وبلىستىق كاسىپكەرلىك پالاتاسى ديقاندارعا كومەكتەسۋدىڭ تاعى ءبىر ءتاسىلىن تاپتى. وڭىردە «تىڭايتقىشتاردى ءتيىمدى پايدالانۋ جانە كۇرىش ونىمدىلىگىن ارتتىرۋ» تاقىرىبىندا وتكەن سەميناردا «تەگىن كەڭەس» بەرۋ قىزمەتى قولعا الىناتىندىعى حابارلاندى.
بۇل ماقسات ءۇشىن ونسىز دا جەتپەي جاتقان اگرونومداردى انا شارۋاشىلىقتان مىنا شارۋاشىلىققا تارتقىلامايدى. زەينەتكە شىققان اگرونومدار جۇمىسقا الىنباق. ولارعا كەڭسەدەن ورىنجاي بەرىلمەك. ديقان كەڭسەگە كەلىپ, اپتاسىنا ەكى رەت تەگىن كەڭەس الا الادى. قاجەت بولعان جاعدايدا ەگىس باسىنا اپارىپ, داقىلىنىڭ جايىن كورسەتىپ قاجەتتى نۇسقاۋلارىن تىڭدايدى.
بۇل ارينە كاسىپكەرلىك پالاتاسىنىڭ اۋادان الىپ وتىرعان اقىلى ەمەس. مۇنداي جاقسى ءۇردىس اۋىل شارۋاشىلىعىنان مول ءونىم جيناپ وتىرعان ەۋروپا ەلدەرىندە جولعا جاقسى قويىلعان. وندا زەينەتتەگى اگرونومدار كەلىسىم-شارتپەن جۇمىس جاسايدى.
وبلىستىق كاسىپكەرلەر پالاتاسىنىڭ ءبولىم باسشىسى جاسۇلان سەرىكوۆ: «وسىنداي جول ارقىلى شارۋاشىلىقپەن اينالىسىپ جاتقان جاستارعا قولداۋ كورسەتەمىز, تاجىريبەسىن بايىتامىز», دەيدى.
نەسى بار, ۇيرەنەتىن ءۇردىس. اۋىل شارۋاشىلىعى قاتتى دامىعان گوللانديا ەلىندە كۇنىنە 60 ليتر ءسۇت بەرە الماعان سيىر قاساپحاناعا كەتەدى ەكەن. ال اۋىلداعى قىز-كەلىنشەكتەر كۇنىنە ون ليتر بەرمەيتىن سيىرلارىنىڭ شاندىر جەلىنىن قاقتاپ ءالى وتىر.
«ۇيرەن دە جيرەن» دەيدى حالىق دانالىعى. زەينەتكە شىققان, تاجىريبەسى تولىسقان كەشەگى ماماننىڭ كومەگى بۇگىنگى جاس بۋىنعا ابدەن كەرەك. ايتپەسە داقىلدى سەۋىپ تاستاپ, «الما ءپىس, اۋىزعا ءتۇس» پايدا بەرگەن ەمەس. كاسىپكەرلەر پالاتاسىنىڭ بۇل ىزدەنىسىن جاقسىلىققا بالادىق.
باقتيار تايجان,
«ەگەمەن قازاقستان»
قىزىلوردا وبلىسى
