ت.جۇرگەنوۆ اتىنداعى قازاق ۇلتتىق ونەر اكادەمياسى وكىلدەرى ۇيىمداستىرىپ وتىرعان شارا «بولاشاققا باعدار: رۋحاني جاڭعىرۋ» باعدارلامالىق ماقالاسىن جۇزەگە اسىرۋ جانە استانانىڭ 20 جىلدىعىنا ارنالعان. كينەماتوگرافيانىڭ مايتالماندارىمەن كەزدەسۋدىڭ العاشقى ءسوزىن العان قازاقستاننىڭ ەڭبەك سىڭىرگەن قايراتكەرى س.ءازىموۆ قازاق كينوسىنىڭ تاريحى بمكي-مەن تىعىز بايلانىستى ەكەندىگىنە توقتالدى. قانداي قيىن-قىستاۋ كەزەڭدەردە دە ونەر سالاسىنا تۇراقتى ماماندار دايارلاپ وتىرعان بمكي-ءدىڭ سوعىس جىلدارىندا الماتىعا قونىس اۋدارعانى بەلگىلى. وسىلايشا ەل باسىنا كۇن تۋعان جىلداردا دا كينو ونەرى وشكەن جوق. كەرىسىنشە, ءوز كاسىبىنىڭ مىقتى دەگەن ماماندارى تاربيەلەندى. كاسىبي شەبەرحانالار قالىپتاستى. بۇگىندە بمكي-دە ءبىلىم العان قازاقستاندىق كينوگەرلەر سانى ءجۇز ەلۋدەن اسادى.
اتالعان وقۋ ورنىمەن بەيبىت زامانداعى ارىپتەستىكتەر تۋرالى ءسوز قوزعاعان ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى ب.ن.ءنۇسىپجانوۆانىڭ ايتۋىنشا, قازاقستاندىق ستۋدەنتتەر ءۇشىن تاجىريبە الماسىپ, بىلىمدەرىن جەتىلدىرۋگە بايلانىستى قولايلى جاعدايلار جاسالعان. كينو سالاسىنا ماماندانعان ستۋدەنتتەردىڭ جۇمىستارىنا بۇگىندە جوعارى باعا بەرىلۋدە. الداعى ۋاقىتتا قازاقستاندىق ستۋدەنتتەر بمكي-دە وپەراتور ماماندىعى بويىنشا ءبىلىم الاتىن بولادى.
ال قازاقستانعا كەلۋ اسەرلەرىن تەرەڭ تەبىرەنىستەن باستاعان رف حالىق ءارتىسى س.ا.سولوۆەۆ, بمكي رەكتورى, پروفەسسور س.ۆ.مالىشەۆ, رف حالىق ءارتىسى, پروفەسسور ۆ.يۋ.ابدراشيتوۆ, رەسەي جانە قازاقستاننىڭ ەڭبەك سىڭىرگەن ءارتىسى ن.ءو.ارىنباساروۆا الماتىنىڭ ەرەكشە قالا ەكەندىگىن جەتكىزدى. «الاتاۋ باۋرايىنداعى اسەم قالانىڭ ءار كوشەسىندە بىزدەر ءۇشىن مەيرام بولىپ جاتقانداي...» دەپ اسەرلى كۇيلەرىن ورتاعا سالدى. ماسكەۋلىك مەيماندار كينوگەرلەر شەبەرحاناسىنىڭ قالىپتاسۋى تۋرالى ەستەلىكتەرىمەن بولىسە وتىرىپ, ءبىز ءۇزىم ناندى بولە جەگەن جىلداردا پوستكەڭەستىك ەلدەردىڭ ونەر وكىلدەرىن وسى ءبىر قاسيەتتى ماماندىق كەڭىستىگىندە تاعدىرلارى توعىستىرعاندىعىن ساعىنىشپەن ەسكە الدى. بۇگىنگى كينو توڭىرەگىندەگى پىكىرلەرىمەن دە ءبولىسىپ وتىردى. ارى قارايعى كەزدەسۋ بمكي-ءدىڭ قازاقستاندىق تۇلەكتەرىمەن قاۋىشۋمەن جالعاسىن تاپتى.
ال كەشكى الماتى مەيمانداردى لەرمونتوۆ اتىنداعى مەملەكەتتىك اكادەميالىق ورىس تەاترىندا قارسى الدى. مۇندا ينستيتۋتتىӊ دارىندى ستۋدەنتتەرى الماتىلىق كورەرمەندەر ءۇشىن «ەۆگەني ونەگين», «منوگو شۋما يز نيچەگو» جانە «گوۆورياششي نەموي» سپەكتاكلدەرىن قويدى.
ەكى كۇنگى ساپارى اياسىندا بمكي پروفەسسورلىق قۇرامى كاسىبي قازاقستاندىق جوعارعى وقۋ ورىندارىنىӊ ستۋدەنتتەرى ءۇشىن رەجيسسۋرا, انيماتسيا, ساحنالىق قوزعالىس, بەينەلەۋ ونەرى بويىنشا شەبەرلىك سىنىپتارىن وتكىزدى.
ەلۆيرا سەرىكقىزى,
«ەگەمەن قازاقستان»
الماتى
