بۋراباي اۋدانىنىڭ اكىمى قانات قاراۋىلوۆتىڭ اتالعان جيىندا كەلتىرگەن مالىمەتىنە قاراعاندا, جىل سايىن تۋريزم ينفراقۇرىلىمى قارقىندى دامىپ كەلەدى. اعىمداعى جىلدىڭ باسىندا 70 ورىندىق «ارحەي» شيپاجاي كەشەنى پايدالانۋعا بەرىلگەن. بۇدان باسقا, كۋرورتتى ايماقتا 100 ورىندىق مەيمانحانا كەشەنى, ويىن-ساۋىق جانە ساۋدا ورتالىعى, قوناق ۇيلەر, تۇرمىستىق-مادەني جانە كوڭىل كوتەرۋ قىزمەتتەرىن كورسەتۋ نىساندارى سالىنۋدا. سونداي-اق 14 گەكتار جەردى قامتيتىن پرومەناد ايماعى مەن قوناق ۇيلەرى, سپورتتىق-ساۋىقتىرۋ, ساۋدا-كوڭىل كوتەرۋ, الەۋمەتتىك-مادەني نىسانداردى قامتىعان كوپفۋنكتسيونالدى كەشەن قۇرىلىسى باستالادى دەپ كۇتىلۋدە. ءوز كەزەگىندە «بۋراباي دامۋ» جشس ءبىرتۇتاس بايلانىس ورتالىعىنىڭ باسشىسى ازامات بايمۇقانوۆ قوناق ۇيلەر كەشەندەرىنىڭ, مەيمانحانالاردىڭ, تۋريستىك اگەنتتىكتەر مەن ەكسكۋرسيالىق بيۋرولاردىڭ ءوزارا جۇمىس ىستەۋى بارىسىن ورتاعا سالدى.
بەلگىلى بولعانداي, «الەم» وتەلدەر جەلىسى ءوز كليەنتتەرىنە قۇرامىندا تەگىن ەكسكۋرسياسى مەن جاياۋ ءجۇرۋ, «جايلاۋ» ەتنواۋىلىن تاماشالاۋ, «Burabay Land» كوڭىل كوتەرۋ پاركىنە اپارۋ, سونداي-اق كوڭىل كوتەرۋگە 50 پايىزدىق جەڭىلدىك بەرەتىن ديسكونتتىق كارتالاردى: كۆادروتسيكلمەن جانە اتپەن سەرۋەندەۋ, 5D كينوتەاترىن تاماشالاۋ, تابيعات مۇراجايىن كورۋ, ساداق اتۋ جانە وزگە دە قىزمەتتەردى قامتىعان تۋريستىك پاكەت ۇسىنادى ەكەن. ال «ەسىل» اكك» ۇك» باسشىسى قازبەك ەسكەندىروۆ جيىنعا قاتىسۋشىلارعا بۋرابايدا اعاشتان ءبىر ستيلدە قيىپ جاسالعان 30-عا تارتا ساۋدا پاۆيلوندارىنىڭ سالىناتىندىعىن جەتكىزدى. مۇنداي مەحانيزم كۋرورتتىق ايماقتىڭ ءسانىن عانا كەلتىرىپ قويماي, ساۋدا-ساتتىقتى دا جۇيەلەي تۇسەتىنى كولدەنەڭ تارتىلدى. بۇل ءوز كەزەگىندە تۋريستەردى ساپالى ونىمدەرمەن قامتاماسىز ەتۋگە, كاسىپكەرلەردىڭ سەنىمىن ارتتىرۋعا مۇمكىندىك بەرەدى.
جيىنعا قاتىسقان وبلىس اكىمى مالىك مىرزالين تۋريستىك ينفراقۇرىلىم نىساندارىنىڭ دايىندىعىن قامتاماسىز ەتۋدى جانە تۋريستەردى قابىلداۋدى جولعا قويۋ كەرەكتىگىنە ەرەكشە نازار اۋدارتتى. شومىلۋ بارىسىندا قاۋىپسىزدىكتى قامتاماسىز ەتۋ, قوعامدىق اجەتحانالاردى رەتكە كەلتىرۋ, اقپاراتتىق انىقتامالاردى ورنالاستىرۋ سياقتى جۇمىستاردى اتقارۋعا تاپسىرمالار بەرىلدى. رەتى كەلگەندە ايتا كەتۋ كەرەك, مارال شارۋاشىلىعىنا جاقىن جەردە ورنالاسقان «جايلاۋ» ەتنواۋىلىندا قوناقتارعا ارناپ قازاق حالقىنىڭ ءداستۇرىن كورسەتەتىن بولادى. جازعى كەزەڭنىڭ باستالۋىمەن ۇلتتىق ويىندارعا قاتىستى ءارتۇرلى شارالار ۇيىمداستىرىلادى دەپ كۇتىلۋدە. سونىمەن قاتار اتپەن جانە جاياۋ ءجۇرىپ بۋراباي اۋدانىنداعى قاسيەتتى ورىنداردى ارالاتۋ دا جوسپارلانعان. جانە بۇدان باسقا دا كوپتەگەن ءىس-شارالار كەلۋشىلەردى كەڭىنەن تارتۋ ءۇشىن جاسالاتىنىن ايتا كەتۋ كەرەك.
اسقار تۇراپباي ۇلى,
«ەگەمەن قازاقستان»
اقمولا وبلىسى
