 38-ءشى قارا ءسوزى جەلىسىندە ساحنالانعان «38 نەمەسە قاراقۇرت» قويىلىمى VII «شابىت» حالىقارالىق شىعارماشىل جاستار فەستيۆالىندە, 2009 جىلى قازان قالاسىندا تۇركى حالىقتارىنىڭ ءىح حالىقارالىق «ناۋرىز» فەستيۆالىندە, 2007 جىلى ا.س.پۋشكيننىڭ «موتسارت ي سالەري» پەساسى نەگىزىندە دايىندالعان «يلي موتسارت؟ يلي سالەري؟» سپەكتاكلى كاير قالاسىندا وتكەن حالىقارالىق ەكسپەريمەنتالدى تەاترلار فەستيۆالىندە, ءا.كەكىلباەۆ «شىڭىراۋ» پوۆەسى بويىنشا جازىلعان درامالىق قويىلىمنىڭ 2016 جىلى اقتاۋ قالاسىندا وتكەن ء«ابىش الەمى» ءبىرىنشى رەسپۋبليكالىق تەاتر فەستيۆالىندە باس جۇلدەنى يەلەنۋى – تەاتردىڭ شىعارماشىلىق تەگەۋرىنىنىڭ قانشالىقتى كوتەرىلگەندىگىن ايعاقتايتىن دالەل. ال تەاتر ۇجىمى ەنشىلەگەن الدىڭعى ورىندار مەن ارناۋلى جۇلدەلەردى سانامالاپ جاتۋدىڭ ءوزى ارتىق. 2006 جىلى اتالمىش ونەر ورداسىنا بەلگىلى اكتەر نۇرمۇحان ءجانتوريننىڭ ەسىمى بەرىلۋى – ماڭعىستاۋلىقتاردى ءبىر مەرەيلەندىرسە, اكتەرلەردى قاناتتاندىرا ءتۇستى. تەاترلىقتار جۇرتشىلىققا تەك ساحنادا قويىلىم ۇسىنۋمەن عانا شەكتەلمەي, ءوڭىردىڭ, ەلىمىزدىڭ مادەني-قوعامدىق ومىرىنە بەلسەنە ارالاسىپ, ءتۇرلى دەڭگەيدەگى الۋان شارالاردىڭ بەل ورتاسىنان تابىلاتىندىعىمەن دە قۋانتادى.
تەاتر جۇمىسى تەك ساحناداعى اكتەرلەردىڭ قىزمەتىمەن عانا شەكتەلمەيدى, ۇجىم اياسىندا كيىم, اياق كيىم جانە اعاش تسەحتارى, گريمدەۋ, رەكۆيزيت, كوستيۋمدەر بولىمدەرى, قويىلىم جانە كوركەمدەۋ بۋتافور تسەحى, جارىق بەرۋ جانە دىبىس تسەحى دەگەن سان-ساپات بولىمدەر ەڭبەك ەتىپ, قويىلىم مازمۇنىنىڭ ءوز دەڭگەيىندە اشىلۋىنا سانداعان ادامدار مىگىرسىز جۇمىلۋدا. ماڭعىستاۋ تەاترى عيماراتىنىڭ كەڭ قاناتتى جۇمىسقا تارلىق ەتىپ, كەي جاعدايلاردا مۇمكىندىكتى شەكتەپ قوياتىنىنا قاراماستان, ۇجىم ءوزارا ۇيىمشىل, الدىنا قويعان ماقساتقا جەتۋ جولىندا جۇدىرىقتاي جۇمىلا تۇسەدى.
ن.ءجانتورين اتىنداعى ماڭعىستاۋ وبلىستىق مۋزىكالىق-دراما تەاترى 15 جىلدىق مەرەيتويىن سالتاناتتى جاعدايدا اتاپ ءوتتى. «تەاتر الەمى» شاراسىندا تەاتر ۇجىمى قىزىل كىلەممەن ءجۇرىپ وتسە, بەلگىلى اكتەرلەرگە ارنايى ماراپاتتار تابىستالدى. ون بەس جىلدىق تاريحتان سىر شەرتەر كورمە جاساقتالىپ, بەلسەندى, شەبەر اكتەرلەردىڭ كىتابى جارىق كوردى.
سالتاناتتى شارادا تەاتر جۇمىسىن جوعارى باعالاعان ماڭعىستاۋ وبلىسىنىڭ اكىمى ە.توعجانوۆ ۇجىمعا سۋ جاڭا اۆتوبۋستى سىيعا تارتىپ, مەملەكەتتىك «رۋحاني جاڭعىرۋ» باعدارلاماسى اياسىندا بيىل قىركۇيەك ايىندا قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى ن.ءجانتوريننىڭ 90 جىلدىق مەرەيتويى اياسىندا كاسپي جاعالاۋى ەلدەرىنىڭ II حالىقارالىق تەاتر فەستيۆالىن وتكىزۋ جوسپارلانعانىن جەتكىزدى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
