وسى ورايدا وتكەن اپتادا اقتوبەدە وبلىس اكىمى بەردىبەك ساپارباەۆتىڭ باستاماسىمەن وتكەن حالىقارالىق فورۋم العا قويعان ماقساتىن ورىنداپ شىقتى دەۋگە بولادى. وعان الەمنىڭ ءار تۇپكىرىنەن مىڭنان استام ساراپشى قاتىسۋى, گەوگرافياسىنىڭ كەڭدىگى تاياۋ جانە الىس شەتەلدەردەگى مەملەكەتتىك ورگاندار مەن بيزنەس وكىلدەرىنىڭ جانە ۇكىمەتتىك ەمەس ۇيىمدار قاۋىمداستىعىنىڭ باستارىن قوسۋعا تۇرتكى بولعانى فورۋمنىڭ باستى ارتىقشىلىعى بولماق. ەگەر وسى قۇرىلىمداردىڭ اراسىندا ءوزارا ءتيىمدى ىنتىماقتاستىق پەن تۇپكى ناتيجەنى العا ۇستايتىن قارىم-قاتىناستار بولماسا, الەۋمەتتىك ماسەلەلەر مەن پروبلەمالاردى شەشۋ ءىسى تەك قۇرعاق ءسوز كۇيىندە قالىپ قويادى. بۇلاي بولماۋى ءۇشىن نە ىستەۋ كەرەك؟ وسى ساۋالعا وراي فورۋمدا يزرايل, تۇركيا, پولشا, گرۋزيا جانە قىرعىزستان ەلدەرىنەن كەلگەن الەۋمەتتىك سالانىڭ جاناشىرلارى ۇتىمدى ۇسىنىستارى مەن كوڭىلگە قونىمدى وي-پىكىرلەرىن ورتاعا سالدى.
بۇگىنگى كۇردەلى كەزەڭدە الەۋمەتتىك ماسەلەلەر وزىمەن-ءوزى تۇيىقتالىپ, ءوز سولىندە ءوزى قايناي بەرۋگە ءتيىستى ەمەس. ونىڭ شەشىمى كوپ جاعدايدا كاسىپكەرلىك قۇرىلىمداردىڭ الەۋمەتكە قولداۋىنان جانە الەۋمەتتىك-كاسىپكەرلىك تۇرعىداعى بايلانىستاردىڭ تەرەڭدەي تۇسۋىنەن كورىنىس تابۋعا ءتيىس. حالىقارالىق فورۋمنىڭ اشىلۋ ءراسىمى كەزىندە ەڭبەك جانە حالىقتى الەۋمەتتىك قورعاۋ ءمينيسترى ءمادينا ابىلقاسىموۆا ءسوز تيەگىن وسى ارنادا ساباقتادى. بەلگىلى مەملەكەت اۋقىمىنداعى قولعا الىنعان ىلكىمدى ءىستىڭ بايلانار قازىعى مەن تۇعىرى بولسا, بۇل جايت قولعا الىنعان شارۋانىڭ وڭ ناتيجە كورسەتۋىنە العىشارت قالاي الادى. وسى ورايدا مەملەكەت باسشىسىنىڭ بەس الەۋمەتتىك باستاماسى الەۋمەتتىك ماسەلەلەردىڭ ءتۇيىنىن تارقاتۋدىڭ باستى كىلتى بولىپ تابىلادى, دەدى م.ابىلقاسىموۆا.
سونداي-اق فورۋمدا الەۋمەتتىك پروبلەمالاردىڭ وڭ شەشىمىن تابۋىنا كومەگىن تيگىزە الاتىن كاسىپكەرلىكتىڭ جاڭا باعىتتارى مەن جولدارىن ىزدەستىرۋ جانە ونى الەمدىك ترەندتەردىڭ تاسقىنىنا سايكەستەندىرۋ ءارى ورتاق حالىقارالىق تاجىريبەنى ودان ءارى بايىتا ءتۇسۋ جونىندە قۇندى وي-پىكىرلەر ايتىلدى.
اقتوبە وڭىرىندە جىل سايىن الەۋمەتتىك كاسىپكەرلىك نىساندار مەن مەملەكەت-جەكەمەنشىك ارىپتەستىگى اياسىندا بوي كوتەرگەن ءساندى دە ساۋلەتتى الەۋمەتتىك قۇرىلىستار كەڭىنەن قانات جايىپ كەلەدى. ونىڭ ۇستىنە بيىل وڭىردەگى اتقارۋشى ورگاندار مەن بيزنەس جانە كاسىپكەرلىك قۇرىلىمدار وكىلدەرى, ۇكىمەتتىك ەمەس ۇيىمدار قاۋىمداستىعى ءبىر جاعادان باس, ءبىر جەڭنەن قول شىعارا وتىرىپ, الەۋمەتتىك ماسەلەلەردى شەشۋ مەن رەتتەۋ ىسىنە جاڭا سەرپىن بەردى. ونىڭ ىشىندە «انالارعا تاعزىم» جانە «باقىتتى بالا» جوبالارىنىڭ شوقتىعى بيىك تۇر. ءبىر سوزبەن ايتقاندا, وبلىستا حالىقارالىق فورۋمعا قاتىسۋشىلار نازار اۋدارا الاتىنداي وڭ مىسالدار مول, ۇيرەنۋگە تۇرارلىق ۇردىستەر دە جەتكىلىكتى. وسى ورايدا فورۋم اياسىندا وڭىردەگى نىسانداردى تانىستىرۋ ءراسىمى جانە سەمينارلار مەن جاڭا فورماتتاعى شەبەرلىك كلاستارى وتكىزىلدى.
تەمىر قۇسايىن,
«ەگەمەن قازاقستان»
اقتوبە
سۋرەتتە: حالىقارالىق فورۋمنان كورىنىس
