اتا-انالار جينالىسىنىڭ كوزدەگەن باستى ماقساتى – ءار وتباسىنىڭ بالا تاربيەسىنە بەلسەنە قاتىسۋىنىڭ ماڭىزىن ارتتىرۋ, بالانىڭ جاقسى ادەتتەردى بويىنا ءسىڭىرىپ ءوسۋ جولدارىن اتا-انالارمەن بىرلەسە قاراستىرۋ, سونداي-اق ءبىلىم بەرۋ مازمۇنىن جاڭارتۋ بويىنشا جۇرگىزىلىپ جاتقان مەملەكەتتىك ساياساتتى تالقىلاۋعا اتا-انالار قاۋىمىن كىرىستىرۋ. نەگىزىندە مەكتەپتەگى تاربيە جۇمىسى ناتيجەلىلىگىنىڭ ءبىر ۇشى اتا-انالار مەن مەكتەپتىڭ بىرلەسكەن ارەكەتىندە ەكەنى بەلگىلى.
ەلباسى نۇرسۇلتان نازارباەۆ زامان تالابىنا ساي, جان-جاقتى جەتىلگەن, بويىندا ۇلتتىق سانا مەن ۇلتتىق پسيحولوگيا قالىپتاسقان, يماندىلىق ادەبى, پاراساتى بار ۇرپاق تاربيەلەۋ, ءوسىرۋ, ءبىلىم بەرۋ بۇگىنگى وتباسىنىڭ, بالاباقشانىڭ, مەكتەپتىڭ, بارشا ەلدىڭ مىندەتى ەكەندىگىن ايتادى. شىنىمەن دە, تاربيە جۇمىسىنىڭ تابىستى بولۋىنىڭ باستى كەپىلى مەكتەپ پەن اتا-انالار اراسىنداعى ىنتىماقتاستىقتا. ويتكەنى بالانىڭ باستى ۇستازى – اتا-انا. وي-ساناسى دامىعان, مادەنيەتتى تۇلعانى جان-جاقتى قالىپتاستىرۋدى كوزدەگەن تاربيە ماسەلەلەرى مەكتەپتى دە, اتا-انانى دا ارقاشان تولعاندىرىپ كەلەدى. بۇگىنگى تاڭدا بالالاردىڭ ساپالى ءبىلىپ الىپ, باسەكەگە قابىلەتتى, بولاشاقتارى جارقىن بولۋلارى ءۇشىن جاڭارتىلعان مازمۇن ەنگىزىلىپ, ەلىمىزدىڭ مۇعالىمدەرى اراسىندا پەداگوگتاردىڭ بىلىكتىلىكتەرىن ارتتىرۋ باعدارلاماسى شەڭبەرىندە جاپپاي وقىتۋ جۇرگىزىلىپ جاتىر.
بيىلعى اتا-انالار جينالىستارىندا ءار مەكتەپتە جۇمىس ىستەيتىن قامقورشىلىق كەڭەستەرىنىڭ مىندەتتەرى, قاعيداسى مەن قىزمەت تەتىكتەرى تالقىلانادى دەپ جوسپارلانۋدا. مەكتەپ ومىرىمەن تىعىز بايلانىستى قامقورشىلىق كەڭەستەرىنىڭ باستى ماقساتى – ءبىلىم بەرۋ ساپاسىن ارتتىرۋدا بىرىگىپ جۇمىس ىستەۋ, مۇمكىندىگى زور ءارى شىعارماشىل الەۋەتى جوعارى ءبىلىم بەرۋ ورتاسىن قالىپتاستىرۋ ەكەندىگىن ءبىرى بىلسە, ءبىرى بىلمەيدى. وسى رەتتە قامقورشىلىق كەڭەستەرىنىڭ قاتىسۋشىلارى رەتىندە اتا-انالار, جەرگىلىكتى اتقارۋشى ورگانداردىڭ وكىلدەرى, قوعام قايراتكەرلەرى بەلگىلەنىپ وتىرعاندىعىن ايتا كەتكەن ءجون.
اتا-انالاردىڭ جالپىۇلتتىق جينالىسى بيىل حالىقارالىق وتباسى كۇنىمەن سايكەس كەلىپ وتىر. قوعامدا وتباسى رۋحاني جانە مادەني داستۇرلەردىڭ ساقتاۋشىسى, ءتۇرلى بۋىندار اراسىن جالعاستىرۋشى جانە سولاي بولىپ قالا بەرمەك. سوندىقتان شاڭىراقتان العان تاربيە بارشا حالقىمىزدىڭ باقۋاتتى دا باياندى بولاشاعىنىڭ ايقىن كەپىلى. وسى رەتتە اتا-انالار قاۋىمى مامىردىڭ 15 جۇلدىزىندا وتەتىن جالپىۇلتتىق جينالىسقا بەلسەندى قاتىسادى دەگەن سەنىمدەمىن. ويتكەنى اتا-انالار جالپىۇلتتىق جينالىستا مازالاپ جۇرگەن ساۋالدارىنا ماردىمدى جاۋاپ الۋ مۇمكىندىگىنە يە بولادى. سونىمەن قاتار جينالىستىڭ وقۋ جىلىنىڭ سوڭىنا وراي ۇيىمداستىرىلۋى قۋانتادى. ويتكەنى اتا-انالار ءۇشىن ءوز بۇلدىرشىندەرىنىڭ وقۋ جەتىستىكتەرىمەن جىلدىق قورىتىندى باعا شىقپاي تۇرىپ تانىسۋىنا مۇمكىندىك بەرەدى.
بۇگىنگى تاڭدا الەم وزگەرۋىنە بايلانىستى بالالار مەن اتا-انالاردىڭ كوزقاراستارى دا وزگەردى. سوندىقتان مەكتەپ الدىنا قويىلاتىن تالاپتار دا وزگەرتىلۋى ءتيىس. بۇرىنعىداي مۇعالىمنىڭ مونولوگىنە قۇرىلعان جينالىستان گورى, توپتىق جۇمىس ارقىلى اتا-انالاردىڭ بىرلەسە ارەكەت ەتىپ, پروبلەمانى تالقىلاعانى الدەقايدا ءتيىمدى. بالانىڭ العاشقى تاربيەشىسى اتا-اناسى ەكەنى انىق. وتباسى قانداي بولسا, ءوسىپ كەلە جاتقان ۇرپاق تا سونداي بولادى, بالا اكە-شەشەسىنىڭ ۇلگىسىندە تاربيەلەنەدى. ەندەشە وسكەلەڭ ۇرپاق ەل تىزگىنىن ۇستايتىنداي ازامات بولسىن دەسەك اتا-انالارمەن جۇرگىزىلەتىن جۇمىستاردىڭ جاڭاشا باعىتتارىن قاراستىرىپ, كەلەشەكتە جاس ۇرپاق بولاشاق ەلىمىزدىڭ تۇتقاسى بولۋىنا مەكتەپ, اتا-انا, ۇستاز بولىپ ىقپال ەتە ءبىلۋ ماڭىزدى.
وتباسى – تاربيە كوزى, مەكتەپ ونى شىڭداۋشى. «تاربيەسىز بەرىلگەن ءبىلىم – تۇل» دەپ ۇلى عۇلاما ءال-فارابي اتاپ كورسەتكەندەي, ءبىلىمدى ۇرپاق تاربيەلەۋدىڭ اتا-انا مەن مەكتەپتىڭ تىعىز بايلانىسىندا ءوتۋى بيىك ناتيجەگە جەتكىزەدى.
ساندۋعاش بايميشەۆا,
اتا-انالار قاۋىمداستىعىنىڭ مۇشەسى
سولتۇستىك قازاقستان وبلىسى
