بۇگىن كەشكە ورال قالاسىندا ەكى ۇلكەن كونتسەرت قاتار وتپەك. ونىڭ ءبىرىنشىسى – «استانادان اق تىلەك» كونتسەرتىندە استانا مەملەكەتتىك اكادەميالىق فيلارمونياسى ۇجىمدارى – «سارىارقا» حالىق مۋزىكاسى ءانسامبلى, ەسترادالىق بي, «شالقىما» بي انسامبلدەرى, سونداي-اق كلاسسيكالىق جانە ەسترادالىق ۆوكال سوليستەرى ونەر كورسەتسە, ەكىنشى « ۇلى دالا اۋەندەرى» اتتى كونتسەرتتە ع. جۇبانوۆا اتىنداعى مەملەكەتتىك ىشەكتى اسپاپتار كۆارتەتى ورال قالاسىنىڭ تۇرعىندارىنا كەرەمەت كەش سىيلايدى. بۇل باعدارلاما اياسىندا شۋبەرتتىڭ, گايدننىڭ, ءبروديننىڭ, جۇبانوۆتىڭ, جايىموۆتىڭ, تاتتىمبەت پەن قۇرمانعازىنىڭ شىعارمالارى ورىندالادى.
18 مامىر كۇنى «نۇر وتان» پارتياسى عيماراتىندا وتەتىن «ەلوردادان ەلگە سالەم» گالا-كونتسەرتىنە ەلوردالىق فيلارمونيا ۇجىمدارى قاتىسادى. ساحنا تورىندە رينات مالتساگوۆ, كلارا تولەنباەۆا سىندى ەسترادا جۇلدىزدارى, «ارت-دومبىرا» تريوسى ءوز ونەرىن ورتاعا سالادى.
19 مامىردا وسى زالدا كوركەم شولوشوۆا ءوزىنىڭ «قىز قيالى» اتتى جەكە بي باعدارلاماسىن مۋزىكالىق تارتۋ رەتىندە ورالدىقتار نازارىنا ۇسىنادى. ءۇش كۇننىڭ ىشىندە ا.ن.وستروۆسكي اتىنداعى ورال دراما تەاترىنىڭ ساحناسىندا م.گوركي اتىنداعى ماودت ارتيستەرى ءوز قويىلىمدارىن كورسەتەدى. «رەپەرتۋار ەرەسەكتەردى دە, بالالاردى دا قۋانتادى» دەيدى ۇيىمداستىرۋشىلار.
استانانىڭ مادەنيەت كۇندەرى وتەتىن ءۇش كۇن بويى حاديشا بوكەەۆا اتىنداعى باتىس قازاقستان وبلىستىق قازاق دراما تەاترىنىڭ فويەسىندە «اق تىلەكپەن, استانا» اتتى بەينەلەۋ ونەرى كورمەسى جۇمىس ىستەيدى. ەكسپوزيتسياعا وتاندىق سۋرەتشىلەردىڭ 100-دەن اسا تۋىندىسى قويىلعان.
قازبەك قۇتتىمۇرات ۇلى
«ەگەمەن قازاقستان»
باتىس قازاقستان
