فوتو: اۆتور
جيىنعا سەمەيدەگى قوس مۇنارالى ورتالىق مەشىتتىڭ نايب يمامى بەكزات باەشوۆ تە قاتىسىپ وتىردى. ءباسپاسوز ءماسليحاتىندا ءسوز العان وكىل يمام ماقسات التىباي بيىل ورازا قمبد-ءنىڭ ءپاتۋاسى بويىنشا 17 مامىردا باستالىپ, 14 ماۋسىمدا اياقتالاتىندىعىنان حاباردار ەتتى. مۇسىلماندار رامازان ايىندا 29 كۇن اۋىز بەكىتەدى ەكەن.
- ماۋسىمنىڭ 11-نەن 12-سىنە قاراعان ءتۇن قادىر ءتۇنى,-دەدى ماقسات قاجى التىباي,-سارەسى ءىشۋ تاڭ نامازىنىڭ كىرۋىنە 10 مينۋت قالعاندا توقتاتىلادى. اۋىزدى اقشام نامازىنىڭ ۋاقىتى كەلگەندە قۇرمامەن نە سۋمەن اشۋ ساۋاپ. قۇرمانى ءبىرىنشى اتايتىنىمىز, بۇنىڭ وزىندە ۇلكەن قاسيەت جاتىر. تاراۋىح نامازى قۇپتان نامازىنان كەيىن وقىلادى, ال ءۇتىر-ءۋاجىپ نامازى ەڭ سوڭىنان جاماعاتپەن وقىلادى. وسىندايدا وقىرماندارىمىز, ناماز وقىمايتىن ادام ورازا ۇستاۋعا بولا ما دەپ سۇراپ جاتادى. ارينە, ۇستاۋعا بولادى. 15 ماۋسىم جۇما كۇنى ورازا ايت مەيرامى باستالادى. ايت نامازى سەمەيدە تاڭعى 07.00-دە وقىلادى.
ماقسات قاجى التىبايدىڭ ايتۋىنشا بيىل دا ارنايى قاري كەلىپ, قۇران قاتىم تۇسىرىلەدى. ورازا ساۋابى مول اي بولعاندىقتان, جەتىم-جەسىر, مىسكىن, جاعدايى جوق ادامدار تىزىمگە الىنىپ, مەشىت تاراپىنان قايىرىمدىلىق كومەكتەر بەرىلەدى. ءپىتىر ساداقانىڭ مولشەرى بيىل قازاقستان بويىنشا جان باسىنا 300 تەڭگە بولىپ بەكىتىلدى. وكىل يمام ماقسات التىباي ورازاعا قاتىستى كوپتەگەن تۇسىنىكتەر بەرىپ, قاسيەتتى ايدا قالادا اتقارىلار اۋقىمدى ءىس-شارالار, قايىرىمدىلىق اكتسيالار مەن يگى جوبالار جايلى جۋرناليست قاۋىمىن اقپاراتتاندىردى.
راۋشان نۇعمانبەكوۆا
