ارقار-كيىكتەردى ەسەپتەۋ ءساۋىر ايىندا باستالعان. ساناق جۇرگىزۋدىڭ قالىپتاسقان ادىستەرى بار. ماماندار كيىكتەر ورەتىن نەگىزگى اۋماقتاردى تىكۇشاقپەن ارالايدى. الدىن الا بەلگىلەنگەن باعىتتار بويىنشا تىكۇشاقتار ساناق ءۇشىن ىڭعايلى بيىكتىكتە ۇشادى.
مامانداردىڭ ايتۋىنشا, اۋەدەن باقىلاۋ ناتيجەسىندە العاشقى اپتالاردىڭ وزىندە جەتى ءجۇز باستان ارتىق ارقار ەسەپكە الىنعان. بارلىق مالىمەتتەر وڭدەلىپ, ەكستروپولياتسيا ادىسىمەن بولجام جاسالادى. بۇرىننان قالىپتاسقان كاسىبي ەسەپتەۋ تاسىلىنە سايكەس, جانۋارلاردىڭ ءار باسى ونعا كوبەيتىلەدى. ياعني باستاپقى ناتيجەلەردىڭ وزىمەن قاراعاندى وبلىسىندا 7 مىڭ باس ارقار تىركەلدى دەۋگە بولادى.
2017 جىلعى ساناق بويىنشا وڭىردە 7,5 مىڭ باس ارقار ەسەپكە الىنعان. سالىستىرمالى تۇردە العاندا, جابايى جانۋارلاردىڭ سانى ارتىپ كەلە جاتقانى بايقالادى. ولاردىڭ كوبەيۋىنە ءتيىستى مەكەمەلەر مۇمكىندىگىنشە جاعداي جاساپ كەلەدى. جانۋارلاردى قورعاۋمەن اينالىساتىن شاعىن توپتار پوپۋلياتسيا مونيتورينگىن تۇراقتى جۇرگىزەدى. ونىڭ ۇستىنە, كەيىنگى جىلدارى ارقادا قىس قاتتى بولا قويعان جوق.
قاتاڭ باقىلاۋدىڭ ارقاسىندا براكونەرلىك قىلمىس ازايدى دەگەنمەن, ارا-تۇرا بولسا دا ورىن الىپ تۇراتىنى جاسىرىن ەمەس. بىلتىر زاڭسىز اڭ اۋلاۋشىلاردىڭ قولىنان ەكى ارقار ولگەن. ونىڭ شىعىنى – 20 ميلليون تەڭگە.
قاراعاندى وبلىسىندا كيىكتەر سانى دا ارتىپ كەلەدى. وسىدان ءۇش جىل بۇرىن جاپپاي قىرىلعان ءتۇز جانۋارلارى قايتادان كوبەيە باستاعان. قازىر وڭىردە 50 مىڭداي كيىك بار. ەندى تابيعي اپاتتان نەمەسە كىسى قولىنان اجال قۇشپاسا, ەن دالانىڭ ءسانى بولعان ارقار-كيىكتەردىڭ سانى وسە تۇسپەك.
قايرات ءابىلدا,
«ەگەمەن قازاقستان»
قاراعاندى وبلىسى
