– وسى شارادان كەيىن ءبىزدىڭ وڭىردەگى ۆەلوسپورت بۇرىنعىدان دا قارقىندى داميدى دەگەن ويدامىز. اتىراۋلىقتار بۇقارالىق سپورتقا بەلسەندى بەت بۇرىپ كەلەدى. سالاماتتى ءومىر سالتىن ناسيحاتتاۋعا ارنالعان شارالار لەگى ۇنەمى جاڭا جوبالارمەن تولىعۋدا, – دەيدى وبلىس اكىمىنىڭ ءبىرىنشى ورىنباسارى ساعىندىق لۇقپانوۆ.
وليمپيادا چەمپيونى الەكساندر ۆينوكۋروۆ: «جارىسقا قاتىسۋشىلار سانى وسىنشالىق كوپ بولادى دەپ ويلامادىم», دەيدى. مۇنايلى ايماقتىڭ جاسى مەن كارىسى قاتار اعىلعان ۆەلوجارىس شىن مانىندە سپورت مەرەكەسىنە اينالدى. بەس اتالىم بويىنشا جۇلدە ساراپقا سالىندى. ناتيجەسىندە, ەڭ جاسى ۇلكەن قاتىسۋشى 66 جاستاعى عيمران اقبوتين, ەڭ جاس قاتىسۋشى 4 جاستاعى ايا سالامات دەپ تانىلدى. بيساليەۆتەر وتباسى «سپورتشىلار وتباسى» اتالىمىن جەڭىپ الدى. ال ەڭ كرەاتيۆتى ۆەلوسيپەدتىڭ يەسى باقىتجان شايحيەۆ بولسا, مارات ناۋرىزعاليەۆ ەڭ كرەاتيۆتى كيىم يەسى اتاندى. بارلىق جۇلدەگەرلەرگە سىيلىققا ۆەلوسيپەد بەرىلدى. جەڭىمپازداردى ماراپاتتاۋ شاراسىنان كەيىن سۇلتان بەيبارىس الاڭىندا ەسترادا ونەرپازدارىنىڭ قاتىسۋىمەن مەرەكەلىك كونتسەرت ءوتتى.
ايتا كەتەيىك, شارانى ۇيىمداستىرۋشى «اتىراۋ وبلىسىنىڭ سپورتتى قولداۋ جانە دامىتۋ» قوعامدىق قورى بيىل قۇرىلعانىمەن, ءبىراز شاراعا باستاماشى بولىپ ۇلگەردى. قور باستاماسىمەن ەكى جاس فۋتبولشى اتاقتى «رەال» مادريد كومانداسىنىڭ جاتتىعۋ لاگەرىندە ءدارىس الۋ مۇمكىندىگىنە يە بولدى. ۆەلوجارىس اياسىندا قايىرىمدىلىق جارمەڭكەسى مەن اۋكتسيوننىڭ ءوتۋى دە شارانىڭ ماڭىزىن ارتتىرا ءتۇستى. «استانا» ۆەلوكومانداسىنىڭ باعالى لوتتارى ساتىلىمعا شىعارىلدى, ودان تۇسكەن اقشالاي قاراجات وليمپيادالىق رەزەرۆتەگى بالالار مەن جاسوسپىرىمدەر سپورت مەكتەبىنىڭ ۆەلوسپورت ءبولىمىن سپورتتىق جابدىقتارمەن قامتۋعا جۇمسالادى. ۆەلوسپورت بولىمىندە 10 مەن 16 جاس ارالىعىنداعى 80-گە جۋىق سپورتشى ءدارىس الادى», دەيدى اتالعان قوعامدىق قوردىڭ وكىلى تاڭات نۇرشين.
سونىمەن كوپتەن كۇتكەن اۋكتسيون دا مارەگە جەتتى. ەڭ قىمبات لوت «Vino Bike» ۆەلوسيپەدى – 10 ملن 400 مىڭ تەڭگەگە باعالانىپ, ونى قۇلسارى قالاسىنان كەلگەن وتباسى ساتىپ الدى. سونداي-اق ولار ەكىنشى كوللەكتسيالىق ارگون – 18 ۆەلوسيپەدىن 5 ملن 400 مىڭ تەڭگەگە الدى. مايك تايسوننىڭ قولتاڭباسى بار قولعاپتارى 3 ملن 200 مىڭ تەڭگەگە باعالانسا, روي دجونسوننىڭ قولتاڭباسى بار قولعاپتار 1 ملن 200 مىڭ تەڭگە بولدى. قايىرىمدىلىق اۋكتسيونىندا ەكى چەمپيوننىڭ قولتاڭبالارى بار جەيدەلەر, سيرەك كەزدەسەتىن ۆەلوسيپەدتەر مەن ەڭ ءىرى ەۋروپالىق ۆەلوتۋر وتەتىن يسپانيانىڭ ۆۋەلتا قالاسىنا 3 كۇندىك تۋر ويناتىلدى. الەكساندر ۆينوكۋروۆتىڭ ءوزى روي دجونسوننىڭ قولتاڭباسى بار قولعاپتاردىڭ يەسى اتاندى. قايىرىمدىلىق شاراسى كەزىندە 34,4 ميلليون تەڭگە قارجى ءتۇستى. «بارلىق قارجى اتىراۋ وبلىسىنداعى ۆەلوسپورتتى دامىتۋعا جۇمسالادى», دەيدى ۇيىمداستىرۋشىلار.
باقىتگۇل باباش,
«ەگەمەن قازاقستان»
اتىراۋ
