جامبىل وبلىستىق قازاق دراما تەاترىندا «بەۋ, قىزدار-اي!» كومەدياسىنىڭ تۇساۋكەسەرى بولدى. اۋەلدەن ادەمى ازىلمەن باستالىپ, اسەم انمەن ادىپتەلگەن سپەكتاكل اقىن جىگىت اۋباكىر (مامبەت قوجاليەۆ), سۋرەتشى جىگىت سۇلتان (جاندار قىرىقباەۆ) جانە ماگيسترانت جىگىت حاسەننىڭ (ابزال داۋلەتباقوۆ) ءوزارا اڭگىمەلەسۋىمەن باستالادى. ونەرلى ءۇش جىگىت تە ومىرلىك جار ىزدەگەن جاندار. ءبىرى اقىندىق, ءبىرى سۋرەتشىلىك, ەندى ءبىرى عىلىم جولىنا تۇسكەن جىگىتتەردىڭ ءومىرىن وزگەرتىپ, كوڭىلىن كوركەم كۇيگە بولەگەن ايسۇلۋ ەسىمدى بەيتانىس قىز. «كوكتوبە» كولحوزىندا ساۋىنشى بولىپ ەڭبەك ەتەتىن ايسۇلۋدىڭ سۋرەتى گازەتكە باسىلادى. ادەمى قىزدىڭ سۋرەتىن كورگەن بويدا ەسى كەتكەن ءۇش جىگىت ءبىر-بىرىنە ايتپاي الماتىدان ايسۇلۋدى ىزدەپ «كوكتوبەگە» كەلەدى.
ارينە ارمان اسقاق, ءۇمىت زور. ءۇش جىگىتتىڭ دە اڭساعانى − ايداي سۇلۋ ايسۇلۋ. اۋىلداعى ساۋىنشى ايسۇلۋ (الميرا ءدىلدا), كۇنسۇلۋ (جادىرا قۇلتاەۆا), جانسۇلۋ (ينديرا مۇستافاەۆا) جانە نۇرسۇلۋ (ريزات قىلىشباەۆا) بەينەلەرى دە تارتىمدى شىققان. بىراق قالادان كەلگەن ءۇش جىگىتتى بايقاعان اۋىلداعى شارۋاشىلىق باستىعى ء(ابۋ شوڭباەۆ) پەن پوليتسيا قىزمەتكەرى (انار التىباەۆا) ءبىر قۋلىق قولدانىپ, ولاردى ايسۇلۋمەن ەمەس, كۇنسۇلۋ, جانسۇلۋ, نۇرسۇلۋلارمەن تانىستىرادى. ارينە ولار دا «بۇيرىق» بويىنشا جىگىتتەرمەن ايسۇلۋ بولىپ تانىسادى. اقىرى ايسۇلۋ اتىنا يلانعان ءۇش جىگىت ءۇش ساۋىنشى قىزبەن كوڭىل جاراستىرادى. ال ايسۇلۋ ءوزىنىڭ سۇيگەن جىگىتى سەركەمەن (بەكسۇلتان الەكەشوۆ) تاعدىر قوسادى.
«بەۋ, قىزدار-اي!» كومەدياسى وتكەن عاسىردا جازىلعان شىعارما. الايدا بۇل قويىلىمنىڭ ەرەكشەلىگى – مۇندا بۇگىنگى زاماننىڭ باستى وقيعالارىنىڭ ورىن الۋى. قويىلىمنىڭ قويۋشى-رەجيسسەرى رۇستەم جانامانوۆتىڭ شىعارماشىلىق شەشىمى نەگىزىندە وقيعا بارىسىندا بۇگىندە ەلىمىزدە باستاۋ العان «ديپلوممەن − اۋىلعا!» باعدارلاماسى كورىنىس بەرەدى. سونداي-اق رەجيسسەردىڭ شەشىمى مەن اكتەرلەردىڭ شەبەرلىگى ۇندەسىپ, بۇگىندە جۇمىسباستىلىقپەن تۇرمىس قۇرماي جۇرگەن قىزداردىڭ جايىن دا ادەمى ءارى استارلى ازىلمەن ايشىقتايدى. ال كومەديانىڭ سۋرەتشىسى – جامبىل وبلىستىق قازاق دراما تەاترىنىڭ باس سۋرەتشىسى راحات ساپاراليەۆانىڭ ەڭبەگى ساحنانىڭ ءون بويىنان كورىنىپ تۇردى.
حاميت ەسامان,
«ەگەمەن قازاقستان»
جامبىل وبلىسى
