مامانداردىڭ ايتۋىنشا, ەشكى ءسۇتى انەميادا, تاعامدىق اللەرگيا, تۋبەركۋلەز, اسقازان, ىشەك-قارىن جولدارىنىڭ اۋرۋلارىندا, ديابەت, دياتەز, اعزانىڭ قورعانىس قىزمەتىن ارتتىرۋدا, اعزادان اۋىر مەتالداردىڭ تۇزدارى مەن راديونۋكليدتەردى شىعارۋدا جانە كوزدىڭ ناشار كورۋىندە پايدالى ەكەن. سونداي-اق, ەشكى سۇتىندە كالتسي, ماگني, فوسفور, مارگانەتس, مىس, ا, ۆ1, س جانە د دارۋمەندەرى مەن اسكوربين قىشقىلى بار. سوندىقتان دا بولار, ەشكى سۇتىنە سۇرانىس كوپ.
وسىنداي جايتتەر ەسكەرىلە كەلە, وڭتۇستىك قازاقستان وبلىسى ورداباسى اۋدانىندا تاۋلىگىنە 3 توننا ەشكى ءسۇتىن وندىرۋگە جانە 24 توننا ءسۇت وڭدەۋگە قاۋقارلى «اسىل تۇقىمدى شارۋاشىلىق, ورداباسى ەشكى ءسۇت ونىمدەرى» كووپەراتيۆى قۇرىلدى. جاڭادان اشىلعان شارۋاشىلىقتىڭ جۇمىسىمەن تانىسقان وبلىس اكىمى جانسەيىت تۇيمەباەۆ ەشكى ءسۇتىنىڭ ادام دەنساۋلىعىنا پايداسى مول ەكەنىن ايتىپ, اتقارىلىپ جاتقان جۇمىستارعا وڭ باعاسىن بەردى.
سەرىكتەستىك توراعاسى جەڭىس توعىزاقباەۆتىڭ ايتۋىنشا, وندىرىستىك كووپەراتيۆتىڭ ىسكە قوسىلعان ءبىرىنشى كەزەڭىندە ساۋىن تسەحى مەن ءسۇت وڭدەۋ زاۋىتىنىڭ جانە جەم-ءشوپ جيناۋ عيماراتىنىڭ قۇرىلىسى اياقتالعان. جوبانىڭ جالپى قۇنى - 1 ملرد. 829 ملن. تەڭگە. ءۇش كەزەڭنەن تۇراتىن جوسپار تولىعىمەن ورىندالعاننان كەيىن ەشكى سانى 6 مىڭعا جەتەتىن بولادى. زاانەن تۇقىمىنىڭ جەرگىلىكتى ەشكىلەردەن ايىرماشىلىعى – سۇتتىلىگىندە, ياعني كۇنىنە 5-6 ليتر ءسۇت بەرەدى. بۇگىندە وندىرىلگەن ەشكى سۇتىنەن ايران, قايماق, قۇرت, سۇزبە جانە يوگۋرت ءونىمى شىعارىلىپ جاتىر. كۇنىنە ەكى مارتە ساۋىلاتىن ەشكى ءسۇتىنىڭ ءليترى 500 تەڭگە كولەمىندە ساۋدالانۋدا ەكەن. الداعى ۋاقىتتا كاسىپورىن يتاليا ەلىنىڭ جاڭا تەحنولوگيالى قۇرىلعىلارىن ورناتىپ, ساۋىن مەن ءسۇت وڭدەۋ پروتسەسىن تولىعىمەن اۆتوماتتاندىرۋدى, «موتسارەللا» ىرىمشىگىن شىعارۋدى جوسپارلاپ وتىر.
ەركىن دوسىمباي,
وڭتۇستىك قازاقستان وبلىسى.
