مەملەكەتتىك ورگاندار باسشىلارى جانە بيزنەس-قاۋىمداستىق وكىلدەرى قاتىسقان كەزدەسۋ بارىسىندا قوسىمشا قۇن سالىعى, كاسىپكەرلىك سالاسىنداعى وزەكتى ماسەلەلەر مەن ولاردى شەشۋ جولدارى تالقىلاندى.
سەنات دەپۋتاتى, پارلامەنت سەناتى قارجى جانە بيۋدجەت كوميتەتىنىڭ توراعاسى ولگا پەرەپەچينا شارانى اشا كەلىپ, بيزنەس, ەكونوميكا سالالارىن دامىتۋدىڭ كەلەشەگى مەن جاڭا سالىق جانە كەدەن كودەكستەرىنىڭ كاسىپكەرلىك قىزمەتكە اسەرى جونىندەگى وزەكتى ماسەلەلەردى تالقىلاۋ ماقساتىندا پالاتا كوميتەتىنىڭ مۇشەلەرى سالىق جانە كەدەن ساياساتى مەن اكىمشىلەندىرۋ, سونداي-اق ينۆەستيتسيالىق احۋال ماسەلەلەرى بويىنشا جەرگىلىكتى جەردە مەملەكەتتىك ورگاندار باسشىلارىمەن جانە بيزنەس-قاۋىمداستىق وكىلدەرىمەن كەزدەسىپ وتىرعانىن اتاپ ءوتتى.
و. پەرەپەچينا سەناتورلاردىڭ «قورعاس» شەكارا ماڭى ىنتىماقتاستىعى حالىقارالىق ورتالىعى قىزمەتىنىڭ قازىرگى جاي-كۇيى مەن وزەكتى ماسەلەلەرىن زەردەلەۋ نيەتى تۋرالى ايتتى. دەپۋتاتتار شارا بارىسىندا «قورعاس-شىعىس ارنايى ەكونوميكالىق ايماق» قۇرعاق پورتى مەن كولىك-لوگيستيكا ورتالىعىنىڭ جۇمىسىمەن تانىستى, ونداعى جۇمىستاردىڭ بارىسى, كەدەن باقىلاۋى مەن ءارتۇرلى جوبالاردىڭ ىسكە اسۋى تۋرالى پايدالى اقپاراتتارعا قول جەتكىزدى.
ماسەلەلەردى جان-جاقتى تالقىلاۋ ءۇشىن ۇلتتىق ەكونوميكا مينيسترلىگى مەن قارجى مينيسترلىگىنىڭ وكىلدەرى كەزدەسۋگە شاقىرىلدى. ولار جاڭا سالىق جانە كەدەن كودەكستەرىنىڭ جوباسىن ازىرلەۋگە قاتىسقان بولاتىن.
شاراعا قاتىسۋشىلار الدىندا ۇلتتىق ەكونوميكا مينيسترلىگى سالىق جانە كەدەن ساياساتى دەپارتامەنتىنىڭ ديرەكتورى ازامات ءامرين, قارجى مينيسترلىگى مەملەكەتتىك كىرىستەر كوميتەتى توراعاسىنىڭ ورىنباسارى عۇسمان ءامىرين, ينۆەستيتسيالار جانە دامۋ مينيسترلىگى ارنايى ەكونوميكالىق جانە يندۋستريالىق اۋماقتار باسقارماسىنىڭ جەتەكشىسى ارسەن مەڭدىعازيەۆ, الماتى وبلىس اكىمىنىڭ ورىنباسارى جەڭىس تۇياقوۆ ءسوز سويلەدى.
وتىرىس بارىسىندا شاراعا قاتىسۋشىلار ينۆەستيتسيالىق كومپانيالارعا قوسىمشا قۇن سالىعىن قايتارۋعا, يمپورتتالاتىن تاۋارلاردى قوسىمشا قۇن سالىعىنان بوساتۋعا قاتىستى, سونداي-اق بيزنەس-احۋالدى جاقسارتۋ, كاسىپكەرلىك سالاسىنداعى وزەكتى ماسەلەلەر جانە ولاردى شەشۋدىڭ جولدارى جونىندەگى ماڭىزدى ماسەلەلەردى تالقىلادى.
كوشپەلى وتىرىستى ولگا پەرەپەچينا قورىتىندىلادى. ونىڭ ايتۋىنشا, كوميتەت وتىرىسىندا ايتىلعان ۇسىنىستار مەن ەسكەرتپەلەر سالىق جانە كەدەن ساياساتى مەن اكىمشىلەندىرۋ, ينۆەستيتسيالىق احۋال ماسەلەلەرىن رەتتەۋگە ارنالعان زاڭ جوبالارىن قاراۋ بارىسىندا پايدالانىلاتىن بولادى.
پارلامەنت دەپۋتاتتارى سوڭىندا «قالجات» كەدەن-لوگيستيكا ورتالىعىنا جانە ايماقتاعى باسقا دا نىساندارعا باردى.
