«ناپولي» ءوز مۇمكىندىگىن ءوزى قۇرتىپ «فيورەنتيناعا» جەڭىلگەن سوڭ, چەمپيون اتانۋعا تەك قانا ماتەماتيكالىق مۇمكىندىگى قالىپ ەدى. سىرت الاڭدا «سامپدوريانى» جەڭگەنىمەن, «يۋۆەنتۋس» «رومامەن» تەڭ ءتۇسىپ, وزىنە قاجەتتى 1 ۇپايدى قورجىنعا سالدى. ماسسيميليانو اللەگري شاكىرتتەرى جەتىنشى جىل قاتارىنان يتاليا چەمپيونى بولىپ, رەكورد ورناتتى. ونىسىمەن قويماي 120 جىلدىق تاريحىندا 34-رەت ەلدىڭ ۇزدىك كومانداسى اتانىپ وتىر. ايتپاقشى, اللەگري قازىر ارسەن ۆەنگەردىڭ ورنىنا «ارسەنال» باپكەرى بولۋى مۇمكىن بىردەن-ءبىر ۇمىتكەر.
سالاح – جىل ۇزدىگى
اعىلشىن پرەمەر-ليگاسىندا دا بىرقاتار رەكورد ورىن الدى. مىسالى, «مانچەستەر سيتي» كومانداسى 89-مينۋتتا گابريەل جەزۋستىڭ سوققان گولىنان كەيىن «ساۋتگەمپتوندى» ۇتتى.
سوڭعى تۋردا العان 3 ۇپايدىڭ ارقاسىندا «مانچەستەر سيتي» اعىلشىن پرەمەر-ليگاسىندا بۇرىن-سوڭدى ەشكىم جيناي الماعان ۇپايعا قول جەتكىزدى. حوسەپ گۆارديولا جىگىتتەرى ارتىق-كەمى جوق تۋرا 100 ۇپاي ەنشىلەدى. مۇنىمەن دە شەكتەلمەي ءبىر ماۋسىمدا 106 گول سوعىپ, قاتارىنان 18 ويىندى جەڭىسپەن اياقتادى.
سونىمەن قاتار بىرىنشىلىكتىڭ قولا جۇلدەسىنە يە بولعان «ليۆەرپۋل» شابۋىلشىسى مۇحامەد سالاح 32 گولمەن ۇزدىك سۇرمەرگەن اتاندى. مىسىرلىق فۋتبولشى بيىلدىڭ وزىندە 34 ماراپات الىپ, ءدۇيىم جۇرتتى تاڭعالدىردى. ونىڭ ەڭ باستىسى – «افريكا قۇرلىعىنىڭ ۇزدىك ويىنشىسى» مەن «اعىلشىن پرەمەر-ليگاسىنىڭ ۇزدىك ويىنشىسى» دەگەن اتاقتارى.
«بارسەلونانىڭ» وكىنىشى
بۇكىل ماۋسىم بويى ءارتۇرلى ماتچتاردى باستان وتكەرىپ, جەڭىلىس دەگەندى بىلمەگەن «بارسەلونا» 37-تۋردا ۇتىلىپ قالدى.
تالاي ويىندى سوڭعى مينۋتتاردا جەڭىپ كەتىپ, «رەالمەن» بولعان ماتچتا 10 فۋتبولشىمەن ءجۇرىپ تەڭ ويناعان كاتالونيالىقتار بىرىنشىلىكتە 15-ورىندا تۇرعان «لەۆانتەگە» شاماسى جەتپەيدى دەپ كىم ويلاعان؟! بۇل ويىندا «لەۆانتە» شابۋىلشىسى ەمانۋەل بواتەنگ
3 گول سوقتى. سوناۋ 2005 جىلى ديەگو فورلان «بارسەلونا» قاقپاسىنا حەت-تريك جاساعان ەكەن. سودان بەرى بۇل كومانداعا ءبىر ويىندا لا-ليگانىڭ ەشبىر شابۋىلشىسى ءۇش گول سوقپاعان.
ءبىر ايتا كەتەرلىگى «لەۆانتە» ناۋرىز ايىندا باپكەر اۋىستىرىپ, 4-ليگادا قىزمەت ەتىپ جۇرگەن پاكونى جۇمىسقا الدى. مىنە, فۋتبولعا دەگەن كوزقاراسى ەرەكشە مامان كەلگەلى بەرى «لەۆانتە» ويىنى جاندانا ءتۇستى. ءتىپتى, ءبىر قىزىعى سوڭعى ەكى ايدا مۇمكىن بولعان 30 ۇپايدىڭ 25-ءىن جيناپ, «لەۆانتە» لا-ليگانىڭ سوڭعى ايلارداعى ۇزدىك كومانداسى اتاندى.
«بارسەلونا» ءۇشىن ءبىر جاعىمدىسى لەونەل مەسسي 34 گول سوعىپ, ەۋروپا بىرىنشىلىكتەرىندەگى ەڭ كوپ گول سالعان فۋتبولشى رەتىندە «التىن بۋتسىنى» الاتىن بولدى. بۇل جەردە ەسكەرە كەتەتىن ءبىر جايت بار. يسپان لا-ليگاسىنىڭ جەكە كوەففيتسيەنتى 2-گە تەڭ بولعاندىقتان مەسسيدىڭ ۇپايى 68 بولادى. ال نەگىزى «بەنفيكا» شابۋىلشىسى جوناس بيىل پورتۋگاليا چەمپيوناتىندا 35 گول سوعىپ تاستاعان ەدى.
دايىنداعان
ەرمۇحامەد ماۋلەن,
«ەگەمەن قازاقستان»
