نۇرسۇلتان نازارباەۆ كەزدەسۋ بارىسىندا ۆلاديمير ءپۋتيندى رەسەي فەدەراتسياسىنىڭ پرەزيدەنتى بولىپ سايلانۋىمەن تاعى دا قۇتتىقتاپ, جاۋاپتى قىزمەتىنە تابىس تىلەدى.
– بيىلعى 18 ناۋرىزدا تاريحي ماڭىزى بار وقيعا بولدى. ءسىز رەسەي حالقىنىڭ اسقاق سەنىمىن يەلەنىپ, زور جەڭىسكە جەتتىڭىز. قازىرگىدەي كۇردەلى جاعدايدا مۇنداي سەنىمنىڭ ءمانى زور, – دەدى قازاقستان پرەزيدەنتى.
نۇرسۇلتان نازارباەۆ قازاقستان مەن رەسەي اراسىنداعى ساۋدا-ەكونوميكالىق, ينۆەستيتسيالىق جانە باسقا دا ماڭىزدى سالالار مەن باعىتتار بويىنشا ەكىجاقتى دوستىق پەن تىعىز ىنتىماقتاستىق ورنىققانىنا توقتالدى.
– قازاقستان – رەسەيمەن ۇلگى بولارلىق قارىم-قاتىناس جانە قارقىندى ەكونوميكالىق بايلانىس ورناتقان ەڭ جاقىن مەملەكەت. ەلدەرىمىز اراسىنداعى تاۋار اينالىمىنىڭ كولەمى – 16 ميلليارد دوللارعا جۋىق. بىرلەسكەن كاسىپورىندار سانى ارتىپ كەلەدى, – دەدى قازاقستان پرەزيدەنتى.
سونىمەن قاتار مەملەكەت باسشىسى ەكى ەل اراسىنداعى جوعارى دەڭگەيدەگى ءوزارا ىقپالداستىق قازاقستان-رەسەي قاتىناستارىندا تۋىندايتىن ماسەلەلەردى ءتيىمدى شەشۋگە سەپتىگىن تيگىزىپ وتىرعانىن ايتتى.
– قازاقستان ءاردايىم سىزدەرمەن بىرگە. ءبىز ارقاشان بىرگە جۇمىس جۇرگىزىپ, بىرلەسە العا ۇمتىلىپ, بۇل كۇردەلى كەزەڭدى دە ەڭسەرەتىن بولامىز. بۇگىندە بارلىق باعىت بويىنشا قالىپتى جۇمىس جۇرگىزىلۋدە. كورشىلەس تاۋەلسىز مەملەكەتتەر اراسىندا ءاردايىم ماسەلەلەر تۋىنداپ جاتادى. ءبىزدىڭ ۇكىمەتتەرىمىز بەن مينيسترلىكتەرىمىز اراسىندا تىعىز قارىم-قاتىناس ورنىققان. تۋىندايتىن ماسەلەلەردى دۇرلىكتىرمەي, بايسالدىلىقپەن شەشۋ قاجەت. ءبىز – وداقتاس ەلدەرمىز, ەكى ەلدىڭ بۇقارالىق اقپارات قۇرالدارى دا وسى باعىتتا جۇمىس جۇرگىزۋى ءتيىس, – دەدى نۇرسۇلتان نازارباەۆ.
رەسەي فەدەراتسياسىنىڭ پرەزيدەنتى ەكى مەملەكەت اراسىنداعى ءتۇرلى سالالار بويىنشا ءوزارا ءتيىمدى قارىم-قاتىناس ورنىققانىن ايتىپ, ونىڭ وڭ قارقىنمەن دامىپ كەلە جاتقانىنا توقتالدى.
ۆلاديمير پۋتين قازاقستان رەسەيدىڭ ستراتەگيالىق وداقتاسى عانا ەمەس, سونداي-اق ەڭ جاقىن ەكونوميكالىق سەرىكتەستەرىنىڭ ءبىرى ەكەنىن اتاپ ءوتتى.
– ەلدەرىمىز اراسىنداعى قاتىناستار تابىستى ءارى دايەكتى دامىپ كەلەدى. بىلتىر ەكونوميكادا جاقسى ناتيجەگە قول جەتكىزدىك. اتاپ ايتقاندا تاۋار اينالىمى 30 پايىزعا ءوستى. رەسەي قازاقستاننىڭ جەتەكشى ساۋدا-ەكونوميكالىق سەرىكتەستەرىنىڭ ءبىرى بولىپ قالا بەرمەك. رەسەيدىڭ قازاقستان ەكونوميكاسىنا بولگەن تىكەلەي ينۆەستيتسياسىنىڭ كولەمى ارتقانىن دا اتاپ وتكىم كەلەدى, – دەدى ۆلاديمير پۋتين.
