اۋىلدا جەرگىلىكتى جۇرتتى رۋحاني تەربەپ وتىراتىن مەشىت بار. جۇما نامازىنان كەيىن مۇندا يمام, اقساقالدار كەيىنگىلەرگە ۇلگى-ونەگە بولارلىق وسيەتتى اڭگىمەلەر ايتادى. كوكەناكي ءابىلدين اقساقال دا جۇما نامازىنان قالمايدى, اۋىلداعى جاقسى ىستەرگە باستاماشى بولىپ جۇرەتىن كىسىنىڭ ءبىرى. عۇمىر بويى ءبىلىم سالاسىندا قىزمەت ەتتى, بار كوڭىلىن دە, قىزمەتىن دە جاس ۇرپاق تاربيەسىنە ارنادى. كوپ جىلدار مەكتەپ ديرەكتورى قىزمەتىن اتقاردى, جاڭاشىل ۇستاز رەتىندە دە جەرلەستەرىنە ەسىمى بەلگىلى. ارعى كەڭەس وداعى كەزىن ايتپاعاندا, تاۋەلسىز قازاقستاننىڭ «قازاقستان رەسپۋبليكاسى ءبىلىم سالاسىنىڭ ۇزدىگى» توسبەلگىسىن العاش العانداردىڭ ءبىرى. ءالىپبي لاتىن قارپىمەن جاسالسا قازاق ءتىلىنىڭ قاناتىن كەڭ جايۋىنا سەپتىگى تيەرىن بىلەدى, اۋىلداستارىنا دا سولاي تۇسىندىرەدى. وتكەن جىلدىڭ اياعىنا قاراي اۋداندىق گازەتكە ءبىر ماقالاسىن لاتىن قارپىندەگى الىپبيمەن جازدى. اۋداندىق گازەت رەداكتسياسى دا وقىرمانىنىڭ بۇل باستاماسىن قولداپ, ماقالانى دەرەۋ جارىققا شىعاردى. ونى وقىعان اۋىلداستارى كوز ۇيرەنبەگەندىكى مە, ەجەلەپ وتىرىپ قالعان. مەشىتكە جينالعانداردىڭ اراسىندا جۇما نامازىنان كەيىن وسى كوكەناكي اعانىڭ لاتىن قارپىندەگى ماقالاسى, لاتىن ءالىپبيى ءسوز بولدى.
– سول كۇنگى اڭگىمە جاماعاتتىڭ جۇما نامازىنان كەيىن لاتىن قارپىن, جاڭا ءالىپبيىمىزدى ۇيرەتىڭىز دەگەن ۇسىنىسىمەن اياقتالدى. ون ەكى كىسى ساباققا قالاتىن بولدى. بۇل ۇسىنىس ماعان دا قاتتى ۇنادى, دەرەۋ تاقتانى بالالارعا جاساتىپ, ءىلدىرىپ قويدىم. سولاي ساباقتى باستاپ تا كەتتىك, – دەيدى كوكەناكي اقساقال.
قازىر جۇما نامازىنان كەيىن كوكەناكي اعايدىڭ ساباعىنا تەك ۇلكەن كىسىلەر عانا ەمەس, مەكتەپتىڭ مۇعالىمدەرى, وقۋشىلار, جاستار دا كەلىپ قاتىساتىن بولعان. ۇستازدىڭ ءوزى جاس كەزىندە نەمىس ءتىلىن وقىعان ەدى, سوندىقتان نەگىزى ءبىر لاتىن قارپى وعان ەشقانداي قيىندىق تۋعىزعان جوق. قازىر اعىلشىن ءتىلىن وقىپ جاتقان وقۋشىلار ءۇشىن دە بۇل قيىن ەمەس ەكەن. ال كوكەناكي اعاي ءوزىنىڭ «ادىستەمەلەرىمەن» ساباقتى بارعان سايىن قىزىقتى وتكىزىپ كەلەدى.
– مەن دانالىق سوزدەردى, ءتۇرلى شەجىرە, قىسقا اڭگىمەلەردى جيناپ الامىن دا, تاقتاعا سونى لاتىن قارپىندەگى الىپبيمەن جازدىرامىن. اۋىلداستارىم ءارى لاتىن قارپىندەگى ءالىپبيدى ۇيرەنەدى, ءارى دانالىق سوزدەردەن عيبرات الادى, – دەيدى كوكەناكي اعاي.
قازىر ورازا كۇندەرى جاماعاتتىڭ پاتۋاسىمەن لاتىن ءالىپبيىن ۇيرەنۋدى ۋاقىتشا توقتاتتى. اۋىلداستار اۋىز اشقاننان كەيىن مەشىتكە جينالىپ تاراۋح نامازىن وقيدى, وسيەت اڭگىمەلەرىن ايتادى. كوكەناكي اقساقالدىڭ قىسىمەن ۇيرەتكەن ەڭبەگى دالاعا كەتپەگەن ەكەن, نامازعا كەلگەندەردىڭ بارلىعى دا لاتىن قارپىن جازۋدان, وقۋدان قينالمايتىن بولعان. موسكولەۆ اۋىلىنداعى مەشىت اۋىلداستاردىڭ اللاعا قۇلشىلىعىن جاساۋمەن قاتار, رۋحاني تولىپ, مارقايىپ قايتاتىن قاسيەتتى ورنىنا اينالدى.
ءنازيرا جارىمبەت,
«ەگەمەن قازاقستان»
قوستاناي وبلىسى,
اۋليەكول اۋدانى,
موسكولەۆ اۋىلى
