تيمۋر سۇلەيمەنوۆتىڭ ايتۋىنشا, قازاقستانداعى ەكونوميكالىق بەلسەندىلىك وڭ قارقىن كورسەتۋدە.
جالپى العاندا, ەكونوميكاداعى ءوسىم ينفلياتسيالىق قىسىمنىڭ تومەندەۋىنە جانە جوعارى ينۆەستيتسيالىق بەلسەندىلىككە نەگىزدەلگەن. ينفلياتسيا جىل باسىنان بەرى 2,2% قۇرادى. 2017 جىلدىڭ وسىنداي كەزەڭىمەن سالىستىرعاندا 0,5 پ.پ. تومەن. جىلدىق ينفلياتسيا 6,5% دەڭگەيىندە تىركەلدى. ينفلياتسيانى جاڭا دالىزدە (5-7%) ۇستاپ تۇرۋ قامتاماسىز ەتىلۋدە.
«ەڭبەك نارىعىندا تۇراقتىلىق ساقتالۋدا. جىل باسىنان بەرى 134,8 مىڭ ادام جۇمىسقا ورنالاستىرىلدى. وسى جىلدىڭ باسىنان بەرى ناقتى ەڭبەكاقىنىڭ ءوسۋى بايقالادى. ول 1,2% قۇرادى. قاڭتار–ساۋىر ايلارىندا ورتاشا ايلىق ەڭبەكاقى 152,3 مىڭ تەڭگەنى قۇرادى», — دەپ تۇيىندەدى ت. سۇلەيمەنوۆ.
ۇلتتىق بانك توراعاسىنىڭ ءبىرىنشى ورىنباسارى و. سمولياكوۆتىڭ ايتۋىنشا, ۇلتتىق بانكتىڭ التىن–ۆاليۋتا ساقتىق قورلارى وتكەن جىلدىڭ وسىنداي كەزەڭىمەن سالىستىرعاندا ($30,6 ملرد دەيىن) 3%-كە ءوستى. سونىمەن بىرگە, ۇلتتىق قوردىڭ اكتيۆتەرى وسى كەزەڭدە 5,6%-كە ($59,3 ملرد دەيىن) تومەندەدى.
2018 جىلدىڭ قاڭتار–ناۋرىز ايلارىنداعى سىرتقى ساۋدا اينالىمى $21 ملرد قۇرادى جانە 2017 جىلدىڭ ءتيىستى كەزەڭىمەن سالىستىرعاندا 24,3%-كە ءوستى, سونىڭ ىشىندە ەكسپورت — $13,8 ملرد (27% ءوسىم), يمپورت — $7,2 ملرد (19,4%-كە ارتىق) ءوستى.
قارجى ءمينيسترى ب. سۇلتانوۆ ءوز بايانداماسىندا مەملەكەتتىك بيۋدجەتتىڭ كىرىستەرى (ترانسفەرتتەردى ەسەپكە الماعاندا) ەسەپتىلىك كەزەڭدە 105,1%-كە, ولاردىڭ ىشىندە رەسپۋبليكالىق كىرىستەر — 100,9%-كە, جەرگىلىكتى بيۋدجەتتەر — 117,1%-كە اسىرا ورىندالعانىن اتاپ ءوتتى.
رەسپۋبليكالىق بيۋدجەتكە 1781,7 ملرد تەڭگە كىرىس ءتۇستى. بۇل جوسپاردان 16 ملرد تەڭگەگە, ال بىلتىرعى جىلدىڭ ءتورت ايىنىڭ كورسەتكىشىنەن 173 ملرد تەڭگەگە ارتىق. ءوسۋ قارقىنى 110,7% قۇرايدى. جوسپاردىڭ ارتىعىمەن ورىندالۋى نەگىزىنەن سالىقتار بويىنشا قالىپتاستى. ولاردىڭ ىشىندە, ۇستەمە تابىس سالىعى — 8,5 ملرد تەڭگە, شيكى مۇنايعا سالىناتىن ەكسپورتتىق كەدەن باج سالىعى — 32,1 ملرد تەڭگە.
جەرگىلىكتى بيۋدجەتتەردىڭ كىرىستەرى 106 ملرد تەڭگەگە ارتىعىمەن ورىندالىپ, 728 ملرد تەڭگەنى قۇرادى. مەملەكەتتىك بيۋدجەت شىعىستارى 96,6%-كە, رەسپۋبليكالىق — 96,9%, جەرگىلىكتى بيۋدجەتتەر — 98%-كە اتقارىلدى.
«الداعى باستى ماقسات – ناقتىلانعان بيۋدجەتتەگى قوسىمشا بەرىلگەن قاراجاتتىڭ تۇپكىلىكتى تۇتىنۋشىلارعا جانە ەكونوميكالىق اينالىسقا ۋاقىتىندا جەتۋىن قامتاماسىز ەتۋ. بۇل جۇمىستى رەسپۋبليكالىق بيۋدجەتتىك باعدارلامالار اكىمشىلەرى مەن جەرگىلىكتى اتقارۋشى ورگاندارمەن بىرلەسىپ ورىندايمىز», — دەدى ب. سۇلتانوۆ.
ينۆەستيتسيالار جانە دامۋ ءمينيسترى ج. قاسىمبەكتىڭ ايتۋىنشا, سالانىڭ نەگىزگى كورسەتكىشتەرى بويىنشا ناقتى كولەم يندەكسى ورىندالدى. مəسەلەن, قاڭتار–ساۋىر ايلارىندا تەمىر رۋداسىنىڭ نكي 103,9%; ءتۇستى مەتالل كەندەرىن ءوندىرۋ بويىنشا — 102,1%; فارماتسەۆتيكالىق ونىمدەردى ءوندىرۋ بويىنشا — 107,7%; مەتاللۋرگيا بويىنشا — 104,1%; قۇرىلىستا — 102,1% قۇرادى. وسى جىلدىڭ قاڭتار–ساۋىر ايلارىندا ترانسپورت بويىنشا نكي — 104,6% قۇرادى.
2018 جىلدىڭ 4 ايىنداعى ەنەرگەتيكا سالاسىنىڭ نەگىزگى ەكونوميكالىق كورسەتكىشتەرىنىڭ الدىن-الا قورىتىندىلارى تۋرالى بايانداي وتىرىپ, ەنەرگەتيكا ءمينيسترى قانات بوزىمباەۆ مۇناي جانە كوندەنسات ءوندىرۋ كولەمى 2017 جىلدىڭ سايكەس كەزەڭىمەن سالىستىرعاندا 105,9% نەمەسە وسى جىلدىڭ 4 ايىنىڭ جوسپارىنىڭ 104,5% قۇرايتىنىن اتاپ ءوتتى.
«2018 جىلدىڭ 4 ايىندا 24,1 ملن توننا مۇناي ەكسپورتتالدى, بۇل 2017 جىلدىڭ وسىنداي كەزەڭىمەن سالىستىرعاندا 104,3 % قۇرايدى. مۇناي وڭدەۋ كولەمى 5,1 ملن توننانى نەمەسە وسى جىلدىڭ 4 ايىنىڭ جوسپارىنا قاراعاندا 104,6% قۇرادى», — دەدى قانات بوزىمباەۆ.
جالپى, اۋىل شارۋاشىلىعى مينيسترلىگىنىڭ تاپسىرىسىنا سايكەس ديزەل وتىنىنىڭ قاجەتتىلىگى تولىق كولەمدە ورىندالدى. 2018 جىلعى ناۋرىز ايىنا كوكتەمگى ەگىس جۇمىستارىن وتكىزۋ ءۇشىن ديزەل وتىنىنىڭ ۇسىنىلاتىن باعاسى تونناسىنا 156 000 تەڭگەنى (130 تگ/ل) قۇرادى.
2017 جىلدىڭ وسىنداي كەزەڭىمەن سالىستىرعاندا, ەلەكتر ەنەرگياسى 8%-كە ارتتى. كومىر ءوندىرۋ كولەمى وتكەن جىلدىڭ سايكەس كەزەڭىمەن سالىستىرعاندا 103,2%-ءتى قۇرادى.
2018 جىلعى 4 ايداعى الەۋمەتتىك-ەكونوميكالىق دامۋ مەن رەسپۋبليكالىق بيۋدجەتتىڭ اتقارىلۋى ماسەلەلەرىن قاراۋ قورىتىندىسى بويىنشا قر پرەمەر-ءمينيسترى باقىتجان ساعىنتاەۆ ۇكىمەتتىڭ ەكونوميكالىق بلوگىنىڭ باسشىلارىنا ەكونوميكانىڭ ودان ءارى ءوسۋىن قامتاماسىز ەتۋ بويىنشا ءتيىمدى شارالاردى قابىلداۋدى تاپسىردى.
سونىمەن قاتار, باقىتجان ساعىنتاەۆ ەل ەكونوميكاسىنىڭ اسا جوعارعى ءوسۋ قارقىنىن قامتاماسىز ەتۋ بويىنشا مەملەكەت باسشىسىنىڭ ۇكىمەت الدىنا قويعان مىندەتتەرىن ۇنەمى ەستە ۇستاۋ قاجەتتىگىن اتاپ ءوتتى.
