جالعاننىڭ جايلى تورىندە تۇراقتاپ قالعان ەشكىم جوق. دەسە دە ۇل-قىزىنىڭ شاتتىعىنا بولەنىپ, نەمەرەسىن جەتەكتەپ, شوبەرەسىنە ەلپەكتەپ ۇرپاعىنىڭ قىزىق قۋانىشىن ۇزاعىنان كورۋدى كىم قالاماسىن. حالقىمىز كوپ جاساعان جاندى «سۇيەگى اسىل ەكەن», «جاراتقاننىڭ نازارى تۇسكەن پەندەسى ەكەن» دەپ جاتادى. كەيىنگىگە ۇلاعاتىن ايتىپ, ادەمى قارتايۋ ءاربىر ادام بالاسىنىڭ ارمانى.
جاپىراعىن كەڭگە جايعان ماۋەلى بايتەرەكتەي ابىز انا ءوزىن دۇنيەدەگى ەڭ باقىتتى جان دەپ ەسەپتەيدى. مىنا سۋرەتتە اجەيدىڭ قاسىندا وتىرعان تۇلا بويى تۇڭعىشى دامەتحان قاريا. بىلايعى جۇرتقا اق ساقالدى ابىزداي بولعانىمەن, تۇراقان اجە ءۇشىن ءالى كۇنگە بالا. جاسى توقسانعا تاياعان ول كوڭىلدىڭ كەيبىر ساتتەرىندە اناسىن ماۋقىن باسا قۇشاقتاپ, ەركەلەپ الاتىن كورىنەدى. شەشەلى-بالالى قاريالارعا سۇيسىنە قاراپ وتىرىپ «اناسى بار ادامدار, ەشقاشان قارتايمايدى» دەگەن ءان جولدارى ءداپ وسى دامەتحان قارياعا ارنالىپ اي-تىلعان با دەرسىڭ.
ون التى قۇرساق كوتەرگەن باتىر انا تاعدىر جولىندا بار مەن جوقتى تەل ەمدى. قاتال تۇرمىستىڭ قاقاعان ايازىن دا, ارايلى كۇندەردىڭ شاتتىق پەن شۋاعىن دا كوردى. وتباسى جاعدايىنا بايلانىستى وقي الماعان ول زامانىندا جىلقى مەن قوي باعىپتى. ناۋبايحانادا نان ءپىسىرىپ, تىلدا تىنىمسىز ەڭبەك ەتىپتى. قيىن كۇندەردىڭ ءبارى دە كورگەن تۇستەي ارتتا قالدى دەگەن اجە سەكسەنگە تارتا نەمەرە-شوبەرەنىڭ ورتاسىندا وتىرعاندا راحاتتى جان-تانىمەن سەزىنىپ, كوزىنە قۋانىشتان جاس الاتىنىن ايتادى. نەمەرە مەن شوبەرەلەردىڭ توي-دۋماندارىندا توردە وتىرىپ تىلەگىن جەتكىزەتىن تۇراقان اجەنى تۇتاس اۋىل قۇرمەتتەيدى. الىستان كەلگەن قوناقتار الدىنا ارنايى كەلىپ ىرىمداپ باتاسىن الاتىن كورىنەدى. امانداسا بارعانىمىزدا «جەڭىس مەرەكەسىنىڭ قارساڭىندا «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆتىڭ ءوزى قۇتتىقتاۋ حاتىن جىبەرىپتى, مىنەكي» دەپ اعىنان جارىلىپ قۋانىپ وتىر. اجەيمەن اڭگىمەلەسىپ وتىرىپ شىنىندا دا سۇيەگى اسىل جان عوي دەپ تاڭىرقايسىڭ. ۇزاق عۇمىر بەرگەن قۇداي تاعالا كەيۋانانى تىلدەن دە جاڭىلدىرماعان. وتكەن كۇندەرىنىڭ ەستەلىگىن شەجىرەدەي شەرتەدى.
ادامدى ادام قىلاتىن ماڭداي تەر مەن ادال ەڭبەك. قانداي قيىندىق كەلسە دە ۋايىمعا بەرىلمەۋ كەرەك. ءومىردىڭ قۋانىشىن دا قيىنشىلىعىن دا ەلمەن بىرگە كوردىك. ايتەۋىر, ولگەن جوقپىز. كوپتىڭ تىلەۋى جاقسى بولادى. ىنتىماق بار جەردە, ىرىس بار. ءبىز كورگەن قيىنشىلىقتاردى ۇرپاعىمىز كورمەسە ەكەن. زامانىڭ بەيبىت بولسا – جۇماق دەگەن سول. حالقىمىز, ەلىمىز امان بولسىن» – دەيدى تۇراقان ابدىباەۆا.
كوپ جاساعان كىسىنى كورسەك مۇنىڭ ءبىر قۇپياسى بار شىعار, سۇراپ بىلەيىك دەپ ىنتامىز اۋىپ تۇراتىنى انىق. وسى داستۇردەن جاڭىلماي اجەيدەن كوپ جاساۋىڭىزدىڭ سىرى نەدە دەپ سۇراعانىمىزدا: «جايلى ادامنىڭ اۋزىندا ادەمى ءازىلى بولادى, كوڭىلدى جۇرىڭدەر جانە ەڭبەك ەتىڭدەر» دەگەندى ەستىدىك.
ءوزىڭ ءبىر اۋىل-ەلدىڭ اقساقالى بولىپ وتىرعانىڭدا جانىڭدا اقىلگوي اناڭ بولعانى قانداي جاراسىمدى.
انا مەن بالا... باقىت دەگەن وسى شىعار.
ارمان وكتيابر,
«ەگەمەن قازاقستان»
الماتى
سۋرەتتى تۇسىرگەن
راسۋل سالىم ۇلى
